యుద్ధంలో హమాస్‌కు పెద్ద దెబ్బ.. విమాన నిఘా వ్యవస్థను ధ్వంసం చేసిన ఇజ్రాయెల్

ఇజ్రాయెల్‌పై మెరుపు దాడులు చేసినందుకు హమాస్ ఉగ్రవాదులు భారీగా మూల్యం చెల్లించుకుంటున్నారు. ఇప్పటికే గాజా స్ట్రిప్‌ను చుట్టుముట్టి భీకర దాడులు చేస్తున్న ఇజ్రాయెల్ రక్షణ దళాలు.. హమాస్ మిలిటెంట్లకు భారీ షాక్ ఇచ్చారు. ఇజ్రాయెల్ సైన్యం జరిపిన దాడుల్లో హమాస్ విమాన నిఘా వ్యవస్థ ధ్వంసం అయింది. ఇప్పటికే హమాస్ ఉగ్రవాదుల నౌకలను పేల్చేసిన ఇజ్రాయెల్ దళాలు.. తాజాగా వైమానిక నిఘా వ్యవస్థను నాశనం చేసింది. దీంతో హమాస్ మిలిటెంట్లకు పెద్ద ఎదురుదెబ్బ తగిలినట్లయింది. ఈ క్రమంలోనే హమాస్‌ ఆయుధ నిఘా, వ్యవస్థలు క్రమంగా ధ్వంసం అవుతున్నాయి.

ఇప్పటికే హమాస్ ఉగ్రవాదులకు చెందిన నౌకలను ఇజ్రాయెల్‌ దళాలు పేల్చివేశాయి. తాజాగా గాజా స్ట్రిప్‌ గగనతలంపై ఇంటెలిజెన్స్ కోసం ఏర్పాటు చేసిన ప్రత్యేక వ్యవస్థను ధ్వంసం చేసింది. గాజా స్ట్రిప్‌పై చేస్తున్న దాడుల్లో ఈ నిఘా వ్యవస్థను ధ్వంసం చేసినట్లు ఇజ్రాయెల్ డిఫెన్స్ ఫోర్సెస్ వెల్లడించాయి. అయితే ఈ ఇంటెలిజెన్స్ వ్యవస్థను పకడ్బందీగా హమాస్ మిలిటెంట్లు ఏర్పాటు చేసుకున్నారు. కొన్ని బిల్డింగ్‌లపై ఉన్న సోలార్‌ ప్యానళ్ల వెనుక ప్రత్యేకమైన కెమెరాలు ఏర్పాటు చేసి మరీ నిఘా వ్యవస్థను ఏర్పాటు చేసుకున్నారు.

ఇవి.. ఇజ్రాయెల్‌ విమానాలు గాల్లో ఉండగానే గుర్తించి.. హమాస్‌ ఉగ్రవాదులకు సమాచారం అందించడంతో వారు ఇజ్రాయెల్ విమానాలపై దాడులకు దిగుతున్నారు. ఇలాంటి నిఘా వ్యవస్థలు గాజా స్ట్రిప్‌లో పలు చోట్ల ఉన్నాయని.. వాటిని ధ్వంసం చేసిన విషయాన్ని ఐడీఎఫ్‌ దళాలు ట్విటర్‌లో వెల్లడించాయి. దీంతో ఆకాశంలో నిఘా పెట్టి.. దాడులు చేసే సామర్థ్యాన్ని హమాస్ ఉగ్రవాదులకు లేకుండా దెబ్బకొట్టామని ఐడీఎఫ్‌ ట్వీట్‌లో తెలిపింది.

ఇప్పటికే హమాస్‌ మిలిటెంట్ల నౌకలను ఇజ్రాయెల్‌ పేల్చివేసింది. గాజా స్ట్రిప్‌లోని మధ్యదరా సముద్రం నుంచి హమాస్‌ డైవర్లు ఈదుకుంటూ వచ్చి ఇజ్రాయెల్‌ భూభాగంలోకి చొరబడుతున్నారు. వీటిని అడ్డుకునేందుకు రంగంలోకి దిగిన ఇజ్రాయెల్ దళాలు.. గాజా సిటీ, ఖాన్‌ యూనిస్‌ రేవుల వద్ద ఉన్న హమాస్‌ నౌకలను పేల్చివేశాయి. మంగళవారం కూడా ఓ హమాస్‌ డైవర్‌ ఇజ్రాయెల్‌లోకి వచ్చేందుకు యత్నించగా.. అతడిని హతమార్చాయి.