దక్షిణాది రాష్ట్రాలకు నిఫా వైరస్ ముప్పు,,,1080 మంది ప్రైమరీ కాంటాక్ట్‌లు గుర్తింపు

కేరళలో నిఫా వైరస్‌ కేసుల సంఖ్య క్రమంగా పెరుగుతోంది. ఇప్పటి వరకూ ఆరుగురికి ఈ వైరస్ సోకగా.. ఇద్దరు ప్రాణాలు కోల్పోయారు. ప్రస్తుతం నాలుగు యాక్టివ్ కేసులు ఉన్నాయి. గురువారం కోజికోడ్‌ జిల్లాలో చెరువన్నూర్‌కు చెందిన 39 ఏళ్ల వ్యక్తికి నిర్దారణ కాగా.. ఆగస్టు 30న నిఫా వైరస్‌తో చనిపోయిన వ్యక్తికి అతడు సన్నిహితంగా ఉన్నట్టు గుర్తించారు. ప్రస్తుతం ఆస్పత్రిలో చికిత్స పొందుతున్న బాధితుడి ఆరోగ్య పరిస్థితి నిలకడగా ఉంది. వైరస్ నిర్దారణ అయిన బాధితుల కాంటాక్ట్ జాబితా 1080కి చేరింది. బాధితులతో కాంటాక్ట్ అయిన మరో 130 మందిని శుక్రవారం గుర్తించారు. వీరిలో 294 మంది హైరిస్క్ కేటగిరీలో ఉన్నట్టు కేరళ ఆరోగ్య మంత్రి వీణా జార్జ్ తెలిపారు. వీరిలో 122 మంది ఆరోగ్య సిబ్బంది ఉన్నారు.

వైరస్ వ్యాప్తి నేపథ్యంలో సెప్టెంబరు 24 వరకూ కోజికోడ్ జిల్లాల్లోని అన్ని విద్యాసంస్థలకు సెలవు ప్రకటించారు. పాఠశాలలు, ప్రొఫెషనల్ కళాశాలలు, ట్యూషన్ సెంటర్ల సహా అన్నీ మూసివేయాలని అధికారులు ఆదేశాలు జారీచేశారు. వారం మొత్తం ఆన్‌లైన్ తరగతులు నిర్వహించాలని పేర్కొన్నారు. శుక్రవారం 15 మంది ఆరోగ్య కార్యకర్తల సహా 30 మంది నమూనాలను పరీక్షించగా.. అన్ని ఫలితాలు నెగెటివ్‌గా వచ్చాయి. కాగా, ఆగస్టు 30న చనిపోయిన వ్యక్తితో కాంటాక్ట్ అయిన ఇతర జిల్లాలకు చెందిన మరో 29 మందిని గుర్తించారు. వీరిలో 22 మంది మలప్పురం, కన్నూరు, త్రిసూర్‌లో ముగ్గురు, వాయనాడ్‌లో ఒక్కరు చొప్పున ఉన్నారు.

వైరస్‌ నియంత్రణకు టెస్టింగ్ పెంపు ద్వారా అన్ని చర్యలు తీసుకొంటున్నామని వీణా జార్జ్‌ తెలిపారు. కేరళ మొత్తం ఇలాంటి ఇన్ఫెక్షన్లకు గురయ్యే అవకాశం ఉందని ప్రపంచ ఆరోగ్యసంస్థ, ఐసీఎంఆర్‌ అధ్యయనాల్లో వెల్లడైందని ఆమె చెప్పారు. మరోవైపు, కోవిడ్‌-19తో పోల్చితే నిఫా వైరస్‌ అత్యంత ప్రమాదకరమైనదని భారతీయ వైద్య పరిశోధన మండలి (ఐసీఎంఆర్‌) హెచ్చరించింది. కరోనా కేసుల్లో మరణాలు 2- 3 శాతం మాత్రమే ఉంటే... నిఫాలో మాత్రం 40-70 శాతం ఉంటాయని పేర్కొంది. కేరళలో నిఫా వైరస్ కేసులు పెరుగుదలకు కారణాలు తెలియవని, నిఫా వ్యాప్తిని అడ్డుకునేందుకు తగిన చర్యలు తీసుకుంటున్నామని ఐసీఎంఆర్‌ డైరెక్టర్‌ జనరల్‌ డాక్టర్‌ రాజీవ్‌ బహల్‌ శుక్రవారం తెలిపారు.

‘ఐసీఎంఆర్‌ వద్ద ప్రస్తుతం 10 మంది బాధితులకు సరిపడా మోనోక్లీనల్‌ యాంటీబాడీ ఔషధం ఉంది.. మరో 20 డోసులను ఆస్ట్రేలియా నుంచి కొనుగోలు చేస్తాం.. ఇప్పటి వరకు నిఫా వైరస్‌ రోగుల్లో ఒక్కరికి కూడా మోనోక్లీనల్‌ యాంటీబాడీ ఔషధం ఇవ్వలేదు.. ఇన్ఫెక్షను ప్రారంభ దశలో ఉన్నపుడే దీనిని వినియోగించాలి.. నిఫా వైరస్‌ గబ్బిలాల నుంచి మనుషులకు వ్యాపించినట్లు 2018లో వెల్లడైంది. కానీ, ఈ వ్యాధి గబ్బిలాల నుంచి ఎలా వ్యాప్తి చెందుతుందో కచ్చితంగా చెప్పలేం’’ అని చెప్పారు. ఇప్పటివరకు పలు దేశాల్లోని 14 మంది నిఫా రోగులకు మోనోక్లోనల్‌ యాంటీబాడీ ఔషధాలను ఇచ్చారని.. వారంతా పూర్తిగా కోలుకున్నారని ఆయన తెలిపారు.