విజయనగరం రైలు ప్రమాదం..... ఫలక్‌నుమా, ఈస్ట్‌కోస్ట్‌ సహా పలు రైళ్ల రద్దు

విజయనగరం జిల్లాలో జరిగిన రైలు ప్రమాదం తర్వాత ట్రాక్‌ను పునరుద్దరించారు. అయితే ఈ ప్రమాదం దృష్ట్యా ఇవాళ (అక్టోబర్‌ 31) కూడా పలు రైళ్లను అధికారులు రద్దు చేశారు. ప్రధాన రైళ్లయిన హౌరా-సికింద్రాబాద్‌ (12703) ఫలక్‌నుమా ఎక్స్‌ప్రెస్‌, హౌరా-బెంగళూరు (12245) దురంతో ఎక్స్‌ప్రెస్‌, షాలిమార్‌- హైదరాబాద్‌ (18045) ఈస్ట్‌కోస్ట్‌ ఎక్స్‌ప్రెస్‌లు రద్దయ్యాయి. వీటితో పాటు విశాఖ-గుణుపుర్‌, విశాఖ-రాయగడ, విశాఖ-పలాస ప్యాసింజర్‌ రైళ్లను రద్దు చేసినట్లు అధికారులు ప్రకటించారు. ఆదివారం రాత్రి జరిగిన ప్రమాదంతో సోమవారం పలు రైళ్లను రద్దు చేయగా.. మరికొన్నింటిని దారి మళ్లించిన విషయం తెలిసిందే.

మరోవైపువిజయనగరం జిల్లాలో జరిగిన రైలు ప్రమాదంలో 13 మంది మృతి చెందినట్లు ప్రభుత్వం అధికారికంగా ప్రకటించింది. 52 మందిని క్షతగాత్రులుగా గుర్తించింది. వీరిలో ఎక్కువమంది స్వల్ప గాయాలతో బయటపడి ఇళ్లకు వెళ్లిపోయారు. మిగిలిన వారికి వైద్యం అందిస్తున్నారు. చనిపోయినవారి అంత్యక్రియలకు రైల్వే శాఖ ఒక్కొక్కరికి రూ.50 వేల నగదు, రూ.9.50 లక్షల చెక్‌ అందజేసినట్లు అధికార వర్గాలు పేర్కొన్నాయి. మొత్తం 13 మంది మృతుల్లో 12 మంది వివరాలను గుర్తించారు. మరో మృతదేహం కర్నూలు జిల్లాకు చెందిన వ్యక్తిగా భావిస్తున్నారు.

ఈ రైలు ప్రమాదంపై సీఆర్‌ఎస్‌ (కమిషనర్‌ ఆఫ్‌ రైల్వే సేఫ్టీ) నేతృత్వంలో విచారణ మొదలైంది. ఢిల్లీ, భువనేశ్వర్‌ నుంచి నిపుణుల కమిటీ ఘటనా స్థలానికి చేరుకొని ఆరా తీసింది. కేబుళ్లకు విద్యుత్తు సరఫరా ఆగిపోవడంతో పలాస రైలు ముందుకు కదల్లేదని ప్రాథమిక పరిశీలన అనంతరం గుర్తించినట్లు సమాచారం. ఆ విషయం సమీప స్టేషన్లకు చేరకపోవడంతో అదే ట్రాక్‌పైకి రాయగడ రైలు వెళ్లేందుకు సిగ్నల్‌ ఇవ్వడం ప్రమాదానికి కారణమైందని భావిస్తున్నారు. పలాస రైలును రాయగడ ప్యాసింజర్‌ ఢీకొన్నప్పుడు దాని వేగం 80 కి.మీ. వరకు ఉండొచ్చని.. ఒక్కసారిగా అంత వేగాన్ని నియంత్రించడమూ సాధ్యం కాదంటున్నారు.

మెకానికల్‌, ఎలక్ట్రికల్‌, సిగ్నలింగ్‌ ఇలా పలు విభాగాలకు చెందిన నిపుణుల కమిటీ.. అన్ని కోణాల్లో ఈ ఘటనపై విశ్లేషిస్తోంది. ఆ సమయంలో విధుల్లో ఉన్న అన్ని విభాగాలకు చెందిన ఉద్యోగుల నుంచి వివరాలు సేకరిస్తున్నారు. ఎవరైనా క్రిమినల్‌ చర్యలకు పాల్పడ్డారా అనే కోణంలో ఆర్పీఎఫ్‌ తనిఖీ చేశారు. రైల్వే ఐజీ, డీఐజీలు ప్రత్యేక బృందాలతో పరిశీలించారు. డాగ్‌ స్క్వాడ్‌లు తనిఖీ చేశాయి.. విద్యుత్తు సరఫరా ఆగిపోవడం వెనుక విద్రోహుల దుశ్చర్య ఏమైనా ఉందా అనే కోణంలో కూడా దర్యాప్తు చేస్తున్నారు. అన్ని కోణాల్లోనూ ఈ ఘటనపై ఆరా తీస్తున్నారు.. త్వరలోనే ఈ అంశాలపై క్లారిటీ వచ్చే అవకాశం ఉంది.