తిరుమలలో కొనసాగుతున్న భక్తుల రద్దీ,,,క్యూ లైన్లను పరిశీలించిన టీటీడీ ఛైర్మన్

అలిపిరి నుంచి నడక మార్గంలో తిరుమలకు వచ్చే భక్తులకు కల్పిస్తున్న భద్రతా ఏర్పాట్లను టీటీడీ ఛైర్మన్ భూమన కరుణాకర్ రెడ్డి సోమవారం రాత్రి గాలిగోపురం దగ్గర పరిశీలించారు. భక్తులను గుంపులుగా ఏర్పాటు చేసి ముందు, వెనుక సెక్యూరిటీ సిబ్బంది వారిని నరసింహ స్వామి ఆలయం వరకు తీసుకుని వెళుతున్న విధానాన్ని గురించి అడిగి తెలుసుకున్నారు. విజిలెన్స్ , గూర్ఖా, సెక్యూరిటీ సిబ్బందితో చైర్మన్ మాట్లాడారు.. భక్తులను నిరంతరం అప్రమత్తం చేస్తూ ఉండాలని ఆదేశించారు. నడచి వెళుతున్న భక్తులతోను, అక్కడి దుకాణ దారులతోను కరుణాకర్ రెడ్డి మాట్లాడారు.

అలిపిరి నుంచి తిరుమలకు నడచి వచ్చే నడక మార్గంలో వన్య మృగాల నుంచి ఎలాంటి ముప్పు లేదని అటవీ శాఖ అధికారులు ధృవీకరిస్తేనే.. 12 ఏళ్ళ లోపు పిల్లల విషయంలో ఆంక్షలు సడలిస్తామని టీటీడీ చైర్మన్ భూమన కరుణాకర్ రెడ్డి స్పష్టం చేశారు. భక్తుల భద్రతే తమకు ముఖ్యమని ఆయన క్లారిటీ ఇచ్చారు. తిరుమలలో విపరీత మైన భక్తుల రద్దీ ఉండటంతో ఈవో, జేఈవో, సివిఎస్వో, ఆరోగ్యం ఇతర అధికారులందరూ ప్రతి క్షణం అప్రమత్తంగా ఉంటూ క్యూలైన్లు పరిశీలిస్తూ బ్రహ్మాండంగా పని చేస్తున్నారన్నారు ఛైర్మన్. తిరుమలకు భక్తులు పోటెత్తడంతో వీరు ప్రత్యక్షంగా ఏర్పాట్లు పరిశీలిస్తూ భక్తులకు చిన్న ఇబ్బంది కూడా కలక్కుండా పని చేస్తున్నారని అభినందించారు.

స్వాత్రంత్య్రం కోసం జీవితాన్ని త్యాగం చేసిన మహాత్మా గాంధీ లాంటి నాయకుల అడుగుజాడల్లో అందరూ నడవాలని టీటీడీ చీఫ్ ఆడిట్ శ్రీ శేషశైలేంద్ర కోరారు. టీటీడీ పరిపాలన భవనంలోని సమావేశ మందిరంలో సోమవారం మహాత్మా గాంధీ జయంతిని ఘనంగా నిర్వహించారు. ముందుగా గాంధీ చిత్ర పటానికి పూలమాల వేసి నివాళులు అర్పించారు. పూర్వం భారతీయ సంస్కృతిలో అన్ని వర్గాల వారికి సంపద సమానంగా దక్కే అవకాశం ఉండేదన్నారు శేషశైలేంద్ర. అలాంటి సంస్కృతిని బ్రిటిష్ వారు తీవ్రంగా ప్రభావితం చేశారని చెప్పారు. సత్యం, అహింస మార్గాల ద్వారా బ్రిటిష్ వారిని ఆత్మవిశ్వాసంతో ఎదుర్కొన్న నాయకుడు గాంధీజీ అన్నారు. వ్యవస్థలో అంతరాలను పోగొట్టేందుకు ఎంతో కృషి చేశారని చెప్పారు. ఉప్పు సత్యాగ్రహం, విదేశీ వస్తు బహిష్కరణ, విదేశీ వస్త్ర బహిష్కరణ తదితర పోరాటాల ద్వారా సామాన్యుల్లో జాతీయత భావాన్ని నింపారని తెలియజేశారు. గాంధీజీ స్ఫూర్తితో టీటీడీ ఉద్యోగులు మరింత అంకితభావంతో భక్తులకు సౌకర్యాల కల్పనే పరమావధిగా సేవలందించాలని కోరారు. విపత్కర పరిస్థితుల్లో ఉద్యోగులు స్వచ్ఛందంగా ముందుకు వచ్చి యాజమాన్యానికి అండగా నిలబడడం సంతోషకరమన్నారు. అనంతరం పలువురు అధికారులు, ఉద్యోగులు మాట్లాడుతూ గాంధీ మహాత్ముని సేవలను గుర్తుచేసుకున్నారు.