ఏపీలో పెరుగుతున్న కరోనా కేసులు.. తాజాగా మరో 8 కేసులు నమోదు

ఆంధ్రప్రదేశ్‌లో కరోనా కేసులు పెరుగుతున్నాయి. గురువారం రాష్ట్రవ్యాప్తంగా మరో ఎనిమిది పాజిటివ్‌ కేసులు బయటపడ్డాయి. కృష్ణా జిల్లాలో నలుగురికి, తిరుపతిలో నలుగురికి పాజిటివ్‌గా నిర్ధారణ అయ్యింది. దీంతో మొత్తం కేసుల సంఖ్య 40కు చేరింది. విజయవాడ సమీపంలోని కానూరులో రెండు కేసులు, గన్నవరం, మచిలీపట్నంలలో ఒక్కో కేసు నమోదయ్యాయి. తిరుపతిలోని రుయా ఆస్పత్రిలో నిర్వహించిన కొవిడ్‌ ర్యాపిడ్‌ పరీక్షల్లో నలుగురికి పాజిటివ్‌గా నిర్ధారణ అయింది. పొరుగు రాష్ట్రాల్లో బయటపడుతున్న కరోనా కేసులను దృష్టిలో పెట్టుకొని వైద్య ఆరోగ్యశాఖ తిరుపతి జిల్లా పరిధిలోని రుయాస్పత్రి, ఏరియా, ప్రాంతీయ వైద్యశాలల్లో కొవిడ్‌ పరీక్షా కేంద్రాలను ఏర్పాటు చేశారు. ఈ క్రమంలో రుయాస్పత్రిలో గురువారం 20 మందికి ర్యాపిడ్‌ పరీక్షలు చేశారు. నలుగురికి పాజిటివ్‌ వచ్చింది. తిరుపతిలో పాజిటివ్‌ వచ్చిన నలుగురిలో ఒకరు రెండు రోజులుగా రుయాస్పత్రిలో ఎం.ఎం. వార్డులో చికిత్స పొందుతున్నారు. అలాగే తిరుమలకు వచ్చిన బెంగళూరుకు చెందిన మరో 70 ఏళ్ల వృద్ధురాలికి కూడా పాజిటివ్‌ వచ్చింది. తిరుపతికి చెందిన ఇద్దరికీ కొవిడ్‌ లక్షణాలు లేకపోవడం, ఆరోగ్యంగా ఉండటంతో వారు హోం ఐసోలేషన్‌లో ఉంటామని చెప్పి వెళ్లిపోయారు.మిగిలిన ఇద్దరిని మాత్రం రుయా అధికారులు ఆస్పత్రిలోని కొవిడ్‌ ఐసోలేషన్‌ వార్డులో ఉంచి ప్రత్యేక చికిత్స అందిస్తున్నారు.

మరోవైపు కర్నూలు ప్రభుత్వ సర్వజన ఆస్పత్రిలో పలువురికి కొవిడ్‌ పరీక్షలు నిర్వహించగా ఇందులో ఇద్దరికి కరోనా పాజిటివ్‌గా నిర్ధారణ అయినట్లు తెలుస్తోంది. కర్నూలు నగరానికి చెందిన ఓ మహిళ దగ్గు. జ్వరం, జలుబు కరోనా లక్షణాలతో జిల్లా ఆస్పత్రిలో చేరారు. ఆమెతో పాటు మొత్తం 84 మందికి వైద్య పరీక్షలు నిర్వహించగా.. కొవిడ్‌ నిర్ధారణ అయ్యింది. వీరిద్దరినీ హోం ఐసోలేషన్‌లో ఉంచారు. జిల్లాలోని దాదాపు 40కి పైగా పీహెచ్‌సీల్లో సైతం కరోనా టెస్టులు నిర్వహించేందుకు ఏర్పాట్లు చేస్తున్నారు. ఉమ్మడి జిల్లాలో కరోనాపై సోషల్‌ మీడియాలో జరుగుతున్న ప్రచారాన్ని నమ్మొద్దని అధికారులు సూచిస్తున్నారు. విశాఖతో పాటుగా తిరుపతి, విజయవాడ పరిసర ప్రాంతాల్లో ఎక్కువ కేసులు ఉన్నాయి. కేంద్రం గురువారం విడుదల చేసిన లెక్కల ప్రకారం ఏపీలో 32 కేసులు ఉన్నాయి.. శుక్రవారం రిపోర్ట్ రావాల్సి ఉంది. కొత్త వేరియంట్‌ జేఎన్‌-1తో ప్రాణహాని లేదని తగు జాగ్రత్తలు తీసుకుంటే సరిపోతుందని వైద్యులు తెలిపారు. చలి తీవ్రత పెరగడంతో అప్రమత్తంగా ఉండాలని సూచిస్తున్నారు. సాధారణ జలుబు, దగ్గు ఉంటే ఆందోళన అక్కర్లేదన్నారు. మూడు రోజులైనా జ్వరం తగ్గకపోతే మాత్రం వెంటనే వైద్యులను సంప్రదించాలని సూచించారు. మరోవైపు ప్రభుత్వం కూడా పరిస్థితిని ఎప్పటికప్పుడు పర్యవేక్షిస్తోంది. అధికారులతో ముఖ్యమంత్రి వైఎస్ జగన్ సమీక్ష నిర్వహించారు. అవసరమైన మందులు, బెడ్‌లు సిద్ధం చేయాలని సూచించారు.