భారత్ అప్పీల్‌కు ఖతార్ కోర్టు అంగీకారం.. ఆ 8 మంది కుటుంబాలకు రిలీఫ్

గుడ్ న్యూస్.. ఖతార్‌లో మరణ శిక్ష పడిన 8 మంది మాజీ నేవీ అధికారులకు శిక్ష తగ్గించేందుకు, కుదిరితే విడిపించేందుకు భారత్ చేస్తున్న ప్రయత్నాలు ఫలిస్తున్నాయి. వారికి విధించి శిక్షను అధ్యయనం చేయాలంటూ భారత్ చేసిన అభ్యర్థనకు ఖతార్ కోర్టు అంగీకరించింది. దీంతో వారికి విధించిన మరణ శిక్షను మార్చే అవకాశం ఉంది. ఈ 8 మంది భారత మాజీ నేవీ అధికారులకు మరణ శిక్ష విధిస్తూ ఖతార్ న్యాయస్థానం అక్టోబర్ 26న తీర్పు వెలువరించడంతో భారత ప్రభుత్వం షాకైంది.

విదేశాంగ మంత్రి బాధితుల కుటుంబాలతో మాట్లాడారు. న్యాయ నిపుణులతో మాట్లాడుతున్నామని.. బాధితులకు అన్ని విధాలా అండగా ఉంటామని హామీ ఇచ్చారు. దహ్రా గ్లోబల్‌ అనే సంస్థ తరఫున ఖతార్ నేవీకి శిక్షణ ఇచ్చేందుకు వెళ్లిన ఈ 8 మందిని గత ఏడాది దోహాలో అరెస్ట్ చేశారు. ఎందుకు అరెస్ట్ చేశారో కూడా చెప్పకుండా.. ఖతార్ అధికారులు వారిని అప్పటి నుంచి ఏకాంత నిర్బంధంలో ఉంచారు.

ఖతార్‌ కోర్టు మరణ శిక్ష విధించిన వారిలో నవతేజ్ సింగ్ గిల్, బీరేంద్ర కుమార్ వర్మ, సౌరభ్ వశిష్ట్‌ ఇంతకు ముందు ఇండియన్ నేవీలో కెప్టెన్లుగా పని చేశారు. అమిత్ నాగ్‌పాల్, పూర్ణేందు తివారీ, సుగుణాకర్ పాకాల, సంజీవ్ గుప్తా నేవీలో కమాండర్లుగా వ్యవహరించారు. రాగేష్‌ సెయిలర్‌గా పని చేశారు.

ఖతార్‌తో సంబంధాలను బలోపేతం చేసుకోవాలని భారత్ చూస్తోంది. ఇలాంటి పరిస్థితుల్లో ఖతార్ న్యాయస్థానం ఒకేసారి 8 మంది భారత మాజీ నేవీ అధికారులకు మరణ శిక్ష విధించడంతో.. ఇరు దేశాల మధ్య సంబంధాలు సున్నితంగా మారాయి. ఖతార్‌లో 8 లక్షల మంది భారతీయులు ఉండగా.. ఆ దేశం నుంచి మనం భారీ మొత్తంలో సహజవాయువును దిగుమతి చేసుకుంటున్నాం.

ఖతార్‌తో దౌత్యపరంగా చర్చలు జరిపిన భారత ప్రభుత్వం.. భారత మాజీ నేవీ అధికారులను ఏకాంత నిర్బంధం నుంచి అందర్నీ జైల్లో ఒకే వార్డులో ఉంచేందుకు ఒప్పించింది. ఇప్పుడు ఖతార్ కోర్టు కూడా శిక్ష విషయంలో భారత ప్రభుత్వ అభ్యర్థనను పరిశీలిస్తామని చెప్పడంతో.. తమ వారికి శిక్ష తగ్గుతుందని వారి కుటుంబీకులు ఆశిస్తున్నారు.