గుండెపోటుతో తెలుగు క్రికెటర్ ఈశ్వర్ దుర్మరణం,,,,సంతాపం ప్రకటించిన క్రికెట్ ప్లేయర్స్

విశాఖకు చెందిన తెలుగు క్రికెట్ మరణం తీవ్ర విషాదాన్ని నింపింది. జీవీఎంసీ 68వ వార్డు గుడివాడ అప్పన్నకాలనీకి చెందిన క్రికెటర్‌ సోముదల ఈశ్వర్‌ గుండెపోటుతో కన్నుమూశారు. ఆగస్టు 28న చనిపోగా.. ఆలస్యంగా ఈ విషయం తెలిసింది.. ఆయనకు వివాహం కాలేదు. ఇటీవల ఏపీఎల్‌ సీజన్‌ ముగియడంతో అప్పన్నకాలనీలోని తన ఇంటికి వచ్చారు. ఈ నెల 28న స్నేహితులతో బయటకు వెళ్లి తిరిగి రాత్రి 8 గంటల సమయంలో ఇంటికి వచ్చాడు. బైక్‌ దిగి స్టాండ్‌ వేస్తుండగా ఒక్కసారిగా కుప్పకూలిపోయాడు.. ఆస్పత్రికి తరలించే లోపు కన్నుమూశాడని తల్లి రాములమ్మ బోరున విలపించారు. ఈ వార్త విన్న టీమిండియా టెస్ట్ క్రికెటర్ శ్రీకర్ భరత్ ఈశ్వర్‌ ఇంటికి చేరుకుని ఆయన పార్థివదేహానికి నివాళులర్పించారు.

ఈశ్వర్ మరణంతో క్రికెట్‌ అభిమానులు విషాదంలో ఉన్నారు. ఈశ్వర్ మృతిపట్ల పలువురు క్రికెటర్లు ట్విట్టర్‌లో సంతాపం తెలిపారు. రికీ పాంటింగ్, డేవిడ్ వార్నర్, వీరేంద్ర సెహ్వాగ్, సౌరవ్ గంగూలీ, సచిన్ టెండూల్కర్, విరాట్ కోహ్లీ, దినేష్ కార్తీక్ వంటి క్రికెటర్లు ఈశ్వర్‌ మృతి పట్ల సంతాపం తెలియజేశారు.విశాఖలో డివిజన్‌ క్రికెట్‌ ఆడుతూనే ఈశ్వర్‌ అంచెలంచెలుగా ఎదిగాడు.. ఏసీఏకు సాయంగా ఉంటున్నాడు. ఈశ్వర్ ఎడమ చేతి వాటం బౌలర్‌ కాగా.. ఐపీఎల్‌లో ఢిల్లీ క్యాపిటల్‌ బ్యాటర్లకు నెట్స్‌లో బంతులు విసిరేందుకు సహాయకుడి (సైడ్ ఆర్మ్ త్రో బౌలర్‌గా)గా ఉన్నారు.

ఈశ్వర్ 10వ తరగతి వరకు చదివి.. 16వ ఏటనే క్రికెట్‌‌లోకి ఎంట్రీ ఇచ్చాడు. క్రికెటర్‌ వేణుగోపాలరావు, ఈశ్వర్‌ ఇద్దరూ రంజీ సెలక్షన్‌కు వెళ్లారు. వేణుగోపాల్‌ రంజీకి ఎంపిక కాగా.. ఈశ్వర్‌కు నిరాశ తప్పలేదు. అయినా సరే క్రికెట్‌ను మాత్రం వదల్లేదు.. వేణుగోపాల్‌‌రావు కూడా తనతో పాటు పలు మ్యాచ్‌లకు తీసుకువెళ్లేవాడు. భారత మాజీ ఆటగాడు వేణుగోపాలరావు ప్రోత్సాహంతో స్టార్ క్రికెటర్లకు ఈశ్వర్‌ దగ్గరయ్యాడు. ఈశ్వర్‌ ఫాస్ట్‌ బౌలర్‌ కాగా.. ఆయన బౌలింగ్‌ అంటే భారత క్రికెటర్లకు ఎంతో ఇష్టం అని చెబుతుంటారు. అందుకే స్టార్‌ క్రికెటర్లు ఆయనతో బౌలింగ్‌ వేయించుకుని నెట్‌ ప్రాక్టీస్‌ చేసేవారట. దీంతో ఈశ్వర్‌కు ఎక్కువగా భారత క్రికెట్‌ క్యాంపుల్లో అవకాశం దక్కింది. సచిన్ టెండూల్కర్‌, సౌరవ్‌ గంగూలీ, వీరేంద్ర సెహ్వాగ్‌, విరాట్‌ కోహ్లీ, దినేష్‌ కార్తీక్‌, రికీ పాటింగ్‌, డేవిడ్‌ వార్నర్‌‌తో పాటూ మరికొంతమంది క్రికెటర్లకు అభిమానిగా మారాడు. ఇలా దగ్గరైన ఈశ్వర్‌ వారికి ఐపీఎల్‌లో ప్రాక్టీస్‌ చేస్తున్నప్పుడు బౌలింగ్‌ చేసేవాడు. అప్పుడప్పుడు టీమిండియా క్రికెటర్లతో సరదాగా గడిపేవాడు.. ఆ ఫోటోలు ఇప్పుడు వైరల్ అవుతున్నాయి.