ఏపీలోని ఈ జిల్లాలో నేడు, రేపు భారీ వర్షాలు.. ఐఎండీ అలర్ట్

బంగాళాఖాతంలో ఏర్పడిన ద్రోణి, ఉపరితల ఆవర్తనం కొనసాగుతున్నాయి. దీంతో ఏపీలోని కొన్ని జిల్లాల్లో మోస్తరు నుంచి తేలికిపాటి వర్షాలు కురుస్తున్నాయి. ఈ వర్షాలు నేడు కూడా కొనసాగుతాయని ఏపీ విపత్తు నిర్వహణ విభాగం వెల్లడించింది. దక్షిణ కోస్తా, రాయలసీమ జిల్లాల్లో భారీ వర్షాలు కురుస్తాయని హెచ్చరించింది. అల్లూరి సీతారామరాజు, కోనసీమ, పశ్చిమ గోదావరి, ఏలూరు, కృష్ణా, బాపట్ల, పల్నాడు, ప్రకాశం, నెల్లూరు, నంద్యాల, అనంతపురం, శ్రీసత్యసాయి, వైఎస్ఆర్, అన్నమయ్య, చిత్తూరు, తిరుపతి జిల్లాల్లో అక్కడక్కడ ఒక మోస్తరు నుండి భారీ వర్షాలు కురిసే అవకాశం ఉందని తెలిపింది.

మరోవైపు, దక్షిణ తమిళనాడు పరిసరాల్లో శనివారం ఉపరితల ఆవర్తనం ఏర్పడింది. ఇది రాబోయే రెండు పశ్చిమ వాయువ్యంగా పయనించి అరేబియా సముద్రంలో ప్రవేశించనుందని ఐఎండీ తెలిపింది. దీని ప్రభావంతో నవంబరు 8 నాటికి ఆగ్నేయ అరేబియా సముద్రంలో అల్పపీడనం ఏర్పడే అవకాశం ఉందని పేర్కొంది. ఇటు, తమిళనాడులో ఆవరించిన ఆవర్తనం ప్రభావంతో బంగాళాఖాతం నుంచి రాష్ట్రంపైకి తూర్పుగాలులు వీస్తున్నాయి. దీంతో ఈశాన్య రుతుపవనాలు మరింత చురుగ్గా మారాయి.

శనివారం కోస్తా, సీమల్లో పలుచోట్ల తేలికపాటి నుంచి మోస్తరుగా, ఒకటి, రెండుచోట్ల భారీవర్షాలు నమోదయ్యాయి. రాగల రెండు రోజుల్లో కోస్తా, రాయలసీమల్లో అనేకచోట్ల వర్షాలు కురుస్తాయని వాతావరణ శాఖ తెలిపింది. ఆరోగ్యవరంలో అత్యల్పంగా 21 డిగ్రీల కనిష్ఠ ఉష్ణోగ్రత నమోదైంది. ప్రస్తుతం ఆంధ్రప్రదేశ్, యానాం మీదుగా దిగువ ట్రోపోస్పిరిక్ తూర్పు గాలులు వీస్తున్నాయని, ఈ గాలుల వల్ల రానున్న మూడు, నాలుగు రోజుల పాటు రాష్ట్రంలోని పలు ప్రాంతాల్లో వర్షాలు కురిసే అవకాశం ఉందని అమరావతిలోని ఐఎండీ శాస్త్రవేత్త కరుణ సాగర్ వివరించారు. అయితే, నవంబర్ 7 తర్వాత వర్షపాతం తగ్గుముఖం పట్టవచ్చని ఆయన అన్నారు.

ఇదిలా ఉండగా.. రాష్ట్రంలో విచిత్రమైన వాతావరణం నెలకుంది. కొన్ని జిల్లాల్లో వర్షాలు .. మరికొన్ని జిల్లాల్లో అధిక ఉష్ణోగ్రతలు కొనసాగుతున్నాయి. ఇక, రాత్రి వేళ ఉష్ణోగ్రతలు అమాంతం తగ్గి చలి వాతావరణం ఉంటోంది. పగలు ఎండ, రాత్రి చలితో జనాలు తీవ్ర ఇబ్బందులు పడుతున్నాయి. ఇక, ఈ ఏడాది నైరుతిలో వర్షాలు ముఖం చాటేయడంతో సరైన వర్షాలు లేక సాగు చేసిన పంటలు ఎండిపోతున్నాయని రైతులు వాపోతున్నారు. ఈ ఊహించిన వర్షం రాష్ట్ర వాసులు ముఖ్యంగా రైతులకు, లోటు వర్షపాతం ప్రతికూల ప్రభావాలతో సతమతమవుతున్నందుకు ఉపశమనాన్ని కలిగిస్తుందని కొందరు హర్షం వ్యక్తం చేస్తున్నారు.