గుండె సమస్యతో బాధపడుతున్న చంద్రబాబు,,,,హైకోర్టుకు చంద్రబాబు ఆరోగ్య పరిస్థితిపై నివేదిక

తెలుగుదేశం పార్టీ జాతీయ అధ్యక్షుడు, ఏపీ మాజీ సీఎం నారా చంద్రబాబు నాయుడు ఆరోగ్య పరిస్థితిపై ఏపీ హైకోర్టు కు న్యాయవాదులు రిపోర్టు సమర్పించారు. అయితే.. ఈ నివేదికలో కీలక విషయాలు వెల్లడించారు. చంద్రబాబుకు కంటి ఆపరేషన్ చేసిన వైద్యులు.. ఆయన ప్రస్తుత ఆరోగ్య పరిస్థితిని, తీసుకోవాల్సిన జాగ్రత్తల గురించి నివేదికలో పేర్కొన్నారు. బాబు కుడి కంటికి ఆపరేషన్ నిర్వహించగా.. కోలుకునేందుకు సమయం పడుతుందని సూచించారు. 5 వారాల పాటు కంటి చెకప్ కోసం షెడ్యూల్ కూడా ఇచ్చారు. ఈ 5 వారాల పాటు ఇన్‍ట్రా ఆక్యులర్ ప్రెజర్ చెక్ చేసుకోవటంతో పాటు కంట్లో చుక్కల మందులు వేసుకోవాలని వైద్యులు సూచించినట్టు పేర్కొన్నారు.

ఇదే కాకుండా.. మరోవైపు చంద్రబాబు గుండె సంబంధిత సమస్యతో బాధపడుతున్నట్టుగా నివేదికలో తెలిపారు. చంద్రబాబు గుండె పరిణామం పెరిగిందని.. గుండెకు రక్తం సరఫరా చేసే రక్తనాలాల్లో సమస్యలున్నాయని పేర్కొన్నారు. బాబుకు తగినంత విశ్రాంతి అవసరమని సూచించారు. షుగర్‌ను అదుపులో ఉంచి.. జాగ్రత్తలు పాటించాలని పేర్కొన్నారు. స్కిన్ ఎలర్జీకు సంబంధించి కూడా చంద్రబాబు తగిన జాగ్రత్తలు తీసుకోవాలి. ఇదిలా ఉంటే.. బాబుకు స్కిన్ ఎలర్జీ కూడా పెరిగిందని వైద్యులు పేర్కొన్నట్టు తెలిపారు. గుండె సమస్యతో పాటు ఎలర్జీని కంట్రోల్ చేసేందుకు మూడు నెలల పాటు చికిత్స అవసరమని వైద్యులు సూచించినట్టు తెలిపారు. అయితే.. ప్రజా జీవితం గడిపేటప్పుడు.. చంద్రబాబు వెంట 24 గంటల పాటు ACLS అంబులెన్స్‌‌తో పాటు ట్రెయిన్డ్ డాక్టర్ కూడా కచ్చితంగా అందుబాటులో ఉండేలా చూసుకోవాలని వైద్యులు సూచించినట్టు న్యాయవాదులు నివేదికలో పేర్కొన్నారు.