పీకేను మేము పూర్తిగా వాడేశాం.. ఆయన గుజ్జంతా అయిపోయింది: కొడాలి నాని సెటైర్లు

టీడీపీ అధినేత చంద్రబాబుతో ఎన్నికల వ్యూహకర్త ప్రశాంత్ కిశోర్‌ల భేటీ ఆంధ్రప్రదేశ్ రాజకీయాల్లో చర్చనీయాంశంగా మారింది. ఈ భేటీపై అధికార వైఎస్సార్సీపీ తనదైన శైలిలో విమర్శలు గుప్పిస్తోంది. బాబు, పీకేల భేటీపై తాజాగా మాజీ మంత్రి, గుడివాడ ఎమ్మెల్యే కొడాలి నాని వ్యంగ్యాస్త్రాలు సంధించారు. చంద్రబాబు ఎంతమంది పీకేలను పెట్టుకున్నా.... సీఎం జగన్‌ను పికేదెం ఉండదని సెటైర్ వేశారు. చంద్రబాబు అవుట్ డేటెడ్ పొలిటీషియననీ మా సీఎం జగన్, మేము రోజూ చెబుతూనే ఉన్నామని, ఇప్పుడు ప్రశాంతి కిషోర్‌ను కలిస్తే భూమి బద్దలై పోతుందా? అని అన్నారు

ప్రశాంత్ కిషోర్‌ను మేము పూర్తిగా వాడేశామని, ఆయన బుర్రలో గుజ్జంతా అయిపోయిందని ఎద్దేవా చేశారు. మా వ్యూహకర్తగా ఉన్నప్పుడు బీహార్ నుంచి వచ్చిన ప్రశాంత్ ఏం పీకుతాడు తమ్ముళ్లు అన్న చంద్రబాబు ....ఇప్పుడు ఏం పీకడానికి భేటీ అయ్యాడో పసుపు తమ్ముళ్లకు చెప్పాలని నిలదీశారు. ప్రశాంత్ సూచనలతో బాబాయ్‌ని చంపి, జగన్ కోడి కత్తి డ్రామాలు అడారని ఎల్లో మీడియా గగ్గోలు పెట్టిందని, మరి ఇప్పుడు చంద్రబాబు పీక కోయించుకోడానికి...తండ్రిని చంపడానికి లోకేశ్ ప్లాన్ వేస్తున్నారా? అని విమర్శించారు. ప్రశాంతి కిషోర్‌కు, ఐప్యాక్‌కు సంబంధం లేదని కొడాలి స్పష్టం చేశారు. ఇండియా కూటమిలో చేరమని బెంగాల్ సీఎం మమతా బెనర్జీ పంపితే చంద్రబాబు వద్దకు ప్రశాంత్ కిషోర్ వచ్చారని అన్నారు. పాట్నర్ పీకే బీజేపీతో చర్చలు జరుపుతుంటే... మరో పీకే ఇండియా కూటమి, మమతా బెనర్జీ, కాంగ్రెస్‌తో చర్చలు జరుపుతున్నాడని ధ్వజమెత్తారు. చంద్రబాబు తన రెండు కళ్ల సిద్దాంతాన్ని కొనసాగిస్తున్నాడని గుడివాడ ఎమ్మెల్యే విమర్శలు చేశారు.

వైఎస్సార్సీపీ తరఫున ఎన్నికల వ్యూహకర్తగా పనిచేసేందుకు 2016లో ఒప్పందం చేసుకున్న ప్రశాంత్ కిశోర్.. 2019 ఎన్నికల్లో ఆ పార్టీని అధికారంలోకి తేవడంలో కీలకంగా వ్యవహరించారు. తర్వాత పూర్తిస్థాయి రాజకీయ నాయకుడిగా మారాలని నిర్ణయించుకుని.. ఐప్యాక్‌ నుంచి కూడా బయటకు వచ్చారు. కొన్నాళ్లపాటు బిహార్‌ రాజకీయాల్లో క్రియాశీలకంగా వ్యవహరించారు. జనసూరజ్ పేరుతో అక్కడ పాదయాత్ర చేశారు.