ఐఏఎస్ అధికారిణి ఆమ్రపాలి తెలుగు ఆడపడుచే.. సొంత ఊరు ఎక్కడంటే

ఐఏఎస్ ఆమ్రపాలి.. తెలంగాణ కేడర్ అధికారి. గతంలో కేంద్రంలో విధులు నిర్వహించి.. ఇటీవలే తెలంగాణకు తిరిగి వచ్చేశారు. హెచ్‌ఎండీఏ కమిషనర్‌గా కీలక బాధ్యతలు అప్పగించింది రేవంత్ రెడ్డి ప్రభుత్వం. తెలుగు రాష్ట్రాలతో పాటుగా దేశ వ్యాప్తంగా ఐఏఎస్‌లలో ప్రత్యేకమైన గుర్తింపు తెచ్చుకున్న ఆమ్రపాలి మన తెలుగు ఆడపడుచే. ఆమె స్వస్థలం ప్రకాశం జిల్లా ఒంగోలు నగర శివారులోని ఎన్ అగ్రహారం (నర్సాపురం అగ్రహారం). విజయవాడ టు చెన్నై రైల్వే లైన్‌కు సమీపంలో గేటు దాటాక రెండు కిలో మీటర్ల దూరంలో ఈ గ్రామం ఉంది. ఆమ్రపాలి కుటుంబానికి చెందిన సొంత ఇల్లు ఎన్‌.అగ్రహారంలో ఉంది.

ఆమ్రపాలి తండ్రి పేరు కాటా వెంకటరెడ్డి.. ప్రకాశం జిల్లా టంగుటూరు మండలం ఆలకూరపాడుకు చెందిన మేనకోడలు పద్మావతిని వివాహం చేసుకున్నారు. ఆయన చిన్నతనంలో అగ్రహారంలోనే చదువుకున్నారు.. ఆయన చిన్నతనంలో పద్మావతి సొంత ఊరు ఆలకూరపాడు స్కూల్లోనే చదువుకున్నారు. ఆ తర్వాత టంగుటూరులో హైస్కూలు విద్య,.. ఒంగోలు సీఎస్‌ఆర్‌ శర్మ కాలేజీలో ఇంటర్మీడియేట్, డిగ్రీ చదివారు. విశాఖపట్నంలోని ఆంధ్రా యూనివర్సీటీలో పీజీ పూర్తి చేశారు. అదే యూనివర్సిటీలో ఎకనమిక్స్‌ ఫ్రొఫెసర్‌గా ఉద్యోగంలో చేరారు.

వెంకటరెడ్డి ఇద్దరు కుమార్తెలను బాగా చదివించారు. ఆమ్రపాలితో పాటు ఆమె సోదరి మానస గంగోత్రి కూడా 2007 బ్యాచ్‌కు చెందిన ఐఆర్‌ఎస్‌ (ఇండియన్‌ రెవెన్యూ సర్వీస్‌). ఆమె ప్రస్తుతం కర్ణాటక కేడర్‌లో ఇన్‌కంట్యాక్స్‌ విభాగంలో విధులు నిర్వహిస్తున్నారు. ఆమె ఐఆర్‌ఎస్‌లో 184వ ర్యాంక్‌ సాధించారు. మానస గంగోత్రి భర్త ప్రవీణ్‌ కుమార్‌ తమిళనాడు.. ఆయన 2010 బ్యాచ్‌కు చెందిన ఐపీఎస్‌ అధికారి. ఆయన తమిళనాడు ఐఏఎస్‌ కేడర్‌ కాగా.. ప్రస్తుతం అక్కడే పనిచేస్తున్నారు.

విశాఖపట్నంలో ఉన్నత చదువులు చదివారు ఆమ్రపాలి. 2010 ఐఏఎస్‌ బ్యాచ్‌కు చెందిన ఆమె 39వ ర్యాంక్‌ సాధించారు.. అనంతరం ట్రైనీ ఐఏఎస్‌గా, జాయింట్‌ కలెక్టర్‌గా, నగర కమిషనర్‌గా పనిచేశారు. 2018లో వరంగల్‌ జిల్లా అర్బన్, రూరల్‌ కలెక్టర్‌గా విధులు నిర్వహించారు. ఆ తర్వాత ఆమె కేంద్రానికి వెళ్లి.. అక్కడ పీఎంవోలో కీలక బాధ్యతల్ని నిర్వహించారు. ఇటీవలే మళ్లీ తెలంగాణకు తిరిగి వచ్చేశారు. ఆమ్రపాలి ప్రస్తుతం హైదరాబాద్ మెట్రోపాలిటన్ డెవలప్ మెంట్ అథారిటీ జాయింట్ మెట్రోపాలిటన్ కమిషనర్‌గా ఉన్నారు. అమ్రపాలికి 2018 ఫిబ్రవరి 18న తేదీన వివాహం జరిగింది. ఆమె భర్త జమ్మూకు చెందిన షమీర్‌ శర్మ.. ఆయన 2011 ఐపీఎస్‌ బ్యాచ్‌. ప్రస్తుతం ఆయన డామన్ డయ్యూ కేంద్రపాలిత ప్రాంతంలో ఎస్పీగా పనిచేస్తున్నారు. ఆమ్రపాలి తెలుగు ఆడపడుచుకావడం గర్వకారణమని ఒంగోలు వాసులు చెప్పుకుంటున్నారు.