సనాతన ధర్మాన్ని తిడితే ఫలితం ఇంతే.. కాంగ్రెస్‌పై మాజీ క్రికెటర్ విమర్శలు

2024 సార్వత్రిక ఎన్నికలకు సెమీఫైనల్‌గా రాజకీయ విశ్లేషకులు భావించిన ఐదు రాష్ట్రాల శాసనసభ ఎన్నికల్లో కాంగ్రెస్ పార్టీకి ఎదురుగాలి వీచింది. ఐదురాష్ట్రాలకు ఎన్నికలు జరగ్గా.. నాలుగు రాష్ట్రాలలో ఆదివారం ఫలితాలు వెల్లడి అవుతున్నాయి. మిజోరాంలో సోమవారం ఫలితాలు వెల్లడికానున్నాయి. అయితే నాలుగురాష్ట్రాలలో కేవలం తెలంగాణలో మాత్రమే హస్తం పార్టీ అధికారాన్ని కైవసం చేసుకునేలా కనిపిస్తోంది. మిగతా చోట్ల ఆ పార్టీ వెనుకంజలో ఉంది. అధికారం వైపు బీజేపీ దూసుకెళ్తోంది. ఈ నేపథ్యంలో కాంగ్రెస్ పార్టీ వెనుకబాటుపై వివిధ రకాల అభిప్రాయాలు వ్యక్తమవుతున్నాయి.

టీమిండియా మాజీ క్రికెటర్ వెంకటేశ్ ప్రసాద్ కూడా కాంగ్రెస్ పార్టీ వెనుకంజ వేయటంపై స్పందించాడు. సనాతన ధర్మాన్ని దుర్భాషలాడిన ఫలితమే కాంగ్రెస్ పార్టీ వెనుకబడటానికి కారణమని ఎక్స్ వేదికగా ట్వీట్ చేశాడు. సనాతన ధర్మాన్ని దుర్భాషలాడితే దాని పర్యవసనాలను ఎదుర్కోవాల్సి ఉంటుందంటూ ట్వీట్ టేశాడు. తమిళనాడు మంత్రి, డీఎంకే నేత ఉదయనిధి స్టాలిన్ సనాతన ధర్మాన్ని నిర్మూలించాలి అంటూ ఎన్నికలకు ముందు పెద్ద రాజకీయ వివాదాన్ని రేకెత్తించారు. ఉదయనిధి స్టాలిన్ చేసిన ఈ వ్యాఖ్యల పట్ల దేశవ్యాప్తంగా ఆగ్రహావేశాలు వ్యక్తమయ్యాయి. హిందూ ధార్మిక సంఘాలు, భజ్ రంగ్ దళ్, వీహెచ్‌పీ, బీజేపీ స్టాలిన్ వ్యాఖ్యలను తీవ్రంగా ఖండించాయి. వెంటనే మంత్రిపదవి నుంచి తొలగించాలని డిమాండ్ చేశాయి. ఐదు రాష్ట్రాల ఎన్నికల ముందు జరిగిన ఈ ఘటన.. బీజేపీకి కాస్త అనుకూలంగా మారిందనే చెప్పొచ్చు.

ప్రధాని మోదీ సైతం పలు సభలలో ఈ విషయాన్ని ప్రస్తావిస్తూ కాంగ్రెస్ పార్టీ అధికారంలోకి వస్తే సనాతన ధర్మాన్ని నాశనం చేస్తుందంటూ విమర్శించారు. అయితే డీఎంకే మిత్రపక్షమైన కాంగ్రెస్ పార్టీ ఈ వివాదం నుంచి దూరంగా ఉండేందుకు ప్రయత్నించింది. అన్ని మతాలను సమానంగా గౌరవించడమే తమ విధానమంటూ చెప్పుకొచ్చింది. అయితే ఎన్నికల ఫలితాల్లో కాంగ్రెస్ పార్టీ వెనుకబడిన నేపథ్యంలో వెంకటేశ్ ప్రసాద్ ఈ అంశాన్ని మరోసారి ప్రస్తావిస్తూ ట్వీట్ చేశాడు. ఇదే సమయంలో విజయం సాధించిన బిజేపీకి అభినందనలు తెలియజేశాడు. చరిత్రాత్మక విజయాన్ని సాధించిన బీజేపికి అభినందనలు అంటూ ట్వీట్ చేసిన టీమిండియా మాజీ క్రికెటర్.. ప్రధాని నరేంద్ర మోదీ, అమిత్ షాల అద్భుతమైన నాయకత్వానికి, క్షేత్రస్థాయిలో బీజేపీ కార్యకర్తలు చేసిన కృషికి ఈ విజయం మరో నిదర్శమని అభిప్రాయపడ్డాడు.