ఆరోగ్యశ్రీ స్మార్ట్ కార్డులు తీసుకొచ్చిన ప్రభుత్వం,,,ఈ సేవల్ని ఎలా పొందాలో ప్రజలకు అవగాహన

ఏపీ ప్రభుత్వం ఆరోగ్యశ్రీ పథకాన్ని ప్రతిష్టాత్మకంగా తీసుకుంది. ఆరోగ్యశ్రీ పరిమితి రూ.25 లక్షలకు పెంపు, స్మార్ట్‌ కార్డుల పంపిణీ, లబ్దిదారుల కోసం ఆరోగ్యశ్రీ యాప్‌ డౌన్‌లోడ్‌ కార్యక్రమాలను తాడేపల్లిలోని క్యాంపు కార్యాలయంలో సీఎం జగన్‌ లాంఛనంగా ప్రారంభించారు. ఆరోగ్యశ్రీ ద్వారా ఉచిత వైద్య సేవలు పొందడానికి ఏం చేయాలి? ఎవరిని అడగాలి? ఎక్కడికి వెళ్లాలి? చికిత్స వ్యయం ఎంతవరకు వర్తిస్తుంది? తదితర సందేహాలను సంపూర్ణంగా నివృత్తి చేస్తూ సరికొత్త ఫీచర్లతో రూపొందించిన ఆరోగ్యశ్రీ కొత్త కార్డులను లబ్ధిదారులకు అందజేసి విస్తృత అవగాహన కల్పించాలని అధికార యంత్రాంగాన్ని సీఎం జగన్‌ ఆదేశించారు.

ఆరోగ్యశ్రీ కింద ఉచిత సేవలు పొందటాన్ని ప్రతి ఒక్కరికి వివరంగా తెలియచేసే కార్యక్రమాన్ని ఇవాళ ప్రారంభిస్తున్నామన్నారు సీఎం జగన్. మంగళవారం నుంచి ప్రతి నియోజకవర్గంలోని ఐదు గ్రామాల్లో ఆరోగ్యశ్రీ ప్రచార కార్యక్రమాలు ప్రారంభం అవుతాయన్నారు. ఎమ్మెల్యేలు, ప్రజా ప్రతినిధులు ఆయా గ్రామాల్లో వీటిని ప్రారంభిస్తారు. ఇలా ప్రతి వారం మండలానికి నాలుగు గ్రామాల చొప్పున కార్యక్రమాలు చేపట్టాలి. ఇందులో ఏఎన్‌ఎంలు, సీహెచ్‌వోలు ఒక బృందంగా, మరో బృందంలో ఆశా వర్కర్లు, ప్రజాప్రతినిధులు, ప్రభుత్వానికి మద్దతు తెలిపేవారు, ఈ కార్యక్రమంలో పాల్గొనేందుకు ఆసక్తి చూపేవారు పాలు పంచుకుంటారని తెలిపారు.

ఏపీలో ఆరోగ్యశ్రీ సేవలు ఇలా పొందండి.. పూర్తి వివరాలివే

ప్రతి ఇంటికి వెళ్లి ఆయా కుటుంబాలకు కొత్త ఆరోగ్యశ్రీ కార్డును ఇవ్వడమే కాకుండా ఉచితంగా వైద్య సేవలు ఎలా పొందాలో వివరించాలని సూచించారు సీఎం. ఇంట్లో కనీసం ఒకరి మొబైల్‌ ఫోన్‌లోనైనా ఆరోగ్యశ్రీ యాప్‌ను డౌన్‌లోడ్‌ చేయించి రిజిస్ట్రేషన్‌ చేయించాలన్నారు. ఆరోగ్యశ్రీ సేవలపై వైద్య ఆరోగ్యశాఖ రూపొందించిన 6 నిమిషాల వీడియో సందేశాన్ని ఆయా కుటుంబాలకు చూపించాలని.. వారి ఫోన్లలో కూడా ఈ వీడియోను ఉంచాలన్నారు.

ఆరోగ్యశ్రీ సేవలను ఎలా పొందాలి.. యాప్‌ వివరాలు ఇలా ఉన్నాయి..

* ఒక్కో కుటుంబానిక రూ.25 లక్షలు వరకు ఉచిత వైద్య సేవలు.

* క్యాన్సర్ చికిత్సకు పరిమితం లేకుండా ఎంత ఖర్చైనా వెనకాడక ఉచితంగా వైద్యసాయం.

* ప్రతి ఇంటికి వచ్చి అవగాహన కల్పిస్తూ.. కొత్త ఫీచర్లతో ఆరోగ్యశ్రీ కార్డుల పంపిణీ.

* ప్రతి కార్డులో క్యూ ఆర్ కోడ్, లబ్ధిదారుడి కుటుంబ సభ్యుల వివరాలు.

* ఎలక్ట్రానిక్ హెల్త్ రికార్డులో పొందుపరిచిన లబ్ధిదారుడి వివరాలు ఆబా ఐడీ.

* 2308 నెట్ వర్క్ ఆస్పత్రుల ద్వారా.. 30 స్పెషాల్టీస్‌కి సంబంధించి.. 3257 ప్రోసీజర్స్ అనుసరించి.. ఏటా 3600 కోట్ల రూపాయల వ్యయం చేయడం మాత్రమే కాకుండా ఆరోగ్య ఆసరాకు కూడా రూ.500 కోట్ల ఖర్చు చేస్తున్నారు

ఈ పథకం కింద ఉచిత వైద్యం పొందడం ఎలా?

* 104కి కాల్ చేయడం ద్వారా.. వాలంటీర్‌కు చెప్పడం ద్వారా, విలేజ్ క్లినిక్‌లో సంప్రదించడం ద్వారా, ఎమర్జెన్సీ సమయాల్లో 108కి కాల్ చేయడం ద్వారా

ఫ్యామిలీ డాక్టర్‌ని కన్సల్ట్ చేయడం ద్వారా, ప్రాధమికర వైద్య కేంద్రం (PHC) ద్వారా, ఆరోగ్య శ్రీ పథకం కింద సంబంధిత నెట్‌వర్క్ ఆస్పత్రిలో ఉచిత వైద్యం పొందవచ్చు.

* ఐదు లక్షలలోపు సంవత్సర ఆదాయం ఉన్న అందరూ అర్హులే.

* ఆరోగ్యశ్రీ యాప్‌ని డౌన్‌లోడ్ చేసుకుని అందులో ఆరోగ్యశ్రీ ద్వారా ఎలా లబ్ది పొందాలో తెలుస్తుంది.

* ఈ యాప్‌లో ఆధార్ నంబర్‌తో లాగిన్ అయితే.. కుటుంబ సభ్యుల ఆరోగ్య సమాచారం కనిపిస్తుంది.

* దగ్గరలోనే ఆస్పత్రులు, వైద్య సేవలతో పాటూ, రావాల్సిన ఆరోగ్య ఆసరా సమాచారం తెలుస్తుంది.

* ఆరోగ్య మిత్రను ఎలా సంప్రదించాలో తెలుస్తుంది.

ఆరోగ్య శ్రీ ఆస్పత్రికి ఏయే పత్రాలు తీసుకెళ్లాలి?.. ఎవరిని కలవాలి?.. అక్కడ ఏయే సేవలు ఉచితంగా అందిస్తారు

* ఆస్పత్రికి వెళ్లినప్పుడు ఆరోగ్యశ్రీ కార్డు, ఆధార్ కార్డు, ఆరోగ్యశ్రీ కార్డులో ఉండే కుటుంబ సభ్యుల బ్యాంకు ఖాతా వివరాలను తప్పనిసరిగా తీసుకెళ్లాలి.

* ప్రభుత్వానికి, ప్రజలకు వారధిగా.. ఆరోగ్యశ్రీ నెట్ వర్క్ ఆస్పత్రుల్లో ఆరోగ్య మిత్రలు సహకారం అందిస్తారు

* ఆరోగ్యశ్రీ యాప్‌లో లాగిన్ అయితే ఆరోగ్య మిత్రల నంబర్లు కూడా ఉంటాయి

* నేరుగా కానీ, నంబర్‌కు ఫోన్ చేసి సంప్రదించొచ్చు

ఆస్పత్రిలో ఉచితంగా అందించే వైద్య సేవలివే

* ఉచిత అడ్మిషన్

* డాక్టర్ సంప్రదింపులు (ప్రతి రోజు)

* నర్సింగ్ సేవలు (ప్రతి రోజు)

* అవసరమైన ఆధునిక వైద్య పరీక్షలు

* అవసరమైన మందులన్నీ ఉచితంగా ఇవ్వబడును

* శస్త్ర చికిత్స (ఆపరేషన్ చికిత్స)

* శస్త్ర చికిత్సకు అవసరమైన ఇంప్లాంట్లు

* అల్పాహారం, భోజనం (రెండు పూటలు)

* డిశ్చార్జ్ సమయంలో సరిపడా మందులు

* డిశ్చార్జ్ అయ్యేటప్పుడు రెస్ట్ పిరియడ్ కోసం అయ్యే ఖర్చుల డబ్బులు ఆరోగ్య ఆసరా ద్వారా నేరుగా అకౌంట్‌కు జమ చేస్తారు.

* ఇంటికి వెళ్లడానికి అవసరమయ్యే ఛార్జీలు సైతం ఉచితం.

* 10 రోజుల తర్వాత ఆస్పత్రికి వచ్చి మళ్లీ ఉచితంగా చూపించుకోవచ్చు

* అవసరమైన చికిత్సలకు ఏడాది పాటూ డాక్టర్ సంప్రదింపులు, మందులు, వైద్య పరీక్షలు ఉచితం

* డిశ్చార్జ్ సమయంలో ఎలాంటి ఇబ్బందులు రాలేదని.. సొంత డబ్బులు చెల్లించలేదని.. ఏ అవసరానికి ఎవరికి డబ్బులు ఇవ్వలేదని.. ఏ టెస్టులకు డబ్బులు కట్టించుకోలేదని పత్రం ఇవ్వాల్సి ఉంటుంది. సమ్మతి పత్రం కూడా ఇవ్వాలి.

* ఒకవేళ ఎవరైనా డబ్బులు తీసుకుంటే.. వారిపై చర్యలు తీసుకుంటారు

* వైద్యుల సలహా మేరకు విశ్రాంతి తీసుకునే సమయంలో రోజుకు రూ.225 చొప్పున నెలకు రూ.5వేలు ఆర్థిక సాయం అందిస్తారు. ఈ డబ్బుల్ని ఆస్పత్రి నుంచి డిశ్చార్జ్ అయ్యేలోపు బ్యాంకులో జమ చేస్తారు.

* అంతేకాదు ప్రతి 3 నెలలకు ఒకసారి ఫాలో అప్ కన్సల్టేషన్ కోసం ప్రయాణ, ఇతర ఖర్చులకు రూ.300 జమ చేస్తారు. ఈ మొత్తం వివరాలు http://www.ysrarogyasri.ap.gov.in/ ద్వారా.. లేదా ఆరోగ్య శ్రీ యాప్ ద్వారా తెలుసుకోవచ్చు.

ఆరోగ్య శ్రీ సేవలు సంత్రుప్తికరంగా లేకుంటే..

* 104కి ఫోన్ చేసి కంప్లైంట్ చేయొచ్చు.. ఈ ఫిర్యాదు జగనన్నకు చెబుదాం కాల్ సెంటర్‌కు అనుసంధానమవుతుంది. తద్వారా త్వరిత గతిన చర్యలు తీసుకోబడతాయి. ఒకవేళ ఎవరైనా డబ్బులు అడిగితే 14400 నంబర్‌కు ఫోన్ చసి ఫిర్యాదు చేయొచ్చు.

* క్యాన్సర్ తదితర ధీర్ఘకాలిక వ్యాధులకు వైద్యం తీసుకుంటే షెడ్యూల్ ప్రకారం.. అందాల్సిన వైద్యానికి స్థానిక ఏఎన్‌ఎం, సీహెచ్‌వోలు సహాయపడతారు

* ధీర్ఘకాలిక వ్యాధులతో బాధపడే వారికి ఖరీదైన మందులు క్రమం తప్పకుండా వారి ఇంటికే ఉచితంగా సీహెచ్‌వో ద్వారా పంపే ఏర్పాటు ఉంటుంది.

* ఆరోగ్యశ్రీ ఒక్కసారి చికిత్స చేసుకున్నా సరే మళ్లీ, మళ్లీ వైద్య సాయం పొందొచ్చు. ఒక కుటుంబంలో ఎందరైనా సరే నెట్ వర్క్ ఆష్పత్రుల్లో వైద్య సేవలు ఉచితంగా పొందొచ్చు.