వైసీపీ నేతలు యుద్ధం కోరుకుంటున్నారు,,, పవన్ కల్యాణ్

చంద్రబాబునాయుడికి జనసేన అధినేత పవన్ కల్యాణ్.. మద్దతు ప్రకటించారు. ఏసీబీ కోర్టు 14 రోజుల రిమాండ్ విధించిన నేపథ్యంలో స్పందించిన జనసేనాని.. తనకు కష్టకాలంలో చంద్రబాబు అండగా నిలిచారని గుర్తు చేసుకున్నారు. ఈ సందర్భంగా ముఖ్యమంత్రి జగన్‌మోహన్ రెడ్డిపై తీవ్ర విమర్శలు గుప్పించారు. రెండేళ్లు జైలుకు వెళ్లి వచ్చిన వ్యక్తి అని పేర్కొన్నారు. దేశంలోనే రిచెస్ట్ సీఎం అని పేర్కొన్న పవన్ కల్యాణ్.. హఠాత్తుగా భారీగా అక్రమంగా ఆస్తులు కూడబెట్టి.. రాజ్యాధికారం దక్కించుకున్నారని తీవ్ర స్థాయిలో మండిపడ్డారు. వైసీపీ ప్రభుత్వాన్ని విమర్శించే, ప్రశ్నించే వారిని అణిచివేయడమే లక్ష్యంగా పెట్టుకున్నారని ధ్వజమెత్తారు. ఈ క్రమంలోనే ప్రతీ ఒక్కరిని నేరగాళ్లుగా చిత్రీకరించే ప్రయత్నం చేస్తున్నారని ఆరోపించారు. ఇందులో భాగంగానే వైసీపీ నాయకులు యుద్ధాన్ని కోరుకుంటున్నారని పవన్ ఆక్షేపించారు.

విశాఖలో గొడవ జరిగిన సమయంలో చంద్రబాబు తనకు మద్దతు తెలిపిన విషయాన్ని ఈ సందర్భంగా పవన్ కల్యాణ్ గుర్తు చేసుకున్నారు. మంగళగిరిలోని పార్టీ కార్యాలయంలో ఏర్పాటు చేసిన సమావేశంలో మాట్లాడిన పవన్.. చంద్రబాబును అరెస్టు చేసినపుడు తన మద్దతు ఉంటుందని స్పష్టంగా చెప్పానని.. ఇప్పుడు రిమాండ్‌ విధించడంతో తన మద్దతు, అండ చంద్రబాబుకు కొనసాగిస్తానని తేల్చి చెప్పారు. తన కోసం నిలబడిన వ్యక్తి ఇవాళ జైలుకు వెళ్తుంటే.. తిరిగి మద్దతు ఇవ్వడం తన బాధ్యత అన్న పవన్ కల్యాణ్.. అదే సంస్కారమని తెలిపారు. చంద్రబాబును అరెస్ట్ చేసినపుడు తాను పార్టీ కార్యక్రమం కోసం విజయవాడ వెళ్తుంటే చంద్రబాబును కలిసేందుకు వెళ్తున్నట్లు వైసీపీ నేతలే ప్రచారణ చేశారని పవన్ కల్యాణ్ ఆగ్రహం వ్యక్తం చేశారు. ఆ నెపంతో ఆంధ్రప్రదేశ్‌లో లా అండ్ ఆర్డర్ సమస్యలను సృష్టించారని మండిపడ్డారు. రాష్ట్ర ప్రజలు మేల్కొవాల్సిన సమయం ఆసన్నమైందని.. వైసీపీ నేతల ఆగడాలని తిప్పి కొట్టాలని పిలుపునిచ్చారు.

ఈ సందర్భంగా పవన్ కల్యాణ్ మరిన్ని సంచలన వ్యాఖ్యలు చేశారు. రాజకీయాలు ప్రశాంతంగా ఉంటాయని ఎప్పుడూ అనుకోవద్దని.. కోనసీమ జిల్లాల్లో తాను చేసిన వారాహి యాత్రపై దాడి చేసేందుకు నేరగాళ్లను దించారని తెలిపారు. 2 వేల మంది క్రిమినల్స్‌ను రప్పించి కోనసీమ జిల్లాల్లో 50 మందిని చంపేయాలని పథకం పన్నినట్లు తనకు తెలిసిందన్నారు. అయితే ఈ విషయం ఇంటలిజెన్స్ ద్వారా పసిగట్టిన కేంద్రంలోని పెద్దలు.. వైసీపీ దాష్టాకాన్ని అడ్డుకున్నట్లు చెప్పారు. ప్రభుత్వం చేస్తున్న అరాచకాలను ప్రశ్నించే వారిపై హత్యకేసులు నమోదు చేసి వేధిస్తున్నారని తీవ్ర ఆవేదన వ్యక్తం చేశారు. తణుకు, భీమవరంలో వారాహి యాత్రపై దాడి చేసేందుకు ప్రయత్నించారని పేర్కొన్నారు. చట్టాలు సరిగా పనిచేస్తే బెయిల్‌పై వచ్చిన వాళ్లు ముఖ్యమంత్రులు కాలేరని తెలిపారు.