నాకు పెళ్లి చేస్తేనే ఎన్నికల విధుల్లో పాల్గొంటా.. ఝలక్ ఇచ్చిన టీచర్

ప్రస్తుతం దేశంలో ఎన్నికల వేడి కొనసాగుతోంది. ఇప్పటికే నోటిఫికేషన్ విడుదల కాగా.. నామినేషన్లు, ప్రచారాలు, ఎన్నికల హోరు నడుస్తోంది. ఇక ఎన్నికలను ప్రశాంతంగా, విజయవంతంగా నిర్వహించేందుకు ఎన్నికల కమిషన్ అన్ని రకాల ప్రయత్నాలు చేస్తోంది. ఈ క్రమంలోనే తాజాగా ఓ వింత పరిస్థితి ఎదురైంది. ఎన్నికల విధుల్లో ఉన్న ఓ టీచర్.. తాను ఎన్నికల విధులకు హాజరు కాలేను అంటూ చెప్పడం సంచలనంగా మారింది. దీనికి సంబంధించి ఎన్నికల శిక్షణకు కూడా హాజరు కాలేదు. అయితే తనకు పెళ్లి చేస్తేనే ఎన్నికల విధుల్లో పాల్గొంటాను అని చెప్పడం గమనార్హం.

దేశంలో ఐదు రాష్ట్రాల అసెంబ్లీ ఎన్నికల్లో భాగంగా త్వరలోనే మధ్యప్రదేశ్ ఎన్నికలు జరగనున్నాయి. ఈ నేపథ్యంలోనే ప్రభుత్వ అధికారులకు ఎన్నికల విధులు వేస్తున్నారు. ఈ క్రమంలోనే వారికి ఎన్నికలు ఎలా నిర్వహించాలి అనేదానిపై శిక్షణ ఇస్తున్నారు. అయితే అఖిలేశ్ కుమార్ మిశ్రా అనే ఓ ప్రభుత్వ ఉపాధ్యాయుడు వ్యవహరించిన తీరు ప్రస్తుతం తీవ్ర చర్చనీయాంశంగా మారింది. ఎన్నికల శిక్షణ తరగతులకు హాజరుకాకపోవడమే కాక.. ఎందుకు హాజరు కాలేదు అని షోకాజ్ నోటీసులు పంపిన అధికారులకు ఆశ్చర్యపోయే సమాధానం ఇచ్చాడు.

35 ఏళ్ల అఖిలేష్ కుమార్ మిశ్రా అనే ఉపాధ్యాయుడు మధ్యప్రదేశ్ సాత్నాలోని ఓ ప్రభుత్వ పాఠశాలలో సంస్కృత ఉపాధ్యాయుడిగా పనిచేస్తున్నాడు. ఈ క్రమంలోనే ఎలక్షన్ డ్యూటీ కోసం అఖిలేష్ కుమార్ మిశ్రా సహా మిగితా వారు శిక్షణకు హాజరు కావాలని ఉన్నతాధికారులు ఆదేశాలు జారీ చేశారు. అయితే అక్టోబర్ 16, 17 వ తేదీల్లో శిక్షణా తరగతులకు హాజరు కావాలని ఆదేశాలు ఇచ్చినా.. వాటికి అఖిలేష్ కుమార్ హాజరు కాలేదు. దీంతో ఎందుకు హాజరు కాలేదో చెప్పాలని ఉన్నతాధికారులు అతనికి షోకాజ్ నోటీసులు జారీ చేశారు.

అయితే ఆ షోకాజ్ నోటీసులకు అఖిలేష్ కుమార్ ఇచ్చిన సమాధానం చూసి ఉన్నతాధికారులు ఖంగుతిన్నారు. ఇప్పటికే తనకు 35 ఏళ్లు పూర్తయ్యాయని.. అయినా ఇప్పటికీ పెళ్లి కాలేదని పేర్కొన్నాడు. బ్యాచిలర్‌గా ఉండలేకపోతున్నాని.. ఇక జీవితాంతం భార్య లేకుండా ఒంటరిగా ఉండాల్సి వస్తుందేమో అని భయమేస్తుందని అందులో తెలిపాడు. ముందు తనకు పెళ్లి చేయండని.. ఆ తర్వాతే ఎన్నికల విధులకు వస్తానని అక్టోబర్ 31 వ తేదీన ఉన్నతాధికారులకు సమాధానం ఇచ్చాడు. అది చూసిన అధికారులకు ఏం చేయాలో ఒక్కసారిగా అర్థం కాలేదు. తనకు పెళ్లి కావడం లేదని చెబుతూనే.. రూ. 3 లక్షల కట్నంతో పాటు ఓ ప్లాట్ ఇవ్వాలని కట్నం డిమాండ్ చేయడం గమనార్హం.

అఖిలేష్ కుమార్ ఇచ్చిన సమాధానంపై సంతృప్తి చెందని జిల్లా కలెక్టర్ అతడిని నవంబర్ 2 వ తేదీన సస్పెండ్ చేస్తూ ఉత్తర్వులు వెలువరించారు. అయితే అఖిలేష్ కుమార్ సెల్‌ఫోన్ వాడకపోవడం వల్ల అతను సస్పెండ్ అయిన విషయం తెలియలేదు. తనతో పనిచేసే మరో ఉపాధ్యాయుడు చెప్పడంతో ఆ విషయం తెలుసుకున్నాడు. ఇప్పుడు ఈ విషయం తీవ్ర చర్చకు దారి తీసింది.