సుధీర్ రెడ్డికి పోలీసుల నోటీసులు,,,,,పోలీసులకు రాఖీలు కట్టిన రిషిత

తిరుపతి జిల్లా శ్రీకాళహస్తిలో టీడీపీ నేత సతీమణి తన ఇంటికి వచ్చిన పోలీసులకు రాఖీలు కట్టారు. ఇసుక అంశంపై మూడు రోజులుగా టీడీపీ ఆందోళనలు నిర్వహిస్తోంది. ఈ క్రమంలో బుధవారం రాష్ట్రవ్యాప్తంగా టీడీపీ నేతల్ని పోలీసులు హౌస్ అరెస్ట్ చేశారు. ఎలాంటి ఆందోళనలు, నిరసనలకు అనుమతులు లేవన్నారు. ఈ క్రమంలో తిరుపతి జిల్లా శ్రీకాళహస్తి టీడీపీ ఇంఛార్జ్ బొజ్జల సుధీర్ రెడ్డి ఇంటికి కూడా పోలీసులు వెళ్లారు. ఆయనకు నోటీసులు ఇచ్చి హౌస్ అరెస్ట్ చేస్తామని చెప్పారు.

ఇలా నోటీసులు ఇచ్చేందుకు వెళ్లిన పోలీసులకు బొజ్జల సుధీర్ రెడ్డి సతీమణి రిషిత రెడ్డి రాఖీలు కట్టారు. సీఐ, ఎస్సైతో పాటుగా మిగిలిన సిబ్బందికి రాఖీలు స్వయంగా కట్టారు.. వారికి స్వీట్లు తినిపించారు. సుధీర్ రెడ్డి దగ్గరుండి అందరికి రాఖీలు కట్టించారు. ఓ ఎస్సై రాఖీ కట్టినందుకు రిషిత రెడ్డికి డబ్బులు కూడా ఇచ్చారు. ఈ సీన్ అంతా చూసి టీడీపీ నేతలు, కార్యకర్తలు ఆనందం వ్యక్తం చేశారు. ప్రజలకు రక్షణగా ఉండే పోలీసులకు తాను రాఖీ కట్టడం ఆనందంగా ఉందన్నారు.

టీడీపీ గత మూడు రోజులుగా ఇసుక దోపిడికి వ్యతిరకంగా అంటూ నిరసనలకు దిగింది. రెండు రోజుల పాటూ ఇసుక రీచ్‌లు, మండల కేంద్రాల వద్ద సత్యాగ్రహ దీక్షలు చేపట్టింది. బుధవారం రాష్ట్ర మైనింగ్ కార్యాలయంలో వినతి పత్రాన్ని అందించాలని టీడీపీ నేతలు భావించారు. అయితే ఇబ్రహీంపట్నంలోని రాష్ట్ర మైనింగ్ కార్యాలయానికి వెళ్లేందుకు అనుమతి లేదని పోలీసులు చెప్పారు.. ముందస్తు జాగ్రత్తగా పోలీసులు భారీగా మోహరించారు. రాష్ట్రవ్యాప్తంగా తెలుగు దేశం పార్టీ ముఖ్య నేతల్ని హౌస్‌ అరెస్ట్ చేశారు.