బస్సులో బ్యాగ్ మర్చిపోయిన వ్యక్తి,,,నిజాయితీగా తీసుకెళ్లి డిపోలో ఇచ్చిన ఆర్టీసీ సిబ్బంది

ఆర్టీసీ బస్సుల్లో ప్రతి రోజూ వేలాదిమంది ప్రయాణిస్తుంటారు. కొందరు మాత్రం చివరి నిమిషంలో హడావిడిగా బస్సులు ఎక్కుతుంటారు, దిగుతుంటారు. చాలామంది ప్రయాణికులు హడావిడిలో బస్సుల్లో తమ బ్యాగులతో పాటూ ఇతర లగేజీని మర్చిపోతుంటారు. బస్సు దిగి ఇంటికి వెళ్లాక అసలు సంగతి గుర్తుకువస్తుంది. వెంటనే డిపోలకు వెళితే వారి, వారి వస్తువులు దొరికిన సందర్భాలే ఎక్కువగా ఉన్నాయి. అలా ప్రయాణికులు మర్చిపోయిన బ్యాగుల్లో ఎక్కువ శాతం బంగారం, వెండి, డబ్బులతో పాటుగా ఇతర విలువైన వస్తువులు ఉంటాయి. ప్రయాణికులు పొరపాటున బస్సుల్లో లగేజీని మర్చిపోయి దిగి వెళ్లినా.. ఆర్టీసీ సిబ్బంది మాత్రం నిజాయితీగా వాటిని తిరిగి ఇచ్చేస్తున్నారు.

తాజాగా కాకినాడ జిల్లాలో ఓ ఆర్టీసీ బస్సులో ప్రయాణికుడు మరిచిపోయిన బంగారు ఆభరణాలు ఉన్న బ్యాగును తిరిగి అతడికి అప్పగించారు ఆర్టీసీ సిబ్బంది. బిక్కవోలు మండలం తొస్సిపూడికి చెందిన ద్వారంపూడి వెంకట సత్యనారాయణరెడ్డి బుధవారం నాడు కాకినాడ వెళ్లేందుకు బలభద్రపురంలో బస్సు ఎక్కారు. బస్సు కాకినాడకు చేరుకోగానే తన వెంట తెచ్చుకున్న బ్యాగును మరిచిపోయి వెళ్లిపోయారు. ఆ బ్యాగును బస్సులో గుర్తించిన డ్రైవర్‌ ఎం దాసు, కండక్టర్‌ కె వెంకటరమణ డిపో అధికారులకు అప్పగించారు. అందులో రూ.4.50 లక్షల బంగారు ఆభరణాలు, మొబైల్ ఉన్నాయి.

కొద్దిసేపటి తర్వాత బ్యాగు మరిచిపోయిన విషయం సత్యనారాయణరెడ్డికి గుర్తుకొచ్చింది. వెంటనే కాకినాడ ఆర్టీసీ అధికారులకు సమాచారం అందించారు. ఆ బ్యాగును గురువారం ఆర్టీసీ అధికారుల సమక్షంలో ప్రయాణికుడికి అప్పగించారు. విధి నిర్వహణలో నిజాయితీ చాటిన కండక్టర్‌, డ్రైవర్‌ను ఉన్నతాధికారులు, ప్రయాణికులు అభినందించారు. అలాగే తన బ్యాగును గుర్తించి డిపోకు తెచ్చిన ఇచ్చినందుకు సత్యనారాయణరెడ్డి కూడా వారికి ధన్యవాదాలు తెలిపారు.

మరోవైపు శ్రీకాకుళం జిల్లాలో కూడా మరో ఆటో డ్రైవర్ నిజాయితీ చాటుకున్నారు. మెళియాపుట్టి మండలంలోని వసుంధర గ్రామానికి చెందిన రవిశంకరరావు సీఆర్‌పీఎఫ్‌ జవాన్‌గా కోల్‌కత్తాలో విధులు నిర్వహిస్తున్నారు. గురువారం కుటుంబంతో కలిసి బొప్పాయిపురం దగ్గర ఆటో ఎక్కి టెక్కలి ఇందిరాగాంధీ కూడలి దగ్గర దిగారు. ఆటోలో ఎనిమిది తులాలు బంగారం కలిగిన బ్యాగును మర్చిపోయి దిగిపోయారు.

ఈ బ్యాగును గార మండలంలోని వేణుగోపాలపురానికి చెందిన ఆటో డ్రైవర్‌ జోగి కృష్ణ గుర్తించారు. ఈలోపు విషయం తెలుసు కున్న బాధితులు టెక్కలి పోలీస్‌ స్టేషన్‌‌లో ఫిర్యాదు చేశారు. ఈ క్రమంలో ఆటో డ్రైవర్‌ నిజా యితీగా ప్రయాణికుడు తన ఆటోలో మరిచిపోయిన బ్యాగుతో స్టేషన్‌కు వచ్చారు. ఎస్‌ఐ సమక్షంలో బంగారు ఆభరణాలను ప్రయాణికుడికి అప్పగించారు. ఆటో డ్రైవర్‌ నిజాయితీకి పోలీసులతో పాటు పలువురు స్థానికులు అభినందించారు.