కోవిడ్ జేఎన్‌.1 వేరియెంట్‌పై ఏపీ ప్రభుత్వం అలర్ట్

దేశంలో రాష్ట్రాలను కేంద్రం అప్రమత్తం చేసింది. కోవిడ్‌ జేఎన్‌.1 వేరియంట్‌ విస్తరిస్తుందని.. జాగ్రత్తలు తీసుకోవాలని అన్ని రాష్ట్రాల ప్రభుత్వ ప్రధాన కార్యదర్శులకు లేఖ రాశారు. ఇటీవల కాలంలో కేరళలాంటి కొన్ని రాష్ట్రాల్లో కోవిడ్‌ కేసులు పెరిగాయని.. ఇదే సమయంలో కొత్త వేరియంట్‌ ప్రభావం పెరిగిందన్నారు. అందువల్ల అన్ని ప్రభుత్వాలు తగిన నియంత్రణ చర్యలు చేపట్టాలని సూచించారు. కేంద్రం నుంచి హెచ్చరికలు రావడంతో ఆంధ్రప్రదేశ్‌ ప్రభుత్వం అప్రమత్తమైంది. కేంద్రం సూచనలతో ముందస్తు జాగ్రత్త చర్యలు ప్రారంభించింది. రాష్ట్రవ్యాప్తంగా రెగ్యులర్‌గా నిర్వహించే ఫీవర్ సర్వే కూడా కొనసాగుతోంది.. ఏపీ వైద్య ఆరోగ్యశాఖ ఆధ్వర్యంలో నిర్వహిస్తున్నారు. ఏపీ వైద్య ఆరోగ్యశాఖ స్పెషల్ సీఎస్ కృష్ణబాబు రాష్ట్రంలో కోవిడ్ సహా ఇతర అంశాలపై సమీక్ష నిర్వహించారు. ర్యాపిడ్ కిట్లతో పాటు అవసరమైన మందులు అందుబాటులో ఉంచాలని అధికారులను ఆదేశించారు. ముందస్తు జాగ్రత్తగా ఆసుపత్రులలో ఆక్సిజన్ బెడ్స్‌, పనితీరు, మందులు వంటి అంశాలను సమీక్షించుకుని ముందస్తు జాగ్రత్తలు చేపట్టనున్నట్లు ఆరోగ్య శాఖ తెలిపింది.

దేశవ్యాప్తంగా కోవిడ్ కేసులు పెరుగుతుండటంతో కేంద్రం రాష్ట్రాలకు కొన్ని సూచనలు చేసింది. రాబోయే పండగల సీజన్‌ను దృష్టిలో ఉంచుకుని వైరస్‌ విస్తరించకుండా అడ్డుకోవడానికి తగిన నియంత్రణ చర్యలు చేపట్టాలని సూచించింది. పరిశుభ్రత పాటించేలా చూస్తూనే.. కేంద్రం గతంలో జారీ చేసిన కొవిడ్‌-19 నియంత్రణ మార్గదర్శకాలను అమలు చేయాలన్నారు. జిల్లాల వారీగా ఆసుపత్రులకు వచ్చే ఐఎల్‌ఐ, సారి సారి రోగులను నిరంతరం పర్యవేక్షించాలని తెలిపింది. వారి వివరాలను ఇంటిగ్రేటెడ్‌ హెల్త్‌ ఇన్ఫర్మేషన్‌ ప్లాట్‌ఫామ్‌లో నమోదు చేసి కేసుల పెరుగుదలను తొలి దశలోనే పసిగట్టాలన్నారు. అన్ని జిల్లాల్లో తగిన పరీక్షలు నిర్వహించాలని.. అందులో కేంద్రం సిఫార్సు చేసిన నిష్పత్తి ప్రకారం ఆర్‌టీపీసీఆర్‌, యాంటీజెన్‌ టెస్టులు నిర్వహించాలంటోంది కేంద్రం. ఆర్‌టీపీసీఆర్‌ టెస్టులు అధికంగా చేపట్టి పాజిటివ్‌ నమూనాలను ఇన్సాకాగ్‌ లేబొరేటరీలకు పంపి కొత్త వేరియంట్లను సకాలంలో గుర్తించే ప్రయత్నం చేయాలని కోరింది. జనాలు దగ్గేటప్పుడు, తుమ్మేటప్పుడు తగిన జాగ్రత్తలు తీసుకోవాలంటున్నారు.

అంతేకాదు.. కొత్తగా బయటపడుతున్న జేఎన్‌.1 వేరియంట్‌ సోకిన వారిలో రోగ లక్షణాలు ఎలా ఉంటాయన్నది ఇంకా పూర్తిగా క్లారిటీ లేదు. సాధారణంగా కొవిడ్‌-19 సోకినప్పుడు కనిపించే లక్షణాలే కనిపించొచ్చు.. అయితే ఈ వేరియంట్‌ సోకినప్పుడు ప్రభావం తీవ్రంగా ఉంటుందనే సంకేతం ఏమీలేదంటున్నారు. దీనివల్ల ప్రజారోగ్యానికి ముప్పు పెరిగే ప్రమాదం ఉందన్న సంకేతం కూడా లేదని.. ఇప్పుడున్న లేబొరేటరీల్లో ఆర్‌టీపీసీఆర్‌ టెస్టుల ద్వారా జేఎన్‌.1 వేరియంట్‌ను కనిపెట్టవచ్చంటున్నారు. ముఖ్యంగా ప్రజల్లో అప్రమత్తం అవసరం అంటోంది కేంద్రం.