ఇన్సూరెన్స్ పాలసీలు ఎన్ని రకాలు,,, వాటి ప్రాముఖ్యత ఏంటి

ప్రమాదాలు, అనారోగ్య సమస్యలు చెప్పి రావు. అందుకు మనమే ముందు నుంచి వాటిని ఎదుర్కొనేందుకు సిద్ధంగా ఉండాలి. తగిన ఇన్సూరెన్స్ పాలసీలతో తయారుగా ఉండాలి. అప్పుడే ఆరోగ్య పరంగా, ఆర్థికంగా ఇబ్బందుల్లో కూరుకుపోకుండా ఉండగలం. ఎలాంటి అత్యవసర పరిస్థితులు వచ్చినా రక్షణ కల్పించేందుకు అవసరాలను బట్టి జీవిత బీమా, ఆరోగ్య బీమాలతో పాటు మరికొన్ని ఇన్సూరెన్స్ పాలసీలు ఎంచుకోవాల్సి ఉంటుంది. హెల్త్, లైఫ్ ఇన్సూరెన్స్‌లతో పాటు మరో 4 ముఖ్యమైన ఇన్సూరెన్స్ పాలసీలు ఉన్నాయి. అవి మన జీవితంలో ఎదురయ్యే అనుకోని సంఘటనల్లో ఇబ్బందులో పడకుండా కాపాడతాయి. అవేంటో ఇప్పుడు మనం తెలుసుకుందాం.

హెల్త్ ఇన్సూరెన్స్: ఇంట్లో ఉన్న ప్రతి ఒక్కరు హెల్త్ ఇన్సూరెన్స్ తీసుకోవడం సరైన ఆలోచనగా చెప్తారు. కుటుంబం మొత్తానికి ఫ్యామిలీ ఫ్లోటర్ పాలసీ ఉంటే ఇంకా బెటర్. ఈ పాలసీలకు టాప్ అప్ కవర్ను యాడ్ చేయడం మంచిది. బేస్ పాలసీ కనీసం రూ. 2 నుంచి రూ. 5 లక్షలకు తీసుకుని రూ. 5 నుంచి రూ.10 లక్షల టాప్ అప్, సూపర్ టాపప్ తీసుకోవడం వల్ల చాలా వరకు ప్రీమియం ఆదా అవుతుంది.

టర్మ్ ఇన్సూరెన్స్: సంపాదించే వ్యక్తిపై కుటుంబం ఆధారపడినప్పుడు ఆ వ్యక్తి తీసుకునే జీవిత బీమా అనేది అనుకోని సంఘటన ఎదురైనప్పుడు ఆ కుటుంబాన్ని కాపాడుతుంది. టర్మ్ బీమా పాలసీలో తక్కువ ప్రీమియంతో అధిక బీమా హామీ పొందే సౌకర్యం ఉంటుంది. ఇందులో వార్షిక ఆదాయానికి కనీసం 10 నుంచి 15 రెట్లు హామీ ఉండేలా చూసుకోవాలి. కనీసం 60 ఏళ్లు వచ్చే వరకు పాలసీని కొనసాగించడం ఉత్తమం.

పర్సనల్ యాక్సిడెంటల్ ఇన్సూరెన్స్: ప్రధాన మంత్రి సురక్షా బీమా యోజన రూ.2 లక్షల వరకు ప్రమాద బీమా అందిస్తుంది. ప్రముఖ బ్యాంకుల్లో సేవింగ్స్ ఖాతా ఉన్న వారందరూ ఈ పాలసీని తీసుకోవచ్చు. ఈ పాలసీ వార్షిక ప్రీమియం కేవలం రూ. 12 మాత్రమే.

హోమ్ ఇన్సూరెన్స్: అగ్ని ప్రమాందాలు, దొంగతనం సహా ఇతర విపత్తుల నుంచి రక్షణ కోసం ఇంటికి, లోపల ఉన్న సామగ్రికి కూడా ఇన్సూరెన్స్ కవరేజీ ఉంటుంది. కొత్త ప్రామాణిక గృహ రక్షా పాలసీల్లో కొన్ని మంచి సరళీకృత ఫీచర్లు ఉన్నాయని ఇన్సూరెన్స్ వర్గాలు సూచిస్తున్నాయి.

సైబర్ ఇన్సూరెన్స్: డిజిటల్ పేమెంట్స్‌కు ప్రస్తుతం విపరీతమైన ఆదరమ పెరుగుతున్న సంగతి తెలిసిందే. ఈ క్రమంలోనే సైబర్ ఇన్సూరెన్స్ పాలసీ ఉండడం మంచిది. ముఖ్యంగా డెబిట్, క్రెడిట్ కార్డు మోసాల నుంచి రక్షణ కోసం కనీస హామితో వ్యక్తిగత సైబర్ ఇన్సూరెన్స్ కవర్‌ను ఎంచుకోవాలి.

మోటార్ ఇన్సూరెన్స్: టూ వీలర్ లేదా 4 వీలర్ ఉందంటే తప్పనిసరైన థర్డ్ పార్టీ ఇన్సూరెన్స్ తీసుకోవాల్సి ఉంటుంది. దాంతో పాటు విస్తృత కవరేజ్ కోసం సమగ్ర మోటార్ ఇన్సూరెన్స్ ఉంటే మంచిది. దీనికి అదనగా యాడ్ ఆన్‌లు జోడిస్తే వాహనానికి సంపూర్ణ రక్షణ ఉంటుంది.