ఏపీలోని ఈ జిల్లాల్లో అతి భారీ వర్షాలు, ప్రజలు అప్రమత్తంగా ఉండాలి

ఏపీలో వర్షాలు కురుస్తున్నాయి. బంగాళాఖాతంలో దక్షిణ ఒడిశా, ఉత్తరాంధ్ర మధ్య సముద్రంలో మంగళవారం ఉదయం అల్పపీడనం ఏర్పడిందని వాతావరణశాఖ తెలిపింది. రాబోయే 24 గంటల్లో దక్షిణ ఒడిశా, దక్షిణ ఛత్తీస్‌గఢ్‌ మీదుగా ప్రయాణించే అవకాశం ఉందన్నారు. మరోవైపు వాయువ్య బంగాళాఖాతం నుంచి తెలంగాణ వరకూ ఒక ద్రోణి కొనసాగుతుందని తెలిపింది. రానున్న 24 గంటల్లో కోస్తా, రాయలసీమల్లో అనేకచోట్ల వర్షాలు, అక్కడక్కడా భారీవర్షాలు కురుస్తాయని వాతావరణ శాఖ అంచనా వేసింది. అల్పపీడనం ప్రభావంతో కోస్తాలో తీరం వెంబడి బలమైన గాలులు వీస్తున్నందున మత్స్యకారులు సముద్రంలో చేపల వేటకు వెళ్లరాదని సూచించారు.

అల్పపీడనం ప్రభావంతో బుధవారం గుంటూరు, కృష్ణా, ఏలూరు, ఎన్టీఆర్‌లో అతి భారీ వర్షాలు పడతాయని అంచనా వేస్తున్నారు. అల్లూరి సీతారామరాజు, అనకాపల్లి, బాపట్ల, తూర్పుగోదావరి, పల్నాడు, ప్రకాశం, పశ్చిమ గోదావరి, కర్నూలు, నంద్యాల జిల్లాల్లో భారీగా వానలు కురుస్తాయంటున్నారు. విజయనగరం జిల్లా బొబ్బిలిలో 92.6, అనకాపల్లి జిల్లా చోడవరంలో 88.8, పార్వతీపురం మన్యం జిల్లా బాలాజీపేటలో 88.2, పార్వతీపురంలో 78.4, విజయనగరం జిల్లా తెర్లాంలో 76.8, ప్రకాశం జిల్లా రాచర్లలో 55.4, పార్వతీపురం మన్యం జిల్లాలో 48.4, కాకినాడ జిల్లా 44.6, అల్లూరి సీతారామరాజు జిల్లా చింతపల్లిలో 38.2, బాపట్ల జిల్లా కారంచేడులో 37.4, కర్నూలు జిల్లా హోలిగుండలో 37.4, శ్రీ సత్యసాయి జిల్లా రామగిరిలో 34.2, నంద్యాల జిల్లా ఆత్మకూరులో 33.4, అల్లూరి సీతారామరాజు జిల్లా చింతూరులో 33.8, పాడేరులో 32.6 వర్షపాతం నమోదైంది.

అల్పపీడన ప్రభావంతో రాష్ట్రంలో మంగళవారం పలు చోట్ల భారీవర్షాలు కురిశాయి. విజయనగరం, అల్లూరి సీతారామరాజు, పార్వతీపురం మన్యం, కాకినాడ జిల్లాల్లో వానలు పడ్డాయి. సోమవారం ఉదయం నుంచి మంగళవారం ఉదయం వరకు అత్యధికంగా విజయనగరం జిల్లా బాదంగి మండలంలో 139 మి.మీ.వర్షపాతం నమోదైంది. ఈ భారీ వర్షాలకు లోతట్టు ప్రాంతాలు జలమయం అయ్యాయి.. వాగులు, వంకలు పొంగిపొర్లుతున్నాయి. కోస్తా రాయలసీమ జిల్లాల్లో కొన్ని చోట్ల పిడుగులు పడే అవకాశం ఉందని విశాఖ తుఫాను హెచ్చరికల కేంద్రం అంచనా వేస్తోంది. అంతేకాదు దక్షిణ కోస్తా తీరం వెంబడి గంటకు 45 నుంచి 55 కిలోమీటర్ల వేగంతో ఈదురు గాలులు ఇస్తాయని అంచనా వేస్తున్నారు. నాలుగు రోజులపాటు సముద్రంలో మత్స్యకారులు వేటకు వెళ్లొద్దని హెచ్చరించారు. మరికొన్నిచోట్ల ఒక్కసారిగా ఉరుములు మెరుపులతో కూడిన వర్షాలు కూడా పడే ఆస్కారం ఉంది. పిడుగులు పడే అవకాశం ఉండటంతో రైతులు, ప్రజలు అప్రమత్తంగా ఉండాలని సూచిస్తున్నారు అధికారులు.