నా పేరు చూసి ఓటేయండి..మధ్యప్రదేశ్‌ ఓటర్లకు ప్రధాని మోదీ బహిరంగ లేఖ

ప్రధాని నరేంద్ర మోదీ. 10 ఏళ్లుగా ప్రధాని కుర్చీలో కూర్చున్న మోదీ.. ఏ రాష్ట్రంలో ఎన్నికలు జరిగినా తన ఛరిష్మాతో ఓటర్లను తనవైపు తిప్పుకోవడం ఆయన ప్రత్యేకత. దేశంలోని ప్రజలు బీజేపీకి ఓటు వేసి అధికారాన్ని కట్టబెట్టడానికి నరేంద్ర మోదీ కూడా ఓ కారణం అని చెప్పడంలో ఎంత మాత్రం అతిశయోక్తి లేదు. ఈ క్రమంలోనే మధ్యప్రదేశ్ ఎన్నికలు దగ్గరపడుతున్న కొద్దీ ఉత్కంఠ పెరుగుతోంది. ఇటీవల పోటీ చేసే అభ్యర్థుల జాబితాలను విడుదల చేసిన అధికార బీజేపీ.. ప్రస్తుత సీఎం శివరాజ్‌సింగ్ చౌహాన్‌ పేరును చివరి జాబితాలో ప్రకటించడం తీవ్ర అనుమానాలకు తావిచ్చింది. ఈ నేపథ్యంలోనే తాజాగా మధ్యప్రదేశ్ ప్రజలను ఉద్దేశించి ప్రధాని మోదీ బహిరంగ లేఖ రాశారు. ఈ ఎన్నికల్లో తన పేరు చూసి ఓటు వేయాలని వారికి విజ్ఞప్తి చేశారు.

మధ్యప్రదేశ్‌లో ప్రస్తుత బీజేపీని ఓడించి కాంగ్రెస్ పార్టీ అధికారంలోకి వస్తుందని పలు సర్వేలు అంచనా వేసిన నేపథ్యంలో బీజేపీ అధిష్ఠానం ఆ రాష్ట్రంపై ప్రత్యేక దృష్టి సారించింది. ఈ నేపథ్యంలోనే శివరాజ్ సింగ్ చౌహాన్‌ సర్కార్‌పై ఉన్న వ్యతిరేకతను తగ్గించేందుకు ఆయనకు తుది జాబితాలో పేరు చేర్చింది. వచ్చే ఏడాది జరగనున్న లోక్‌సభ ఎన్నికల్లో గెలిచి మరోసారి అధికారాన్ని దక్కించుకోవాలని ఆశగా ఉన్న బీజేపీ.. ప్రస్తుతం అధికారంలో ఉన్న రాష్ట్రాన్ని వదులుకోవద్దని తీవ్ర పట్టుదలగా ఉంది. ఈ క్రమంలోనే ఏకంగా ప్రధాని నరేంద్ర మోదీ నేరుగా రంగంలోకి దిగారు.

ఈ నేపథ్యంలోనే మధ్యప్రదేశ్ ఓటర్లకు ప్రధాని మోదీ తాజాగా ఒక బహిరంగ లేఖ రాశారు. ఒకవైపు ముఖ్యమంత్రి శివరాజ్ సింగ్‌పై ప్రశంసలు కురిపిస్తూనే.. తన పేరు చూసి ఓటు వేయాలని ఓటర్లను ఆ లేఖలో ప్రధాని కోరారు. ఈ నేపథ్యంలోనే ఈసారి ఎన్నికల్లో ముఖ్యమంత్రి అభ్యర్థి శివరాజ్‌ సింగ్‌ కాదు అంటూ జరుగుతున్న ప్రచారానికి.. తాజాగా మోదీ విడుదల చేసిన లేఖ బలాన్ని చేకూరుస్తుందని రాజకీయ విశ్లేషకులు భావిస్తున్నారు. ఈ క్రమంలోనే ఈసారి మధ్యప్రదేశ్ ముఖ్యమంత్రి అభ్యర్థిని ప్రకటించకుండానే నేరుగా ప్రధాని మోదీ పేరు, ఛరిష్మా చూసి ఓటు వేయాలని.. గెలిచిన తర్వాత ఎవరు సీఎం అనేది హై కమాండ్ నిర్ణయిస్తుందనే వాదనలు వినిపిస్తున్నాయి.

మధ్యప్రదేశ్‌ ఓటర్లకు రాసిన లేఖలో తనకు ఆ రాష్ట్రం పట్ల తనకు ఉన్న అనుబంధాన్ని గుర్తు చేసుకున్నారు. 2014, 2019 ఎన్నికల్లో మధ్యప్రదేశ్ ఓటర్లు తనపై ఉంచిన నమ్మకాన్ని మరిచిపోలేనని పేర్కొన్నారు. మధ్యప్రదేశ్ ప్రజలు ఇచ్చిన తీర్పుతోనే ఆ రాష్ట్రాన్ని అభివృద్ధి వైపు నడిపామని.. సమర్ధవంతమైన నాయకత్వం వల్లే ఇది సాధ్యమైందని తెలిపారు. ఈ సందర్భంగా మధ్యప్రదేశ్‌లో మరోసారి పటిష్ట ప్రభుత్వాన్ని ఏర్పాటు చేసేందుకు ప్రజలు బీజేపీపై నమ్మకాన్ని ఉంచుతారని ప్రధాని మోదీ ఆశాభావం వ్యక్తం చేశారు. సీఎం శివరాజ్ సింగ్ చౌహాన్ చేసిన అభివృద్ధి, సాధించిన విజయాలను ప్రశంసిస్తూనే, తన పేరు చూసి ఓటువేయాలని మధ్యప్రదేశ్ ఓటర్లకు ప్రధాని విజ్ఞప్తి చేశారు.