తిరుపతిలో దొంగల ముఠా అరెస్ట్,,,,బంగారం, బైకులు సీజ్

తిరుపతి జిల్లాలో ఐదుగురు దొంగల ముఠా ఆటకట్టించారు పోలీసులు. చంద్రగిరి డీఎస్పీ యశ్వంత్‌ ఆధ్వర్యంలో సీఐ రాజశేఖర్‌ ప్రత్యేక బృందాల ద్వారా పాత నేరస్థులపై నిఘా పెట్టారు. పక్కా సమాచారం మేరకు ఆటోనగర్‌కు చెందిన కచ్చిలేటి వెంకటేష్, తమిళనాడు రాష్ట్రం తిరువళ్లూరుకు చెందిన మణికంఠ, చిత్తూరుకు చెందిన జెమిని, ఆర్‌.లోకేష్‌, పుత్తూరుకు చెందిన షేక్‌ మస్తాన్‌ను అదుపులోకి తీసుకుని ప్రశ్నించారు.

ఈ గ్యాంగ్ తిరుపతి రూరల్‌, పడమర, తిరుచానూరు, చంద్రగిరి,నాయుడుపేట, భాకరాపేటతోపాటు కర్ణాటక రాష్ట్రంలోని నంగిలి పీఎస్‌ పరిధిలో దొంగతనాలు చేసినట్లు అంగీకరించారు. ఈ గ్యాంగ్ దగ్గర నుంచి 363 గ్రాముల బంగారు నగలు, 100 గ్రాముల వెండి వస్తువులు, రూ.1.90 లక్షల నగదు, 15 బైక్‌లను , ఎలక్ట్రికల్‌ పరికరాలు స్వాధీనం చేసుకున్నారు. దొంగతనాలను అరికట్టేందుకు ప్రత్యేక కార్యాచరణ అమలు చేస్తున్నట్లు ఎస్పీ పరమేశ్వరరెడ్డి తెలిపారు. ఈ గ్యాంగ్‌ ఉమ్మడి చిత్తూరు జిల్లాతో పాటూ కర్ణాటకలో చోరీ చేసినట్లు గుర్తించామన్నారు.

కొన్ని దొంగతనాల తీరును పరిశీలిస్తే.. ఎక్కువగా జల్సాలకు అలవాటు పడి నేరాలకు పాల్పడిన జులాయిలే కనిపిస్తున్నారన్నారు. ప్రజలు కూడా కొన్ని జాగ్రత్తలు పాటించాలని.. అపార్ట్‌మెంట్‌లు, కాలనీలలో, సొసైటీలకు సంబంధించిన వారు స్వచ్ఛందంగా సీసీ కెమెరాలు ఏర్పాటు చేసుకోవాలని తద్వారా కొంతమేర దొంగతనాలను అరికట్టవచ్చన్నారు.

ప్రజలు ఎవరైనా సుదూర ప్రాంతాలకు వెళ్లేటప్పుడు పోలీస్‌శాఖ ఉచితంగా ఏర్పాటు చేసే ఎల్ హెచ్ ఎంఎస్ కెమెరాలను పెట్టుకోవాలని సూచించారు. తిరిగి ఇంటికి వచ్చేంతవరకు కెమెరాల నిఘాతోపాటు పోలీస్ నిఘా కూడా ప్రత్యేకంగా ఉంటుందన్నారు. జనాలు పరిసర ప్రాంతాలలో అనుమానాస్పద వ్యక్తులు ఎవరైనా కనిపిస్తే వెంటనే డయల్ 100 కి సమాచారం అందించాలని ప్రజలకు జిల్లా ఎస్పీ విజ్ఞప్తి చేశారు.