'చంద్రుడు జైల్లో హ్యాపీగా ఉన్నారు'.. చంద్రబాబు అరెస్టుపై ఓవైసీ

టీడీడీ అధినేత, మాజీ సీఎం చంద్రబాబు అరెస్టుపై ఎంఐఎం అధ్యక్షుడు, హైదరాబాద్ ఎంపీ అసదుద్దీన్ ఓవైసీ స్పందించారు. చంద్రబాబు జైల్లో హ్యాపీగా ఉన్నారని అన్నారు. తెలుగు రాష్ట్రాల మజ్లిస్‌ కార్యకర్తలతో హైదరాబాద్‌లోని పార్టీ కార్యాలయంలో సమావేశమైన ఆయన ఈ కామెంట్స్ చేశారు. చంద్రబాబు ఎందుకు జైలుకు వెళ్లాలో మీ అందరికీ తెలుసునని అన్నారు. ప్రస్తుతం ఆంధ్రప్రదేశ్‌లో రెండే పార్టీలు ఉన్నాయని.. సీఎం జగన్ మంచి పాలన అందిస్తున్నారని చెప్పారు. చంద్రబాబును ఎప్పటికీ నమ్మలేమని.. ప్రజలు కూడా ఆయన్ని ఎప్పుడూ నమ్మొద్దని సూచించారు. వచ్చే ఎన్నికల్లో ఏపీలో పోటీ విషయంపైనా అసదుద్దీన్‌ స్పందించారు. ఏపీలో కూడా పోటీ చేసే యోచనలో ఉన్నట్లు కార్యకర్తలతో వెల్లడించారు. ఆంధ్రప్రదేశ్‌లో మనం పనిచేయాల్సిన అవసరం ఉందని కార్యకర్తలను ఉద్దేశించి మాట్లాడారు.

స్కిల్‌ డెవలప్‌మెంట్ కేసులో చంద్రబాబు దాఖలు చేసిన స్పెషల్‌ లీవ్‌ పిటిషన్‌ రేపు (సెప్టెంబర్ 27న) సుప్రీంకోర్టులో విచారణకు రానుంది. చంద్రబాబు తరఫు న్యాయవాదులు దాఖలు చేసిన మెన్షన్‌ మెమోపై నిర్ణయం తీసుకున్న సీజేఐ.. రేపు విచారణ చేపట్టేందుకు అంగీకరించారు. అవినీతి నిరోధక చట్టంలోని సెక్షన్‌ 17ఎ కింద గవర్నర్‌ నుంచి ముందస్తు అనుమతి తీసుకోకుండా స్కిల్‌ డెవలప్‌మెంట్‌ కేసులో తనపై నమోదు చేసిన కేసును కొట్టేయాలని కోరుతూ చంద్రబాబు సుప్రీం కోర్టును ఆశ్రయించారు. ఇక స్కిల్ కేసులో చంద్రబాబుకు ఏసీబీ కోర్డు రిమాండ్ విధించగా.. ప్రస్తుతం ఆయన రాజమండ్రి సెంట్రల్ జైల్‌లో ఉన్నారు. ఈనెల 24న రిమాండ్ గడువు ముగియగా.. అక్టోబర్ 5 వరకు రిమాండ్ పొడిగిస్తూ ఆదేశాలు ఇచ్చారు.