విజయవాడలో తీవ్ర ఉద్రిక్తత.. భారీగా పోలీసుల మోహరింపు

విజయవాడలో తీవ్ర ఉద్రిక్త పరిస్థితులు కనిపించాయి. ఉపాధ్యాయుల సమస్యలు పరిష్కరించాలని కోరుతూ యూటీఎఫ్‌ పిలుపునిచ్చిన 'చలో విజయవాడ' కార్యక్రమంతో టెన్షన్‌కు దారితీసింది. నగరంలోని జింఖానా మైదానంలో నిరసనకు అనుమతి కోరగా.. పోలీసులు నిరాకరించారు. తమకు ఇచ్చిన హమీలు అమలు చేయకుండా ప్రభుత్వం మోసం చేసిందంటూ 36 గంటల పాటు నిరసన చేపడుతున్నట్లు ప్రకటించిన సంగతి తెలసిందే. ప్రతీ నెల 1న జీతాలు చెల్లించాలని.. రూ. 18వేల కోట్లు ఉపాధ్యాయుల సొమ్ము ఉద్యోగుల సంక్షేమానికి ఖర్చు చేయాలని డిమాండ్ చేశారు.

విజయవాడ లెనిన్‌ సెంటర్‌కు యూటీఎఫ్‌ నాయకులు, ఉపాధ్యాయులు భారీగా చేరుకుని ఆందోళన చేపట్టారు. రాష్ట్ర ప్రభుత్వం సకాలంలో జీతాలు, బకాయిలు చెల్లించాలని డిమాండ్‌ చేశారు. దీంతో వారిని పోలీసులు అరెస్టు చేసి అక్కడి నుంచి తరలించారు. యూటీఎఫ్‌ రాష్ట్ర కార్యాలయం వద్ద భారీగా పోలీసులు మోహరించి అధ్యక్ష, కార్యదర్శులను నిర్బంధించారు. ఆందోళనకు అనుమతి లేదని టీచర్స్‌ను అడ్డుకున్న పోలీసులు ఎక్కడిక్కడ అరెస్టు చేస్తున్నారు. తాము కొత్తగా కోరికలు కోరడంలేదని.. ముఖ్యమంత్రి జగన్ అధికారంలోకి రాకముందు.. గత ప్రభుత్వం ఏదీ ఇవ్వలేదని.. తాము రాగానే పీఆర్సీ ఇస్తాం.. సకాలంలో డీఏలు, రాయితీలు ఇచ్చి.. అన్ని బకాయీలు చెల్లిస్తామని హామీ ఇచ్చారన్నారు. ఏ లోటు లేకుండా చేస్తామని తమకు చెప్పారని.. పీఆర్సీలు, డీఏలు ఇచ్చారు.. కానీ పీఆర్సీలు, డీఏలకు సంబంధించిన బకాయిలు ఇప్పటి వరకు ఇవ్వలేదని ఆగ్రహం వ్యక్తం చేశారు. ఉద్యోగులకు సంబంధించిన పీఎఫ్, ఏపీఎల్‌ఐ నిధులు కూడా ఏడాది కాలంగా ఇవ్వలేదని ఆరోపించారు. దీనికి సంబంధించి నోటీసు ఇచ్చామన్నారు. ప్రభుత్వం స్పందించకపోవడంతో రెండు సార్లు నిరసనలు, ధర్నాలు చేశామన్నారు. ఇప్పుడు 36 గంటల నిరసనలకు పిలుపిచ్చామని.. దీనికి పోలీసుల అనుమతి కోరామన్నారు. సోమవారం వరకు కాలయాపన చేసి.. ఇప్పుడు 144, 30 సెక్షన్ అమలులో ఉందని ధర్నాకు అనుమతి లేదని పోలీసులు చెబుతూ ఎక్కడికక్కడ టీచర్స్‌ను అరెస్టు చేస్తున్నారని మండిపడ్డారు. ప్రభుత్వం వెంటనే తమ సమస్యలు పరిష్కరించాలని వారు డిమాండ్ చేస్తున్నారు.