బ్యాంకు ఖాతాల్లో వచ్చి పడుతున్న వందల కోట్లు,,,,, షాక్ అవుతున్న ఖాతాదారులు

తమిళనాడుకు చెందిన కొంతమంది వ్యక్తులు తమ అకౌంట్లలో డబ్బులు చూసుకుని షాక్ అవుతున్నారు. ఎందుకు అంటే వారి బ్యాంకు ఖాతాల్లో ఊహించనంత సొమ్ము వచ్చి చేరుతోంది. అయితే ఈ డబ్బు ఎక్కడి నుంచి వస్తోంది. ఎందుకు వస్తోంది అనే వివరాలు మాత్రం వారికి తెలియడం లేదు. దీంతో ఆ అకౌంట్ ఇచ్చిన బ్యాంకుకు వెళ్లి వాటి సంగతేంటో అడుగుతున్నారు. అయితే ఇలా వరుసగా ఇలాంటి సంఘటనలే తమిళనాడులోని వివిధ ప్రాంతాల్లో జరగడం తీవ్ర చర్చకు దారి తీస్తోంది. చెన్నైకి చెందిన ఓ ఫార్మసీ ఉద్యోగి మహమ్మద్ ఇద్రిస్ అకౌంట్‌లో శుక్రవారం ఉదయం రూ.3 వేలు ఉన్నాయి. అయితే అందులో నుంచి తన స్నేహితుడి ఖాతాకు రూ.2 వేలు ట్రాన్స్‌ఫర్ చేశాడు. అయితే ఆ తర్వాత శనివారం వచ్చిన మెసేజ్ చూసి మహమ్మద్ ఇద్రిస్ నోరెళ్లబెట్టాడు. ఎందుకంటే తన బ్యాంకు ఖాతాలో ఏకంగా రూ.753 కోట్లు జమ అయ్యాయి. దీంతో అంత డబ్బు తన అకౌంట్‌లోకి ఎలా వచ్చిందో తెలియక తికమక పడ్డాడు. వెంటనే తాను ఖాతా తీసుకున్న కోటక్ మహీంద్రా బ్యాంకును సంప్రదించాడు.

అయితే ఆ బ్యాంక్ ఉద్యోగులు కూడా మహమ్మద్ ఇద్రిస్ అకౌంట్‌లో ఉన్న డబ్బులు చూసి షాక్ అయ్యారు. ఒక ఫార్మసీ ఉద్యోగి ఖాతాలోకి ఏకంగా రూ.753 కోట్లు జమ కావడం పట్ల వారు ఆశ్చర్యం వ్యక్తం చేశారు. ఆ తర్వాత వారు బ్యాంక్ అకౌంట్ ట్రాన్సాక్షన్స్‌ చెక్ చేయగా.. అసలు విషయం వెలుగులోకి వచ్చింది. టెక్నికల్ ఎర్రర్ కారణంగా బ్యాంక్ అకౌంట్‌లో డబ్బు జమ అయినట్లు చూపించిందని గుర్తించారు. అయితే కేవలం డబ్బులు జమ అయినట్లు మెసేజ్ మాత్రమే వచ్చిందని.. అకౌంట్‌లో మాత్రం రూ.753 కోట్లు డిపాజిట్ కాలేదని కొటక్ మహీంద్రా బ్యాంకు అధికారులు స్పష్టం చేశారు. అయితే ఇలా జరగడం ఇదే తొలిసారి ఏం కాదు. ఇటీవల తమిళనాడులో ఇలాంటి సంఘటనలు వేర్వేరు చోట్ల వెలుగులోకి వచ్చాయి. చెన్నైలోని ఓ ట్యాక్సీ డ్రైవర్ తన స్నేహితుడికి రూ.21వేలు ట్రాన్స్‌ఫర్ చేయగా.. రూ. 9 వేల కోట్లు అతని బ్యాంకు ఖాతాలో వచ్చి పడ్డాయి. అయితే ఒకేసారి రూ. 9 వేల కోట్లు వచ్చి తన బ్యాంక్ అకౌంట్‌లో వచ్చి పడటంతో అతనికి ఏం చేయాలో అర్థం కాలేదు. అయితే డబ్బులు క్రెడిట్ అయిన అరగంట తర్వాత జరిగిన పొరపాటును గుర్తించిన తమిళనాడ్ మర్కంటైల్ బ్యాంక్ తమ తప్పును గ్రహించి ఆ డబ్బును వెనక్కి తీసుకుంది. అయితే ఈ ఘటనపై ఆ ట్యాక్సీ డ్రైవర్ స్పందించాడు. తాను మధ్యాహ్నం నిద్రపోయిన సమయంలో రూ. 9 వేల కోట్లు తన అకౌంట్‌లో పడినట్లు తెలిపాడు. దీంతో లేచి చూసేసరికి అంత పెద్ద నంబర్ లెక్కించేందుకు కూడా తనకు లెక్కలు రాలేదని చెప్పాడు.