విశాఖలో కోరమాండల్ పెట్టుబడులు,,,,సల్ఫరిక్‌ యాసిడ్‌ ప్లాంటు ప్రారంభం

విశాఖకు పెట్టుబడులు తరలివస్తున్నాయి.. తాజాగా కోరమాండల్‌ ఇంటర్నేషనల్‌ ఆంధ్రప్రదేశ్‌లో కొత్తగా నెలకొల్పిన సల్ఫరిక్‌ యాసిడ్‌ ప్లాంటులో ఉత్పత్తి కార్యకలాపాలను ప్రారంభించింది. విశాఖపట్నం వద్ద ఉన్న కంపెనీకి చెందిన ఫెర్టిలైజర్‌ కాంప్లెక్స్‌లో రూ.400 కోట్ల పెట్టుబడితో ఈ కేంద్రాన్ని స్థాపించారు. ఈ ప్లాంటు ఉత్పత్తి సామర్థ్యం రోజుకు 1,650 మెట్రిక్‌ టన్నులని కోరమాండల్‌ ఎగ్జిక్యూటివ్‌ వైస్‌ చైర్మన్‌ అరుణ్‌ అలగప్పన్‌ తెలిపారు. నూతన కేంద్రం చేరికతో సంస్థ సల్ఫరిక్‌ యాసిడ్‌ తయారీ సామర్థ్యం ఏటా 6 లక్షల టన్నుల నుంచి 11 లక్షల టన్నులకు చేరిందన్నారు.

ప్రైవేట్‌ రంగంలో ఫాస్పాటిక్‌ ఎరువులను తయారు చేస్తున్న అతిపెద్ద కంపెనీ కోరమాండల్‌ ఇంటర్నేషనల్‌. కొత్తగా నిర్మించిన అత్యాధునిక సల్ఫ్యూరిక్‌ యాసిడ్‌ అండ్‌ డీసాలినేషన్‌ ప్లాంట్‌ను విశాఖలో ప్రారంభించింది. అలాగే 6 ఎంఎల్‌డీ డీసాలినేషన్‌ ప్లాంట్‌ను కూడా ఏర్పాటు చేశారు. ఈ ప్లాంటులో కోరమాండల్‌‌కు అవసరమైన ఫాస్పోరిక్ యాసిడ్, ఫాస్పోటిక్ ఫెర్టిలైజర్‌ను ఉత్పత్తి చేయనుంది. రికార్డు స్థాయిలో 18 నెలల్లోనే ఇక్కడ కొత్త ప్లాంట్ ప్రారంభించామన్నారు వైస్ ఛైర్మన్ అలగప్పన్.

ఈ ప్లాంట్ డబుల్ కన్వర్షన్, డబుల్ అబ్సార్ప్షన్ ప్రక్రియతో రూపొందించినట్లు కోరమాండల్ తెలిపింది. డీసీఎస్ సిస్టమ్‌తో డిజైన్ చేయడం వల్ల ఎలాంటి ఇబ్బందులు ఉండవని చెబుతున్నారు. ఈ ప్రాజెక్ట్‌ను అమలు చేయడం కోసం కంపెనీ మోన్‌శాంటో ఎన్విరో-కెమ్ సిస్టమ్స్, TKISతో ఎంగేజ్ అయ్యింది. కోరమాండల్ తన అదనపు నీటి అవసరాల కోసం వెయోలియా వాటర్ టెక్నాలజీ అండ్ సొల్యూషన్స్ భాగస్వామ్యంతో ఆరు MLD (రోజుకు మిలియన్ లీటర్లు) డీశాలినేషన్ ప్లాంట్‌ను కూడా ఏర్పాటు చేసింది.మొత్తానికి విశాఖకు పెట్టుబడులు క్యూ కట్టాయి.