ఏపీలో పేదలకు ఇంటి నిర్మాణం కోసం రుణాలు మంజూరు

ఏపీలో పేదలకు జగన్ సర్కార్ తీపి కబురు చెప్పింది. ప్రభుత్వం మంజూరు చేసిన ఇళ్లను సొంతంగా నిర్మించుకుంటున్న లబ్ధిదారులకు ఆర్థిక వెసులుబాటు కల్పించేందుకు మరో కీలక నిర్ణయం తీసుకుంది. పావలా వడ్డీకే బ్యాంకుల ద్వారా రుణాలు మంజూరు చేయిస్తోంది. ఇప్పటికే ఇళ్ల లబ్ధిదారుల్లో 79 శాతం మందికి పావలా వడ్డీకే బ్యాంకుల ద్వారా రుణాలు మంజూరు చేయించింది. ప్రభుత్వం ఒక్కో ఇంటి నిర్మాణానికి రూ.1.80 లక్షలు ఇస్తుండగా.. అదనంగా ఒక్కో లబ్ధిదారుకు రూ.35 వేల చొప్పున పావలా వడ్డీకి రుణాలు మంజూరు చేయిస్తోంది.

పేదలు నిర్మించుకుంటున్న ఇళ్లకు ప్రభుత్వం ఉచితంగానే ఇసుక సరఫరా చేస్తోంది.. ఇంటికి అవసరమైన ఇతర సామగ్రిని తక్కువ ధరకే అందిస్తోంది. రాష్ట్రంలో మొత్తం 16,06,301 మంది లబ్ధిదారులు సొంతంగా ఇళ్ల నిర్మాణాలు చేపట్టగా.. ఇందులో 12,61,203 మందికి పావలా వడ్డీకి రూ.4,443.13 కోట్ల రుణాన్ని బ్యాంకులు మంజూరు చేశాయి. అంతేకాదు ఇళ్ల స్థలాలతో పాటు ఇళ్లను మహిళల పేరుతో మంజూరు చేశారు.. అందుకే పావలా వడ్డీ రుణాలు మహిళల పేరుమీదే విడుదల చేస్తున్నారు.

సీఎస్ జవహర్ రెడ్డి కలెక్టర్లతో వీడియో కాన్ఫరెన్స్‌లో పేదల ఇళ్ల నిర్మాణాల పురోగతిపై సమీక్ష చేశారు. ఇళ్ల నిర్మాణాలను మరింత వేగంగా పూర్ చేయాలని.. ప్రతి వారం ఎన్ని ఇళ్లు పూర్తి చేయాలనేది టార్గెట్‌గా పెట్టుకోవాలన్నారు. అలాగే కలెక్టర్లు తరచూ ఇళ్ల నిర్మాణాల పురోగతిని సమీక్షించాలని సూచించారు. పావలా వడ్డీ రుణాలు మంజూరు చేయించడంపై కలెక్టర్లు మరింత దృష్టి సారించాలని సీఎస్‌ ఆదేశించారు. లబ్ధిదారులకు మరింత ఆర్థిక వెసులుబాటు కల్పించేలా బ్యాంకుల ద్వారా పావలా వడ్డీకే రుణాలు మంజూరు చేస్తున్నామంటున్నారు అధికారులు.