లంచం తీసుకోకపోతే ఖర్చులకు ఎలా.. మడకశిర ఎమ్మార్వో వివాదాస్పద వ్యాఖ్యలు

శ్రీ సత్యసాయి జిల్లా మడకశిర ఎమ్మార్వో ముర్షావలి చిక్కుల్లో పడ్డారు. లంచం గురించి మాట్లాడుతూ ఆయన చేసిన వ్యాఖ్యలు తీవ్ర వివాదాస్పదంగా మారాయి. రాముడి కాలం నుంచే లంచం ఉంది అంటూ కొత్త వాదనను తెరపైకి తీసుకువచ్చారు. లంచం తీసుకోకపోతే ప్రోటోకాల్ ఖర్చులు ఎక్కడి నుంచి తేవాలని ఎమ్మార్వో ముర్షావలి ప్రశ్నించారు. తన జీతం నుంచి అధికారులు, ప్రజా ప్రతినిధులకు ఖర్చు పెట్టాలా అంటూ తన ఆవేదనను వెళ్లగక్కారు. ఈ మొత్తం వ్యవహారానికి సంబంధించిన దృశ్యాలను అక్కడే ఉన్న ఓ వ్యక్తి వీడియో తీసి సోషల్ మీడియాలో పెట్టడంతో తెగ వైరల్ అవుతోంది. దీంతో తీవ్ర విమర్శలకు కారణం అయింది.

మంత్రులు, ఉన్నతాధికారుల పర్యటనలకు ఖర్చు అయ్యే లక్షల రూపాయల కోసం లంచాలు తీసుకోక తప్పడం లేదంటూ ఎమ్మార్వో ముర్షావలి వ్యాఖ్యానించారు. తన భూమి సమస్య పరిష్కారంలో ఓ రెవెన్యూ అధికారి అన్యాయం చేశాడంటూ మెళవాయి గ్రామ పంచాయతీకి చెందిన ఓ రైతు.. తహసీల్దార్ ముర్షావలికి ఫిర్యాదు చేశాడు. తన ప్రత్యర్థి నుంచి లంచం తీసుకుని తనకు ఆ రెవెన్యూ అధికారి అన్యాయం చేశాడని బాధిత రైతు తన ఆవేదనను వినిపించాడు. రైతు చేసిన ఫిర్యాదుపై స్పందించిన ఎమ్మార్వో ముర్షావలి.. మంత్రులు, ఉన్నతాధికారులు వస్తే లక్షల రూపాయలు ఖర్చు పెట్టాల్సి వస్తుందని తెలిపారు. వాటి కోసం ఖర్చు పెట్టే డబ్బును లంచాల రూపంలో కాకుండా.. తమ జీతాల్లో నుంచి ఖర్చు పెట్టాలా అంటూ సంచలన వ్యాఖ్యలు చేశారు.

ఇటీవల ఓ మంత్రి వస్తే రూ.1.70 లక్షలు ఖర్చు అయినట్లు తెలిపారు. ఇక ఆ తర్వాత హ్యాండ్లూమ్ ప్రిన్సిపల్ సెక్రటరీ వచ్చినపుడు కూడా వారు తినే ఆహారం మడకశిరలో దొరక్కపోతే హిందూపురం వెళ్లి మరీ తెచ్చినట్లు వివరించారు. ఇక హ్యాండ్లూమ్ ప్రిన్సిపల్ సెక్రటరీ అడిగిన పాన్ కేక్ తేవడం కోసం ఏకంగా సత్యసాయి జిల్లా అధికారులు బెంగళూరుకు వెళ్లాల్సి వచ్చిందని పేర్కొన్నారు. హ్యాండ్లూమ్ ప్రిన్సిపల్ సెక్రటరీకి బాత్ రూమ్‌లో ఒక్క గీత కూడా ఉండకూడదట.. బెడ్రూమ్‌లోకి ఒక్క ఈగ రాకూడదట.. అలాంటి వారికి ఏర్పాట్లు చేయాలంటే ఎంత ఖర్చు చేయాల్సి ఉంటుందని తెలిపారు. అధికారులు, మంత్రులు, ఎమ్మెల్యేల పర్యటనలకు అయ్యే ఖర్చులు ప్రభుత్వం నుంచి ఏమీ రావని తామే ఖర్చు పెట్టుకోవాల్సి ఉంటుందని పేర్కొన్నారు.