అక్టోబరు 10లోగా ఆ 40 మందిని తీసుకెళ్లండి.. కెనడాకు భారత్ మరో అల్టిమేటం

ఖలీస్థానీ ఉగ్రవాది హర్‌దీప్ సింగ్ నిజ్జర్ హత్య వెనుక భారత్ ఏజెంట్ల పాత్ర ఉందంటూ కెనడా ప్రధాని చేసిన ఆరోపణలతో ఇరు దేశాల మధ్య దౌత్య సంబంధాలు మరింత దిగజారిన విషయం తెలిసిందే. తాజాగా, కెనడాకు మరోసారి భారత్ అల్టిమేటమ్ జారీచేసింది. ఫైనాన్షియల్ టైమ్స్ నివేదిక ప్రకారం, భారత్‌లోని 40 మంది దౌత్యవేత్తలను వెనక్కి తీసుకెళ్లాలని కెనడాను భారత్ కోరింది. వాళ్లు తమ దేశానికి తిరిగి వెళ్లేందుకు అక్టోబర్ 10 వరకు గడువు విధించినట్టు విశ్వసనీయ వర్గాలు పేర్కొన్నాయి. భారత్‌లో ప్రస్తుతం 61 మంది కెనడా దౌత్యవేత్తలు ఉండగా.. వారిలో 41 మందిని వెనక్కి పిలిపించాలని సూచించింది.

నిజ్జర్ హత్యపై కెనడా ఆరోపణల నేపథ్యంలో ఇరు దేశాల మధ్య సంబంధాలు గతంలో ఎన్నడూ లేనంత దారుణంగా దెబ్బతిన్నాయి. తమ దేశంలో దౌత్య సిబ్బంది ఉనికిని తగ్గించుకోవాలని కెనడాను భారత్ గతంలో కోరింది. కెనడాలో భారత దౌత్య సిబ్బంది కంటే.. న్యూఢిల్లీలోని కెనడియన్ దౌత్య సిబ్బంది పరిమాణం ఎక్కువగా ఉందని, ఇది సమానంగా ఉండాలని విదేశీ వ్యవహారాల మంత్రిత్వ శాఖ ప్రతినిధి అరిందమ్ బాగ్చి ఇటీవల అన్నారు. ఈ క్రమంలోనే తాజాగా దౌత్యసిబ్బందిని తగ్గించుకోవాలంటూ కెనడాకు భారత్ డెడ్‌లైన్‌ విధించినట్లు తెలుస్తోంది.

ఇక, అక్టోబరు 10లోగా దౌత్యవేత్తలను వెనక్కి తీసుకెళ్లే ప్రక్రియ పూర్తి కావాలని, ఆ తేదీ దాటిన తర్వాత కూడా అదనంగా ఉన్న సిబ్బందికి దౌత్యపరమైన రక్షణను తొలగిస్తామని భారత్‌ హెచ్చరించినట్లు ఫైనాన్సియల్ టైమ్స్ కథనం వెల్లడించింది. అయితే, ఈ ప్రచారం అటు కెనడా.. ఇటు భారత ప్రభుత్వం నుంచి గానీ ఎలాంటి అధికారిక స్పందన రాలేదు. కాగా, నిజ్జర్ హత్యపై కెనడా ఆరోపణలను తీవ్రంగా ఖండించిన భారత్‌.. జస్టిన్ ట్రూడో చర్యలపై తీవ్రంగా మండిపడింది. ఉద్రిక్తతల నేపథ్యంలో కెనడా వాసులకు వీసా సర్వీసులను కూడా భారత్‌ నిలిపివేసింది. కెనడా, భారత్‌లకు ఉమ్మడి మిత్రపక్షమైన అమెరికా.. ఈ అంశంపై సన్నాయి నొక్కులు నొక్కుతోంది. దర్యాప్తునకు భారత్ సహకరించాలని పదేపదే చెప్పడం గమనార్హం. ఇదిలా ఉండగా.. నిజ్జర్ హత్యపై నిఘా సమాచారాన్ని కూడా అగ్రరాజ్యమే కెనడాకు ఇచ్చినట్లు అమెరికా మీడియా కథనాలు వెలువరించాయి.