కారులో దర్జాగా వచ్చి ఇంటి ముందున్న పూల కుండీలు దొంగతనం
national | Suryaa Desk | Published : Wed, Nov 15, 2023, 08:06 PM
రాత్రి సమయంలో ఓ ఇంటి ముందు తెల్లటి కారు వచ్చి ఆగింది. దాని నుంచి కిందకు దిగిన ఇద్దరు అమ్మాయిలు.. మెల్లగా గేటు వద్దకు నడుచుకుంటూ వచ్చారు. వాళ్లు ఆ ఇంటికి వచ్చిన అతిథులు అనుకుంటే పప్పులే కాలేసినట్టే. కాంపౌండు వాల్ గేటు వద్ద పూల కుండీలను ఎత్తుకుని కారులో పరారయ్యారు. ఈ తతంగం మొత్తం అక్కడ ఉన్న సీసీటీవీ కెమెరాల్లో రికార్డయ్యింది. ప్రస్తుతం దీనికి సంబంధించిన వీడియో సోషల్ మీడియాలో వైరల్ అవుతోంది. పంజాబ్లోని మొహాలీలో ఈ ఘటన చోటుచేసుకుంది. మొహలీ సెక్టార్ 78లో ఓ ఇంటి ముందు డిజైర్ కారు వచ్చి ఆగడం.. అందులో నుంచి ఇద్దరు అమ్మాయిలు దిగడం.. కాపౌండ్ వాల్ గేటు వద్దకు వచ్చిన ఆ ఇద్దరూ అటుఇటూ చూస్తూ పూల కుండీలను తీసుకుని వెళ్లిపోయారు.. కారు ఎక్కి కొద్దిగా ముందుకెళ్లిన తర్వాత ఓ అమ్మాయి మళ్లీ వచ్చి ఇంకో పూల కుండీని ఎత్తుకెళ్లింది. మరికాసేపటికి ఇంకోసారి ఇద్దరూ వచ్చి చెరో పూల మొక్కలను ఎత్తుకుని కారు ఎక్కారు. ఈ దొంగతనం మొత్తం ఆ ఇంటి ముందు ఉన్న సీసీటీవీ ఫుటేజ్లో రికార్డయ్యింది. ఈ వీడియోను ట్విట్టర్లో షేర్ చేయడంతో వైరల్గా మారింది. నెటిజన్లు దీనిపై భిన్నంగా స్పందిస్తున్నారు. ఇది కేవలం కామెడీ కోసం చేసినట్టుందని కొందరంటే.. వీళ్లను బిగ్బాస్లోకి పంపాలని కొందరు కామెంట్ చేస్తున్నారు. ఇది హైటెక్ దొంగతనమని, ఇంటి ముందు సీసీటీవీ కెమెరాలు ఉంటాయని వారికి తెలియనట్టుందని మరొకరు ట్వీట్ చేశారు.
|
|