హమాస్ దాడిలో ఇద్దరు భారత సంతతి భద్రతాధికారిణులు బలి

ఇజ్రాయేల్‌పై గతవారం హమాస్‌ ముష్కరులు జరిపిన దాడుల్లో భారత సంతతికి చెందిన కనీసం ఇద్దరు భద్రతాధికారిణులు బలయ్యారు. ఈ విషయం ఆదివారం ఆలస్యంగా వెలుగులోకి వచ్చింది. భారత సంతతికి చెందిన లెఫ్టినెంట్‌ ఓర్‌ మోజెస్‌ (22), పోలీసు ఇన్‌స్పెక్టర్‌ కిమ్‌ డొక్రాకెర్‌లు విధి నిర్వహణలో ప్రాణత్యాగం చేసినట్లు అధికారులు ధ్రువీకరించారు. మోజెస్ హోమ్ ఫ్రంట్ కమాండ్ దళానికి చెందిన కమాండర్ కాగా.. డొక్రాకెర్‌ సెంట్రల్ డిస్ట్రిక్ట్ బోర్డర్ పోలీస్ అధికారిణి. హమాస్ మారణకాండలో ఇంతవరకు 286 మంది సైనికులు, 51 మంది పోలీసు అధికారులు ప్రాణాలు కోల్పోయినట్లు అధికారులు తెలిపారు. మృతులు, అపహరణకు గురైనవారిని గుర్తించే ప్రక్రియ కొనసాగుతున్నందు వల్ల ఈ సంఖ్య ఇంకా పెరగవచ్చని భావిస్తున్నారు. హమాస్ దాడి నుంచి మరో భారత సంతతి యువతి షహఫ్ టాకర్ తన స్నేహితుడితో కలిసి త్రుటిలో తప్పించుకుంది. ఈ విషయాన్ని ఆమె తాత మీడియాకు తెలిపారు. 24 ఏళ్ల తాల్కర్ ప్రస్తుతం షాక్‌లో ఉందని, కనీసం మాట్లాడలేకపోతోందని ఆమె విరించారు.

1963లో 11 ఏళ్ల వయసులో ముంబై నుంచి వలస వచ్చిన ఆమె తాత యాకోవ్ టాకర్ మాట్లాడుతూ..‘ఇప్పటికీ షాక్‌లో ఉంది.. మానసిక వేదన కారణంగా మాట్లాడలేకపోయింది.. లిఖితపూర్వకంగా బయట పెట్టడం వల్ల తన ఒత్తిడి కొంత తగ్గుతుందని భావించిందని’ ఆయన చెప్పారు. టాకర్ కుటుంబం ఉత్తర ఇజ్రాయేల్‌లోని పెటా టిక్వా అనే పట్టణంలో నివాసం ఉంటోంది. ‘అక్టోబరు 6 తెల్లవారుజామున ఇజ్రాయేల్ భూభాగంలోకి చొరబడి హమాస్ ముష్కరులు మ్యూజిక్ ఫెస్టివల్‌లో జరిపిన మారణకాండలో చనిపోయిన 270 మందిలో కొందరి స్నేహితుల అంత్యక్రియలకు షహఫ్ వెళ్లింది’ అని టాకర్ తెలిపారు. ‘ఆ రోజు మ్యూజిక్ పార్టీకి నేను, నా స్నేహితుడు యనిర్ కూడా వెళ్లాం.. మ తలలపై నుంచి రాకెట్లు వెళ్లడం చూశాం.. ఏంటి అని అతడ్ని అడితే.. రాకెట్ అని సమాధానం చెప్పారు.. దీంతో వెంటనే మా కారు వద్దకు పరుగెత్తాం.. ఈ క్రమంలో నేను కిందపడిపోవడంతో యనిర్ నా చేయిపట్టుకుని లేపి.. మనం దూరంగా వెళ్లిపోదామని చెప్పాడు’

‘మేము కారు ఎక్కి డ్రైవింగ్ ప్రారంభించాం.. వేగంగా వాహనం నడిపాడు.. పోలీసులు కుడివైపు తిరగండి అన్నారు.. కానీ ఇది టెల్ అవీవ్‌కు వెళ్లే రహదారి కాదు, కాబట్టి మేము వెనక్కి తిరిగి అటువైపు తిరిగాం.. మేము ప్రాణాలతో ఎలా బయటపడ్డామో ఆ దేవుడికే తెలియాలి.. టెల్ అవీవ్‌కు వెళ్తుండగా మూడు వ్యాన్లతో 8 మంది ఉగ్రవాదులు మా కోసం వేచి ఉన్నారు.. "వాళ్లు మావైపు తుపాకీలను గురిపెట్టారని త్వరగా గ్రహించి... కారును వీలైనంత వేగంగా తిప్పాడు. ఒక బుల్లెట్ ముందు విండ్‌షీల్డ్‌కి తగిలి.. నాకు, యానీర్‌కు మధ్య నుంచి వెళ్ళింది.. కారుపై బుల్లెట్‌ల వర్షం కురిసింది.. అద్దాలు పగిలిపోయాయి..

మేము ఇంకో వైపునకు వెళ్తే అక్కడ అక్కడ కూడా కొందరు వేచి ఉన్నారు. మరో ఇద్దరు స్నేహితులతో కలిసి అందరం కారు దిగి పరిగెత్తాం... మేము పొదల్లో దాక్కోడానికి ప్రయత్నించాం.. మా తలలపై నుంచి బుల్లెట్లు వెళ్లాయి.. కాల్పులు శబ్దం ఆగిపోయిన కొద్దిసేపటికి.. ఏం జరుగుతుందో తెలుసుకునే ప్రయత్నంలో వాహనాలకు తిరిగి వెళ్లాలని నిర్ణయించుకున్నాం..మేము ప్రాణాలతో బయటపడ్డామంటే ఇప్పటికీ నేను నమ్మలేకపోతున్నాను... మూడు గంటలపాటు, మేము భయంతో చచ్చిపోయాం.. మమ్మల్ని రక్షించడానికి సాధ్యమైన ప్రతి ఒక్కరినీ పిలిచాం’ అని టాకర్ ఆ భయానక సంఘటనను గుర్తుచేసుకుంది..