లోకేష్‌ను అరెస్ట్ చేయొద్దు.. సీఐడీకీ ఏపీ హైకోర్టు ఆదేశం

ఆంధ్రప్రదేశ్‌లో ఓవైపు.. ప్రతిపక్ష నేత, టీడీపీ జాతీయ అధ్యక్షుడు చంద్రబాబు నాయుడు.. స్కిల్ డెవలప్‌మెంట్ స్కాం కేసులు అరెస్టయి జైలులో ఉండగా.. ఇప్పుడు ఆయన కుమారుడు, టీడీపీ జాతీయ కార్యదర్శి లోకేష్ అరెస్టుకు సీఐడీ అధికారులు రంగం సిద్ధం చేసుకుంటున్నారు. ఈ క్రమంలోనే.. లోకేష్ ముందస్తు బెయిల్‌కు దరఖాస్తు చేసుకున్నారు. అటు స్కిల్ డెవలప్ మెంట్ కేసుతో పాటు, ఇన్నర్ రింగ్ రోడ్డు, ఫైబర్ గ్రిడ్ స్కాంలలోనూ.. లోకేష్ పాత్ర ఉందని ఆరోపిస్తోన్న సీఐడీ.. ఆయనను అరెస్ట్ చేసేందుకు చూస్తున్నట్టు వార్తలు వస్తున్న క్రమంలో.. ఆయన హైకోర్టును ఆశ్రయించారు. అయితే.. ఇన్నర్ రింగ్ రోడ్డు స్కాం కేసులో చుక్కెదురు కాగా.. స్కిల్ డెవలప్ మెంట్ కేసులో మాత్రం ఊరట లభించింది.

హైకోర్టులో స్కిల్ డెవలప్‌మెంట్ కేసు, ఫైబర్ గ్రిడ్ కేసుల్లో తనకు ముందస్తు బెయిల్ ఇవ్వాలని లోకేష్ పిటిషన్ వేయగా.. దానిపై హైకోర్టు విచారణ జరిపింది. ఇరువైపులా వాదనలు విన్న న్యాయస్థానం.. అక్టోబర్ 4 వరకు లోకేశ్‌ను అరెస్ట్ చేయవద్దని సీఐడీ పోలీసులను హైకోర్టు ఆదేశించింది. విచారణను వచ్చే బుధవారానికి వాయిదా వేసింది. దీంతో.. లోకేష్‌కు కొంత ఊరట లభించినట్టయింది. ఇదిలా ఉంటే.. ఇన్నర్ రింగు రోడ్డు కేసులో మాత్రం.. లోకేష్‌కు 41ఏ కింద నోటీసులు ఇవ్వాలని ఉన్నత న్యాయస్థానం ఆదేశించింది. సీఐడీ విచారణకు సహకరించాలని లోకేష్‌కు హైకోర్టు సూచించింది. అరెస్టు గురించి ఎలాంటి ఆందోళన లేని నేపథ్యంలో.. విచారణ ముగిస్తున్నట్లుగా ధర్మాసనం తెలిపింది. లోకేష్ దాఖలు చేసిన ముందస్తు బెయిల్ పిటిషన్‌ను ఉన్నత న్యాయస్థానం డిస్పోజ్ చేసింది. న్యాయస్థానం ఆదేశాల మేరకు.. ఢిల్లీలో లోకేష్‌కు సీఐడీ నోటీసులు అందజేయనుంది.