తాడిపత్రిలో భారీ వర్షపాతం,,,పొంగిపొర్లుతున్న వాగులు, వంకలు
Andhra Pradesh Telugu | Suryaa Desk | Published : Mon, Sep 04, 2023, 06:32 PM
తెలుగు రాష్ట్రాల్లో వర్షాలు మళ్లీ ఊపందుకున్నాయి. జులైలో భారీ వర్షాల తర్వాత ఆగస్టులో వర్షాభావం నెలకొనగా.. ఈశాన్య బంగాళాఖాతంలో ఆవర్తనం ప్రభావంతో సెప్టెంబర్లో భారీ వర్షాలు కురుస్తున్నాయి. కర్నూలు, అనంతపురం, నెల్లూరు జిల్లాల్లోనూ వర్షాలు కురుస్తున్నాయి. అనంతపురం జిల్లా తాడిపత్రి ప్రాంతంలో భారీ వర్షపాతం నమోదైంది. ఈ సీజన్లో తొలిసారిగా పుట్లూరు మండలంలో 111.6 మి.మీ. భారీ వర్షపాతం నమోదైంది. శనివారం రాత్రి నుంచి ఆదివారం ఉదయం వర్షం దంచికొట్టింది. పుట్లూరు మండలం ఎస్ తిమ్మాపురం వద్ద వంక ఉధృతంగా ప్రవహిస్తుండటంతో.. ఎస్ తిమ్మాపురం గ్రామం జలదిగ్బంధంలో చిక్కుకుంది. రాకపోకలు నిలిచిపోవడంతో గ్రామస్థులు అవస్థలు పడుతున్నారు. జిల్లాలోని 17 మండలాల పరిధిలో 14.5. మి.మీ. సగటు వర్షపాతం నమోదైంది. ఆత్మకూరు మండలంలో 71.6 మి.మీ. వర్షం కురవగా.. యల్లనూరులో 63.2 మి.మీ వర్షం కురిసింది. తాడిపత్రిలో 55.4 మి.మీ. వర్షపాతం నమోదైంది. అనంతపురం జిల్లాలో ఆదివారం సాయంత్రం నుంచి అర్ధరాత్రి వరకు వర్షం కురిసింది. దీంతో జిల్లాలోని వాగులు, వంకలు పొంగి ప్రవహిస్తున్నాయి.
|
|