రైలుకు ఎదురెళ్లి ఆత్మహత్యకు పాల్పడిన ప్రేమ జంట

సంక్రాంతి పండుగ వేళ ఓ ప్రేమకథ విషాదంగా ముగిసింది. భర్త నుంచి విడిపోయిన ఓ మహిళ.. కొన్నాళ్లుగా మరో యువకుడితో సహజీవనం చేస్తోంది. అయితే, తనను వివాహం చేసుకోవాలంటూ ప్రియుడిపై ఒత్తిడి తీసుకొస్తోంది. దీంతో పెళ్లి విషయమై ఇరువురి మధ్య తరుచూ గొడవలు జరుగుతున్నాయి. చివరకు జీవితంపై విరక్తితో ఇరువురూ కలిసి రైలు కిందపడి ఆత్మహత్యకు పాల్పడ్డారు. ఈ విషాదకర ఘటన కడప రైల్వేస్టేషన్‌ వద్ద ఆదివారం చోటుచేసుకుంది. పోలీసులు తెలిపిన వివరాల ప్రకారం...

కడప రవీంద్రనగర్‌కు చెందిన ఓ మహిళ.. మనస్పర్దల కారణంగా భర్తతో విడిపోయింది. అదే ప్రాంతానికి చెందిన మరో యువకుడితో ఏర్పడిన పరిచయం ప్రేమకు దారితీసింది. దీంతో ఇద్దరూ ఒకరినొకరు ఇష్టపడి కొన్నాళ్లుగా సహజీవనం చేస్తున్నారు. ఈ క్రమంలో ప్రియుడి ముందు ఆమె పెళ్లి ప్రతిపాదన తెచ్చింది. వివాహం చేసుకుందామని తరుచూ అతడిపై ఒత్తిడి చేస్తోంది. దీనిపై ఎటూతెల్చుకోని యువకుడు.. తనకు కొంత సమయం ఇవ్వాలని కోరాడు. కానీ, వారి మధ్య తరచూ గొడవలు జరుగుతున్నాయి.

దీంతో జీవితంపై విరక్తి చెందిన ఇద్దరూ.. ఆదివారం కడప రైల్వేస్టేషన్‌కు చేరుకున్నారు. మూడో ప్లాట్‌ఫామ్‌ వద్ద రైలు కింద పడి ఆత్మహత్యకు పాల్పడ్డారు. ఈ ఘటన గురించి సమాచారం అందుకున్న రైల్వే పోలీసులు.. హుటాహుటిన అక్కడకు చేరుకున్నారు. రైల్వే ఎస్సై రారాజు ఘటనాస్థలాన్ని పరిశీలించారు. మృతదేహాలను స్వాధీనం చేసుకున్న పోలీసులు.. పోస్ట్‌మార్టం కోసం కడప ప్రభుత్వ ఆసుపత్రికి తరలించారు. కేసు నమోదు చేసి దర్యాప్తు చేస్తున్నట్లు పోలీసులు వెల్లడించారు. పూర్తి వివరాలు తెలియాల్సి ఉందని చెప్పారు.