ఎవరూ కొనని టికెట్‌కు వరించిన బంపరాఫర్,,,,కోటీశ్వరుడైన లాటరీ టికెట్ ఏజెంట్‌

లాటరీ టికెట్లు కొని బంపర్ డ్రాలో విజేతలుగా నిలిచి సామాన్యులు కోటీశ్వరులైన సంఘటనలు మనం ఎన్నో చూశాం. అప్పటివరకు కటిక పేదరికంలో బతికి.. లాటరీ టికెట్ గెలిచి తమ జీవితాలను మార్చేసుకున్న నిరుపేదలు ఎందరో ఉన్నారు. అయితే వందల లాటరీ టికెట్లు ముందే ఉంచుకుని.. లాటరీ టికెట్ ఏజెంట్ మాత్రం వాటిని విక్రయించేందుకు చాలా కష్టపడుతూ ఉంటారు. విక్రయించకుండా ఉన్న లాటరీ టికెట్ల నుంచి వారికి డబ్బులు రావు. అయితే అలా అమ్ముడుపోని లాటరీ టికెట్ చివరికి బంపర్ డ్రాలో విజేతగా నిలిచింది. దీంతో ఆ లాటరీ టికెట్ ఏజెంట్ కోటీశ్వరుడయ్యాడు. ఈ సంఘటన కేరళలో జరిగింది.

కేరళకు చెందిన ఎన్‌కే గంగాధరన్ 33 ఏళ్ల పాటు కేరళ ట్రాన్స్‌పోర్ట్‌ డిపార్ట్‌మెంట్‌లో బస్ కండక్టర్‌గా పని చేశాడు. ఆ తర్వాత కోజికోడ్‌లో ఒక లాటరీ టికెట్ల దుకాణాన్ని పెట్టుకుని జీవనం సాగిస్తున్నాడు. అయితే 3 సంవత్సరాలుగా ఆ లాటరీ టికెట్ షాప్‌ను గంగాధరన్ నడుపుతున్నాడు. అయితే 3 సంవత్సరాలుగా అతని లాటరీ దుకాణంలో కొనుగోలు చేసిన ఒక్క టికెట్ కూడా బంపర్ డ్రాలో విజేతగా నిలవకపోవడం గమనార్హం. అయితే తాజాగా కేరళ ప్రభుత్వం నిర్వహించిన ఫిఫ్టీ ఫిఫ్టీ లాటరీలో అమ్ముడుపోని ఒక లాటరీ టికెట్ ఏకంగా రూ. 1 కోటి గెలుచుకుంది. ఇదే ఆయన 3 ఏళ్లుగా నడుపుతున్న లాటరీ స్టోర్‌లో విజేతగా నిలిచిన తొలి టికెట్ కావడం విశేషం.

ఇక ఇందులో మరో ట్విస్ట్‌ ఏంటంటే అదే డ్రాలో గంగాధరన్ స్టోర్ నుంచి టిక్కెట్లు కొనుగోలు చేసిన మరో ఆరుగురు కూడా నగదు బహుమతులు గెలుచుకున్నారు. ఆ టికెట్లు కొనుగోలు చేసిన ఆరుగురు వ్యక్తులు ఒక్కొక్కరూ రూ.5 వేలు గెలుచుకున్నారు. దీంతో లాటరీ ఏజెంట్‌ అయిన గంగాధరన్‌ కంటే ఆయన కస్టమర్‌లు మరింత ఆనందంలో మునిగిపోయారు. ఇక కర్ణాటకలోని బెంగళూరుకు చెందిన అరుణ్ కుమార్ వాటక్కే కోరోత్‌కు జాక్‌పాట్ గెలుచుకున్నాడు. అబుదాబి బిగ్ టికెట్ డ్రాలో అరుణ్ కుమార్ ఏకంగా 20 మిలియన్ దిర్హామ్‌లు దక్కించుకున్నాడు. భారత కరెన్సీలో ఇది సుమారు రూ. 44 కోట్లు కావడం గమనార్హం. అయితే మొదట్లో తాను జాక్‌పాట్ గెలుచుకున్నట్లు నిర్వాహకులు ఫోన్ చేయగా.. అది ఫేక్ కాల్ అనుకుని కట్ చేసినట్లు అరుణ్ కుమార్ వెల్లడించాడు. ఆ నంబర్‌ను కూడా బ్లాక్ చేసినట్లు తెలిపాడు. ఆ తర్వాత వెబ్‌సైట్‌లో చూసి తనకే ఆ అబుదాబి బిగ్ టికెట్ డ్రా వచ్చిందని నిర్ధారించుకున్నాడు. ఆ తర్వాత ఒక్కసారిగా రూ. 44 కోట్లు గెలుచుకోవడంతో అతని ఆనందానికి అవధుల్లేకుండా పోయాయని తెలిపాడు.