బంగాళాఖాతంలో కొనసాగుతున్న ద్రోణి,,,,చిత్తూరు, తిరుపతి జిల్లాల్లో భారీ వర్షాలు

బంగాళాఖాతంలో ఏర్పడిన ద్రోణి కొనసాగుతోంది. ఈ ప్రభావంతో తమిళనాడులోని పలు జిల్లాల్లో భారీ వర్షాలు మొదలయ్యాయి. ఉపరితల ద్రోణి దట్టంగా వ్యాపించి ఉండటంతో తమిళనాడుకు సరిహద్దున ఉన్న రాయలసీమ జిల్లాల్లో వర్షాలు కురుస్తున్నాయి. ముఖ్యంగా తిరుపతి, తిరుమల, చిత్తూరు, నెల్లూరు జిల్లాల్లో ఈ ద్రోణి ప్రభావంతో వర్షాలు కురుస్తున్నాయి. ఈ జడివానతో ప్రజలు ఇబ్బంది పడుతున్నారు. ఆకాశమంతా మేఘావృతం కావడంతో పాటు చల్లటిగాలులు వీస్తుండటంతో ఇబ్బందిపడుతున్నారు. అలాగే చలి దెబ్బకు జనాలు అల్లాడిపోతున్నారు.

ఏపీలోని దక్షిణ కోస్తాలో తేలికపాటి నుంచి మోస్తరు వర్షాలు.. ఉరుములతో కూడిన జల్లులు ఒకటి లేదా రెండుచోట్ల కురిసే అవకాశం ఉందంటున్నారు. అలాగే రాయలసీమలో తేలికపాటి నుంచి మోస్తరు వానలు.. ఉరుములతో కూడిన జల్లులు కొన్ని చోట్ల పడే అవకాశం ఉందని అంచనా వేస్తున్నారు. ఇప్పటికే చిత్తూరు, తిరుపతి, తిరుమల, నెల్లూరు, ప్రకాశం జిల్లాల్లో తేలికపాటి వానలు పడుతున్నాయి. ఇవాళ చిత్తూరు, తిరుపతి జిల్లాల్లో భారీ వర్షాలు పడతాయంటున్నారు. బాపట్ల, ప్రకాశం, నెల్లూరు, అనంతపురం, అన్నమయ్య, కర్నూలు, నంద్యాల, శ్రీ సత్యసాయి, కడప జిల్లాల్లో తేలికపాటి నుంచి మోస్తరు వానలకు అవకాశం ఉందంటున్నారు. సోమవారం తిరుపతి జిల్లా సత్యవేడులో 24.6,, తిరుపతి జిల్లా తడ 16.8, చిత్తూరు జిల్లా పాలసముద్రంలో 12.2, తిరుపతి జిల్లా గూడూరులో 10 మిల్లీ మీటర్ల వర్షపాతం నమోదైంది.

ఇదిలా ఉంటే.. ఒకవైపు దట్టమైన మంచు.. మరోవైపు ఎడతెరిపిలేని వర్షం.. తిరుమలను వణికిస్తోంది. ఘాట్‌రోడ్లలో ముందు వెళుతున్న వాహనాలు, వ్యక్తులు కనిపించక వాహనదారులు ఇబ్బంది పడ్డారు. చలితీవ్రత కూడా పెరగడంతో భక్తులు పిల్లలు, వృద్ధులు ఇబ్బంది పడ్డారు. ఇక కొండపై సోమవారం వేకువజామున మొదలైన వర్షం సాయంత్రం వరకు ఎడతెరిపిలేకుండా దంచికొట్టింది. ఆలయ ప్రాంతంతో పాటు మాడవీధులు, కాటేజీలు, రోడ్లు, పార్కులు జలమయమయ్యాయి. మరోవైపు మన్యంలో కనిష్ఠ ఉష్ణోగ్రతలు స్వల్పంగా పెరిగాయి. శీతల గాలులు వీస్తుండడంతో మంచు ప్రభావం కొద్దిగా తగ్గింది. కానీ చలి తీవ్రత మాత్రం కొనసాగుతున్నది. సోమవారం జీకేవీధిలో అత్యల్పంగా 10.9 డిగ్రీల ఉష్ణోగ్రత నమోదైంది. చింతపల్లిలో 11, పాడేరులో 11.8, అరకులోయలో 11.9, జి.మాడుగులలో 12 డిగ్రీల కనిష్ఠ ఉష్ణోగ్రతలు నమోదయ్యాయి. ఉదయం తొమ్మిది గంటల వరకు పొగ మంచు వీడడం లేదు. పొగమంచు కారణంగా విజిబిలిటీ తగ్గిపోవడంతో వాహనాలకు హెడ్‌ లైట్లు వేసుకుని వెళ్లాల్సిన పరిస్థితులు కనిపిస్తున్నాయి. అంతేకాదు ఉదయం 10 గంటల వరుక పొగమంచు ప్రభావం కనిపిస్తోంది.. అలాగే సాయంత్రం 4 గంటల నుంచి చలి ప్రభావం ఉంటోంది.