మధ్యప్రదేశ్ ఎన్నికల్లో కాంగ్రెస్‌కు ఘోర పరాభవం,,,,వరుసగా ఐదోసారి బీజేపీని ఆదరించిన ఓటర్లు

మధ్యప్రదేశ్ అసెంబ్లీ ఎన్నికల్లో బీజేపీ అద్భుత విజయం దిశగా సాగుతోంది. ప్రస్తుతం ఆ పార్టీ 160కిపైగా స్థానాల్లో ఆధిక్యంలో కొనసాగుతుండగా.. కాంగ్రెస్ 64 స్థానాలకే పరిమితమయ్యింది. 2018 ఎన్నికలతో పోల్చితే బీజేపీ 52 సీట్లను అదనంగా గెలుచుకోగా.. కాంగ్రెస్ 48 స్థానాలను కోల్పోయింది. అయితే, 2018లో కాంగ్రెస్ 114 స్థానాల్లో గెలుపొందడానికి గ్వాలియర్ యువరాజు జ్యోతిరాదిత్య సింధియా కూడా కారణం. చంబల్-గ్వాలియర్ ప్రాంతంలో బలమైన నేతగా ఉన నాయకత్వంలో 34 సీట్లలో 26 స్థానాలను కాంగ్రెస్ పార్టీ గెలుచుకుంది. అక్కడ 2013లో 12, 2008లో 13 సీట్లలో గెలించింది.

అయితే, ఈసారి ఆయన బీజేపీలో ఉండటంతో ఆ ప్రాంతంలో ప్రస్తుతం కమలనాథులు గణనీయంగా లబ్ది పొందినట్టు తెలుస్తోంది. చంబల్-గ్వాలియర్ ప్రాంతంలో ఎనిమిది జిల్లాలు ఉండగా.. గ్వాలియర్, శివపురి, డాటియా, అశోక్‌నగర్, గుణలు గ్వాలియర్ ప్రాంతంలోనూ.. మోరెనా, భింద్, షియోపూర్‌లు చంబల్‌‌లో భాగంగా ఉన్నాయి. ఈ ప్రాంతాలన్నీ ఒకప్పుడు గ్వాలియర్ స్థానంలో భాగంగా ఉన్నాయి. ఇక, 2018 ఎన్నికల్లో చంబల్‌లోని 13 స్థానాల్లో పదింటిలో కాంగ్రెస్ విజయం సాధించింది.

1971 వరకూ సింధియాలకు కంచుకోటగా ఉన్న గ్వాలియర్‌లో 21 సీట్లు ఉండగా.. 2018 ఎన్నికల్లో ఇందులో ఐదు మినహా మిగతా అన్ని స్థానాల్లోనూ కాంగ్రెస్ విజయం సాధించింది. తాజాగా, ఇక్కడ బీజేపీ క్లీన్ స్వీప్ చేసే దిశగా సాగుతోంది. తాజా ఫలితాలపై జ్యోతిరాదిత్య సింధియా మాట్లాడుతూ.. కాంగ్రెస్ నాయకురాలు, ప్రియాంక గాంధీ తనను ఉద్దేశించి చేసిన వ్యాఖ్యలకు కౌంటర్ ఇచ్చారు. ‘ఎవరో నా ఎత్తు గురించి మాట్లాడారు (కానీ) గ్వాలియర్-మాల్వా ప్రజలు ఎంత ఎత్తులో ఉన్నారో చూపించారు’ అని అన్నారు.‘బీజేపీ గెలుస్తుందని నేను చెప్పాను.. ఇంత పెద్ద విజయాన్ని ఇచ్చిన మధ్యప్రదేశ్ ప్రజలకు ధన్యవాదాలు..ప్రధానమంత్రి మోదీ నాయకత్వం పని చేసింది.. కేంద్ర హోం మంత్రి అమిత్ షా, బీజేపీ అధ్యక్షుడు జేపీ నడ్డా మార్గదర్శకత్వం కూడా పనిచేసింది’ అని వ్యాఖ్యానించారు.