ఏపీకి కేంద్రం గుడ్‌న్యూస్,,,,రూ.2,952 కోట్లు విడుదల
Andhra Pradesh Telugu | Suryaa Desk | Published : Sat, Dec 23, 2023, 09:37 PM
ఆంధ్రప్రదేశ్‌కు కేంద్రం శుభవార్త చెప్పింది. కేంద్ర పన్నుల్లో వాటా కింద ఆర్థిక శాఖ 28 రాష్ట్రాలకు రూ.72,961.21 కోట్లు విడుదల చేయగా.. ఇందులో ఆంధ్రప్రదేశ్‌కు రూ.2,952.74 కోట్లు దక్కాయి. అలాగే పొరుగు రాష్ట్రం తెలంగాణకు రూ.1,533.64 కోట్లు వచ్చాయి. రాబోయే పండుగలు, కొత్త సంవత్సరాన్ని దృష్టిలో ఉంచుకొని ఈ అదనపు మొత్తాన్ని ముందస్తుగా విడుదల చేసినట్లు కేంద్ర ఆర్థిక శాఖ ఒక ప్రకటనలో పేర్కొంది. సామాజిక సంక్షేమ, అభివృద్ధి కార్యక్రమాలు, మౌలిక వసతులకు అవసరమైన వనరులను రాష్ట్ర ప్రభుత్వాలకు అందుబాటులో ఉంచడానికి ఈ నిర్ణయం తీసుకున్నట్లు వివరించింది. 2024 జనవరి 10వ తేదీ నాటికి రాష్ట్రాలకు చెల్లించాల్సిన వాయిదాకు అదనంగా దీన్ని విడుదల చేస్తున్నట్లు తెలిపింది. ఏపీకి ఈ సమయంలో నిధులు కేటాయించడం బిగ్ రిలీఫ్ అని చెప్పాలి. కేంద్రం అత్యధికంగా ఉత్తరప్రదేశ్ రాష్ట్రానికి రూ.13,088 కోట్లు విడుదల చేసింది. బీహార్ కు రూ.7,338 కోట్లు, పశ్చిమ బెంగాల్ కు రూ.5,488 కోట్లు, మధ్యప్రదేశ్ కు రూ.5,727 కోట్లు, మహారాష్ట్రకు రూ.4,609 కోట్లు, రాజస్థాన్ కు రూ.4,396 కోట్లు విడుదల చేసింది. వాస్తవానికి ఈ పన్నుల వాటా విడుదల 2024 జనవరి 10న విడుదల చేయాల్సి ఉండగా.. పండుగ సీజన్, నూతన సంవత్సరాదిని దృష్టిలో ఉంచుకుని ఈ నెల 11నే నిధులను విడుదల చేసినట్లు తెలిపారు.
|
|