ఇతనెంత గొప్ప టీడీపీ ఆర్టిస్టో.. దర్శకుడు రవిబాబుకు వైసీపీ కౌంటర్

మాజీ ముఖ్యమంత్రి చంద్రబాబు అరెస్ట్‌పై దర్శకుడు రవిబాబు స్పందించిన సంగతి తెలిసిందే. ఎటువంటి ఆధారం లేకుండా, అక్రమ కేసులు పెట్టి, చంద్రబాబును 73 ఏళ్ల వయసులో జైల్లో పెట్టి అలా ఎందుకు హింసిస్తున్నారో అర్ధం కావటం లేదన్నారు. అయితే రవిబాబు వ్యాఖ్యలకు వైఎస్సార్‌సీపీ కౌంటర్ ఇచ్చింది.. ట్విట్టర్ వేదికగా ఆయనకు కొన్ని ప్రశ్నల్ని సంధించింది. 'గోదావరి పుష్కరాలప్పుడు రాజమండ్రిలో అమాయకులు చనిపోయినప్పుడు, రెవెన్యూ అధికారిణి వనజాక్షిపై అన్యాయంగా దాడి చేసినప్పుడు, కందుకూరు, గుంటూరుల్లో చంద్రబాబు సమావేశాలకు హాజరైన అభాగ్యులు ప్రాణాలు కోల్పోయినప్పుడు స్పందించని ఈ రవిబాబు అవినీతి చేసినందుకు చంద్రబాబును అరెస్ట్ చేస్తే దానిపై స్పందిస్తున్నాడు. ఇతనెంత గొప్ప టీడీపీ ఆర్టిస్టో అర్థమవుతోంది. ఇలాంటి ఆర్టిస్టులని ఎంత మందిని తీసుకొచ్చిన మీ చంద్రబాబు చేసిన స్కిల్ స్కామ్ ఆర్ట్ ని తుడిచివేయలేరు'అంటూ ట్వీట్ చేశారు.

చంద్రబాబు అరెస్ట్‌ను ఖండిస్తూ రవిబాబు వీడియో విడుదల చేశాడు. ఎన్టీఆర్‌ కుటుంబం, చంద్రబాబు కుటుంబం.. తమ కుటుంబానికి అత్యంత ఆప్తులన్నారు. జీవితంలో ఏదీ శాశ్వతం కాదని.. సినిమా వాళ్ల గ్లామర్, రాజకీయ నేతల అధికారం అస్సలు శాశ్వతం కాదన్నారు.చంద్రబాబు నాయుడుకు వచ్చిన కష్టాలు శాశ్వతం కాదన్నారు. చంద్రబాబు ఏదైనా పని అనుకుంటే అన్ని కోణాల్లో ఆలోచించి.. అందరినీ సంప్రదించి ఎవరికీ ఇబ్బందులు లేకుండా నిర్ణయాలు తీసుకుంటారన్నారు. ఒకవేళ ఇవాళే చివరి రోజని తెలిసినా.. వచ్చే 50 ఏళ్లు సామాజిక అభివృద్ధికి ప్రణాళికలు వేస్తారన్నారు. డబ్బు కోసం కక్కుర్తి పడే మనిషి కాదని.. ఇలా ఎటువంటి ఆధారం లేకుండా అక్రమ కేసులు పెట్టి చంద్రబాబును జైల్లో పెట్టి ఎందుకు హింసిస్తున్నారో అర్ధం కావటం లేదని ఆవేదన వ్యక్తం చేశారు.

రాజకీయాల్లో ఎత్తులు పైఎత్తులు సహజమేనని.. కానీ 73 ఏళ్ల వయస్సున్న వ్యక్తిని జైల్లో పెట్టి హింసించడం చాలా దారుణం అన్నారు. ఏ పవర్‌ను ఉపయోగించి చంద్రబాబును జైల్లో పెట్టారో.. అదే పవర్‌ను ఉపయోగించి విడుదల చేయాలని కోరారు. ఆయనను బయటకు తీసుకొచ్చి విచారణ చేయాలని.. దేశాన్ని వదిలి పారిపోరన్నారు. విచారణకు చంద్రబాబు కచ్చితంగా సహకరిస్తారన్నారు. చరిత్ర మిమ్మల్ని ఎలా గుర్తించుకోవాలని అనుకుంటున్నారని.. కక్షతో రగిలే కసాయి వాళ్లనా.. లేక జాలి మనసు, విలువలు ఉన్న మంచి నాయకులుగా గుర్తించాలా అని వ్యాఖ్యానించారు. ఈ వీడియోకు వైఎస్సార్‌సీపీ కౌంటరిచ్చింది. రవిబాబు మాత్రమే కాదు సినిమా ఇండస్ట్రీకి చెందిన పలువురు చంద్రబాబు అరెస్ట్‌పై స్పందించిన సంగతి తెలిసిందే.