బిగ్‌బాస్ షోలోకి ఎంట్రీ ఇచ్చిన కాంగ్రెస్ ఎమ్మెల్యే,,,, తీవ్రంగా విమర్శిస్తున్న విపక్షాలు

బిగ్‌బాస్ షో. వరల్డ్స్ బిగ్గెస్ట్ రియాలిటీ షోగా కోట్లాది మంది ఆదరణ పొందుతోంది. ఈ బిగ్‌బాస్ షో లోకి సెలబ్రిటీలు ముఖ్యంగా సినీ నేపథ్యం ఉన్న వారిని కంటెస్టెంట్‌లుగా తీసుకుంటారు. వారితోపాటు వివిధ రంగాల్లో ప్రజల్లో ఆదరణ పొందినవారు, సామాన్యులకు కూడా అవకాశం కల్పిస్తూ ఉంటారు. ఈ బిగ్‌బాస్ షో ప్రస్తుతం మన దేశంలోని చాలా భాషల్లో విజయవంతంగా సీజన్లకు సీజన్లు పూర్తి చేసుకుంటోంది. అయితే తాజాగా కాంగ్రెస్ పార్టీ తరఫున గెలిచి ఎమ్మెల్యేగా ఉన్న వ్యక్తి బిగ్‌బాస్ షో లోకి కంటెస్టెంట్‌గా వెళ్లారు. ఇప్పుడు ఇదే తీవ్ర రాజకీయ దుమారానికి కారణమైంది. ప్రజలు ఓట్లు వేసి గెలిపించి ఎమ్మెల్యేను చేస్తే.. ఆ ప్రజలను పట్టించుకోకుండా రియాలిటీ షోలో పాల్గొనడం ఏంటని విమర్శిస్తున్నారు.

కొంచెం అటూ ఇటూగా వంద రోజుల పాటు బయటి ప్రపంచంతో సంబంధం లేకుండా ఒక బిగ్‌బాస్ హౌస్‌లోకి కంటెస్టెంట్లను పంపించి.. వారితో వివిధ రకాల టాస్క్‌లు ఆడిస్తూ ఉంటారు. అయితే వారం వారం ప్రేక్షకులు ఎవరికైతే తక్కువ ఓట్లు వేస్తారో వారిని ఎలిమినేట్ చేసి బయటికి పంపిస్తూ ఉంటారు. చివరికి ఎక్కువ ఓట్లు గెలుచుకుని విజేతగా నిలిచిన వారికి భారీగా నగదు బహుమతితోపాటు వివిధ రకాల గిఫ్ట్‌లు కూడా అందుతాయి. అయితే ఎన్నో కాంట్రవర్సిటీలకు కేరాఫ్ అడ్రస్‌గా నిలిచిన బిగ్‌బాస్ షో.. ప్రజల నుంచి మాత్రం భారీగా ఆదరణ పొందుతోంది. దీంతో ఆయా ఛానల్‌లు సీజన్ ముగిసిన తర్వాత మరో సీజన్ ప్రారంభిస్తూనే ఉన్నారు.

కర్ణాటక కాంగ్రెస్‌ ఎమ్మెల్యే ప్రదీప్‌ ఈశ్వర్‌ కన్నడ బిగ్‌బాస్‌ హౌస్‌లోకి కంటెస్టెంట్‌గా అడుగుపెట్టాడు. కన్నడ బిగ్‌బాస్ సీజన్‌ 10 ఆదివారం ప్రారంభమైంది. అయితే సోమవారం ఎపిసోడ్‌కు సంబంధించిన ప్రోమో ఉదయాన్నే రిలీజ్ అయింది. అయితే అందులో ప్రదీప్ ఈశ్వర్‌ కంటెస్టెంట్‌గా వెళ్లడంతో కన్నడ వాసులు ఒక్కసారిగా షాక్ అయ్యారు. ఈ క్రమంలోనే కాంగ్రెస్ పార్టీపై బీజేపీ తీవ్ర విమర్శలు గుప్పించింది. సోషల్ మీడియాలో కూడా కొందరు నెటిజన్లు విరుచుకుపడ్డారు. డప్పు చప్పుళ్లకు డ్యాన్స్ చేస్తూ బిగ్‌బాస్‌ షోలోకి వెళ్లడం సంతోషంగా ఉందని తెలిపారు. ఈ సందర్భంగా ప్రదీప్ ఈశ్వర్‌పై చర్యలు తీసుకోవాలని కర్ణాటక సీఎం సిద్ధరామయ్య, డిప్యూటీ సీఎం డీకే శివ కుమార్ పలువురు నెటిజన్లు ట్వీట్‌లు చేస్తున్నారు. ప్రజలకు సేవ కోసం ఎన్నుకున్న ఎమ్మెల్యే బాధ్యతారాహిత్యంగా రియాలిటీ షో లోకి అడుగు పెట్టడం ఏంటని మండిపడుతున్నారు.

ఇటీవల జరిగిన కర్ణాటక అసెంబ్లీ ఎన్నికల్లో 38 ఏళ్ల ప్రదీప్ ఈశ్వర్ ఎమ్మెల్యేగా తొలిసారి చిక్కబళ్లాపూర్ నియోజకవర్గం నుంచి గెలుపొందారు. కోచింగ్ ఇన్‌స్టిట్యూట్ నిర్వహిస్తున్న ప్రదీప్ ఈశ్వర్.. కర్ణాటక మాజీ మంత్రి కె. సుధాకర్‌కు షాకిచ్చి ఘన విజయం సాధించారు. ఇక ప్రదీప్ ఈశ్వర్‌పై చిక్కబళ్లాపూర్‌ స్థానంలో పోటీ చేసిన జేడీఎస్ అభ్యర్థి కేపీ బచ్చెగౌడ.. ఇది ఆయన వ్యక్తిగత సమస్య అని అన్నారు. ప్రదీప్ ఈశ్వర్‌ కొద్ది రోజుల్లోనే షో నుంచి బయటికి వచ్చేస్తాడని పేర్కొన్నారు. ఇక బీజేపీ కూడా తీవ్ర విమర్శలు గుప్పించింది. తమకు సేవ చేస్తాడని ఎమ్మెల్యేగా గెలిపిస్తే.. బిగ్‌బాస్ షోలో డ్యాన్సులు చేస్తున్నారని ఎద్దేవా చేసింది.