మరమ్మత్తు పనులు,,,సెప్టెంబరు 10 వరకూ జన్మభూమి ఎక్స్‌ప్రెస్,,,విశాఖ-విజయవాడ రత్నాచల్ ఎక్స్‌ప్రెస్ రద్దు

అనకాపల్లి, తాడి స్టేషన్ల మధ్య డీప్ స్క్రీనింగ్ పనుల కారణంగా సెప్టెంబరు 10 వరకు దక్షిణ మధ్య రైల్వే పలు రైళ్లను రద్దు చేసింది. మరికొన్ని రైళ్లను పాక్షికంగా రద్దు చేసినట్లు దక్షిణ మధ్య రైల్వే అధికారులు ప్రకటించారు. విశాఖ-లింగంపల్లి మధ్య నడిచే జన్మభూమి ఎక్స్ ప్రెస్.. విజయవాడ-విశాఖ మధ్య నడిచే రత్నాచల్ ఎక్స్ ప్రెస్, గుంటూరు-రాయగడ, విశాఖపట్నం-మచిలీపట్నం మధ్య నడిచే రైళ్లను ఈ నెల 10 వరకూ రద్దు చేసినట్లు తెలిపారు. అలాగే, విశాఖ-తిరుపతి మధ్య నడిచే డబుల్ డెక్కర్ రైలును కూడా విశాఖ-సామర్లకోట మధ్య పాక్షికంగా రద్దు చేసినట్లు పేర్కొన్నారు.

ఆయా తేదీల్లో ఈ రైళ్లలో టికెట్లను బుక్ చేసుకున్న ప్రయాణికులకు నగదు రీఫండ్ అవుతుందని చెప్పారు. మూడు నెలల కిందట ఒడిశాలోని బాలసోర్ వద్ద కోరమాండల్ ఎక్స్‌ప్రెస్ ప్రమాదంలో దాదాపుగా 300 మంది ప్రయాణికులు మృతిచెందిన విషయం తెలిసిందే. సిగ్నలింగ్ వ్యవస్థ లోపం వల్లే ఈ ప్రమాదం జరిగినట్టు దర్యాప్తులో నిర్దారణ అయ్యింది. ఈ నేపథ్యంలో మళ్లీ అటువంటి దుర్ఘటన జరగకూడదనే ఉద్దేశంతో దేశవ్యాప్తంగా సిగ్నలింగ్ వ్యవస్థను రైల్వే అప్ గ్రేడ్ చేస్తోంది. ఇందులో భాగంగా పనులు చేపట్టగా.. రైళ్ల రాకపోకలకు అంతరాయం కలుగుతోంది.

కొన్ని రైళ్లను రద్దుచేయడంతోపాటు మరికొన్నింటిని పాక్షికంగా రద్దు చేస్తున్నారు. దక్షిణ మధ్య రైల్వే జోన్ పరిధిలోని విజయవాడ, గుంటూరు, సికింద్రాబాద్, హైదరాబాద్ డివిజన్ల పరిధిలో పనులు ముమ్మరంగా జరుగుతున్నాయి. హైదరాబాద్‌, సికింద్రాబాద్‌ రైల్వే డివిజన్లలో మరమ్మతు పనుల కారణంగా ట్రైన్లు రద్దు చేశారు. సెప్టెంబర్ 4 నుంచి ఈనెల 10 వరకు పలు ట్రైన్లను పూర్తిగా, మరికొన్ని ట్రైన్లు పాక్షికంగా రద్దు చేసినట్లు సౌత్ సెంట్రల్ రైల్వే అధికారులు స్పష్టం చేశారు. ఇదే సమయంలో అనకాపల్లి-తాడి రైల్వే స్టేషన్ల మధ్య బాలాసోర్ ప్రమాదం తర్వాత గూడ్స్ రైలు పట్టాలు తప్పింది. బొగ్గుతో వెళుతున్న గూడ్స్‌ రైలు ఐదు బోగీలు పట్టాలు తప్పడంతో ట్రాక్ తీవ్రంగా దెబ్బతింది. దీని ప్రభావంతో విశాఖ- విజయ వాడ మార్గంలో రైళ్ల రాకపోకలను నిలిపివేశారు.