"డీమానిటైజేషన్ బేబీ" బర్త్‌డే నిర్వహించిన అఖిలేష్ యాదవ్

ఉత్తర్‌ప్రదేశ్ మాజీ సీఎం, సమాజ్ వాదీ పార్టీ అధినేత అఖిలేష్ యాదవ్.. తాజాగా ఒక బాలుడి బర్త్‌డే పార్టీలో పాల్గొన్నారు. అయితే అందులో వింత ఏముంది అనుకుంటున్నారా. ఆ బాలుడి పుట్టుకే ఒక ప్రత్యేకమైన పరిస్థితుల్లో జరిగింది. బాలుడు పుట్టగానే ఆ కుటుంబానికి గతంలోనే ఇల్లు బహుమతిగా ఇచ్చిన అఖిలేష్ యాదవ్.. ఆ తర్వాత అతని మొదటి పుట్టినరోజు సందర్భంగా ఆ గ్రామాన్నే దత్తత తీసుకుని అభివృద్ధి చేశారు. ఆ బాలుడి పేరే ఖాజాంచి. ఆ బాలుడిని డీమానిటైజేషన్ బేబీ అని కూడా పిలుస్తారు.

ఆ ఖాజాంచి అనే బాలుడు 2016 లో జన్మించాడు. అయితే ఈ ఏడాది కేంద్రంలో అధికారంలో ఉన్న మోదీ సర్కార్ సంచలన నిర్ణయం తీసుకుంది. డీమానిటైజేషన్ పేరుతో రూ.500, రూ.1000 నోట్లను రద్దు చేస్తూ కీలక నిర్ణయం తీసుకుంది. అయితే ప్రజల వద్ద ఉన్న డబ్బులను బ్యాంకులో డిపాజిట్ చేసి కొత్త నోట్లు తీసుకోవాలని కేంద్రం ఆదేశాలు జారీ చేసింది. ఈ క్రమంలోనే ఆ ఖాజాంచి కడుపులో ఉండగా.. ఆమె తల్లి నిండు గర్భవతిగా ఉండి డబ్బుల కోసం బ్యాంకు ముందు లైనులో వేచి ఉంది. అదే సమయంలో ఆమెకు పురిటి నొప్పులు ఎక్కువై బాలుడు జన్మించాడు. దీంతో అప్పటినుంచి ఖాజాంచిని డీమానిటైజేషన్ బేబీ అని పిలుస్తారు.

ఈ విషయం తెలుసుకున్న అఖిలేష్ యాదవ్.. బాలుడి కుటుంబ సభ్యులను పిలిపించారు. వారికి ఒక ఇంటిని గిఫ్ట్‌గా అందించారు. ఆ బాలుడు పుట్టిన తర్వాత అతడి సొంత గ్రామమైన సర్దార్‌పూర్వ గ్రామాన్ని అఖిలేష్ యాదవ్ అభివృద్ధి చేశారు. ఆ తర్వాత ఖాజాంచి మొదటి బర్త్ డేకు అతడి కుటుంబం అనంత్‌పూర్వా గ్రామానికి వలస వెళ్లగా ఆ గ్రామాన్ని అఖిలేష్ యాదవ్ దత్తత తీసుకున్నారు. బాలుడు పుట్టిన తర్వాత తొలి పుట్టిన రోజుకు రూ.10 వేల నగదును కూడా అతని కుటుంబానికి అందించాడు.

ఈ క్రమంలోనే ఖాజాంచి కుటుంబానికి అఖిలేష్ యాదవ్‌కు మంచి సంబంధాలు ఏర్పడ్డాయి. ఇందులో భాగంగానే 2021 లో కాన్పూర్‌లో సమాజ్ వాదీ పార్టీ నిర్వహించిన విజయ్ యాత్రలో అఖిలేష్ యాదవ్‌తో కలిసి ఖాజాంచి పాల్గొన్నాడు. ఖాజాంచి తనకు ప్రత్యేకమైన వ్యక్తి అని అఖిలేష్ యాదవ్ గతంలోనే పేర్కొన్నారు. ఈ క్రమంలోనే తాజాగా ఖాజాంచి ఏడో బర్త్‌డే సందర్భంగా దగ్గరుండి మరీ అఖిలేష్ యాదవ్ కేక్ కట్ చేయించారు. అనంతరం రూ.11 వేల నగదు కూడా అందించారు. బ్లేజర్ వేసుకుని లడ్డూలు, దీపాల మధ్య ఉన్న ఆ బాలుడి బర్త్‌డేను అఖిలేష్ యాదవ్ ఘనంగా నిర్వహించారు.