కాకినాడ నుంచి నక్కపల్లికి.. బల్క్ డ్రగ్‌ పార్కు కేంద్రం ఆమోదం

ఏపీలో ఏర్పాటుకానున్న బల్క్ డ్రగ్ పార్క్‌కు సంబంధించి కేంద్రం కీలక నిర్ణయం తీసుకుంది. బల్క్‌ డ్రగ్‌ పార్కును కాకినాడ నుంచి అనకాపల్లి జిల్లా నక్కపల్లికి మారుస్తూ రాష్ట్ర ప్రభుత్వం తీసుకున్న నిర్ణయానికి గ్రీన్ సిగ్నల్ వచ్చింది. ఈ మేరకు కేంద్రం ఆమోదం తెలిపింది. తెలంగాణ వంటి 16 రాష్ట్రాలతో పోటీ పడి రాష్ట్ర ప్రభుత్వం ఈ ప్రాజెక్టును దక్కించుకుంది. ఈ పార్క్ పూర్తిగా పర్యావరణహితమైన అత్యాధునిక సాంకేతిక పరిజ్ఞానంతో అభివృద్ధి చేస్తారు. ఈ పార్కును కేంద్రం, రాష్ట్ర ప్రభుత్వాలు సంయుక్తంగా మొత్తం 2 వేల ఎకరాల్లో ఏర్పాటు చేస్తున్నారు. ఇక్కడ రూ.2,190 కోట్లతో ఫార్మాస్యూటికల్‌ పరిశ్రమల ఏర్పాటుకు అవసరమైన మౌలిక సదుపాయాలు కల్పిస్తారు. ఈ ప్రాజెక్టుకు కేంద్రం రూ.1,000 కోట్లను మంజూరు చేస్తుంది.. అలాగే రాష్ట్ర ప్రభుత్వం భూమిని సమకూరుస్తోంది. కేంద్రం మార్గదర్శకాల్లో ప్రభుత్వ భూమి మాత్రమే ఉండాలని తెలిపింది.దీంతో కాకినాడ నుంచి అనకాపల్లి నక్కపల్లి ప్రాంతానికి ఈ పార్క్‌ను మార్చారు.

ప్రధానంగా నక్కపల్లి దగ్గర ఏపీఐఐసీ భూమి అందుబాటులో ఉండటంతో పాటుగాజ.. అక్కడ ఇప్పటికే ఫార్మా రంగానికి చెందిన పలు పరిశ్రమలు ఉండటంతో రాష్ట్ర మంత్రివర్గం ఇటీవల ఈ నిర్ణయం తీసుకున్న సంగతి తెలిసిందే. కేంద్రం కూడా ఇప్పుడు ఆమోదం తెలపడంతో.. త్వరలోనే టెండర్లను జ్యుడిషయల్ ప్రివ్యూకు పంపుతోంది ఏపీఐఐసీ. న్యాయపరిశీలన అనంతరం ఆమోదం రాగానే టెండర్లు పిలుస్తారు. చైనా నుంచి ఫార్మా దిగుమతులను అరికట్టాలన్న ఉద్దేశంతో దేశంలో మూడు బల్క్‌ డ్రగ్‌ పార్కులు ఏర్పాటు చేయాలని కేంద్రం నిర్ణయించింది. వీటిలో ఒకటి ఏపీకి వచ్చింది. ఈ పార్క్ ఏర్పాటుతో ఆంధ్రప్రదేశ్‌ రాష్ట్రం ఫార్మా హబ్‌గా తయారవుతుందని ప్రభుత్వం చెబుతోంది. రూ.14,340 కోట్లకు పైగా పెట్టుబడులు వస్తాయని అంచనా వేస్తున్నారు. ఈ పార్క్ ద్వారా 30,000 మందికి ప్రత్యక్షంగా.. 40,000 మందికి పరోక్షంగా ఉపాధి లభిస్తుందని భావిస్తున్నారు. ప్రస్తుతం రాష్ట్రంలో 200కు పైగా ఫార్మా యూని­ట్లు ఉండగా.. బల్క్‌ డ్రగ్‌ పార్కు ద్వారా అదనంగా 100కు పైగా యూనిట్లు వస్తాయని అంచనా వేస్తున్నారు.