ఏలూరులో నకిలీ సర్టిఫికేట్ల ముఠా అరెస్ట్,,,పది నుంచి ఇంజినీరింగ్ వరకు సర్టిఫికేట్లు

ఏలూరులో నకిలీ సర్టిఫికేట్లు తయారు చేస్తున్న ముఠాను అరెస్ట్ చేశారు పోలీసులు. ఏలూరుకు చెందిన దినేష్, సోంబాబు మధ్య పరిచయం ఏర్పడింది. గతంలో ఏలూరులోని పలు కళాశాలల్లో నూతన విద్యార్థులను చేర్పించే సమయంలో ఇద్దరి మధ్య స్నేహం కుదిరింది. డబ్బుల సంపాదన కోసం ఇద్దరూ నకిలీ సర్టిఫికేట్లను తయారు చేసి విక్రయించాలని రంగంలోకి దిగారు. దినేష్‌కు కంప్యూటర్‌ పరిజ్ఞానం ఉండటంతో చెన్నైలో ప్రింటర్లు, ల్యాప్‌ట్యాప్‌, ధ్రువపత్రాలకు ఉపయోగించే పేపర్లు, హోలోగ్రామ్‌లు, రబ్బరుస్టాంప్‌లు కొనుగోలు చేసి నకిలీ సర్టిఫికేట్లు తయారు చేశాడు.

దినేష్ పదో తరగతి నుంచి పీజీ వరకు ఏ సర్టిఫికేట్ కావాలన్నా ఆయా కాలేజీల లోగోలతో తయారు చేసి, ఆన్‌లైన్‌ ద్వారా ఆర్థిక లావాదేవీలు జరిపేవాడు. ఆ తర్వాత పోస్టు ద్వారా ఈ సర్టిఫికేట్లను పంపుతారు. అర్హతను బట్టి ఒక్కో సర్టిఫికేట్‌కు రూ.10వేల నుంచి రూ.1.50లక్షల వరకు వసూలు చేస్తారు. ఇటీవల ఏలూరుకు చెందిన ఓ కాలేజీ పేరుతో సర్టిఫికేట్ ఇవ్వడంతో ఈ వ్యవహారం బయటపడింది. సదరు కాలేజీ యాజమాన్యం నిందితులను పట్టుకునేందుకు ఓ ప్లాన్ చేశారు.

తమకు కూడా సర్టిఫికేట్ కావాలని చింతలపూడికి చెందిన సోంబాబును సంప్రదించారు. అతడు చింతలపూడి రావాలని చెప్పడంతో కాలేజీ సిబ్బంది శనివారం అక్కడికి వచ్చారు. అతడితో మాట్లాడిన తర్వాత చింతలపూడి పోలీసులకు సమాచారం ఇచ్చారు.. ఆ వెంటనే పోలీసులు ఏలూరులో దినేష్ ఇంటిపై దాడిచేసి ల్యాప్‌ట్యాప్‌, ప్రింటర్లు, నకిలీ సర్టిఫికేట్‌లు, రబ్బరు స్టాంపులు, హోలోగ్రామ్స్‌, పెన్‌డ్రైవ్‌, రెండు మొబైల్స్ స్వాధీనం చేసుకున్నారు. ఈ ముఠా రెండు తెలుగు రాష్ట్రాల్లో దాదాపుగా 50 మందికి పైగా నకిలీ సర్టిఫికేట్లను విక్రయించినట్లు ప్రాథమిక విచారణలో తేలింది. వీరిని అరెస్టు చేసి కోర్టులో హాజరుపరిచినట్లు పోలీసులు తెలిపారు.