మార్చి 15లోగా మీ సైన్యాన్ని వెనక్కి తీసుకోండి: భారత్‌కు మాల్దీవులు అల్టిమేటం

మాల్దీవుల నుంచి సైన్యాలను ఉపసంహరించే విషయంలో భారత్‌కు ఆ దేశాధ్యక్షుడు గడువు విధించారు. మార్చి 15 నాటికి భారత సైన్యం తమ దేశం వీడాల్సిందేనని ఆయన స్పష్టం చేశారు. సైన్యం ఉపసంహరణ అభ్యర్థనపై మాల్దీవులు, భారత్ అధికారులు ఆదివారం మాలేలోని విదేశాంగ శాఖ కార్యాలయంలో సమావేశమై చర్చించారు. ఈ సందర్భంగా తమ దేశాధినేత అభిప్రాయాన్ని మాల్దీవుల అధికారులు.. భారత హైకమిషనర్‌కు తెలియజేశారు. మార్చి 15 నాటికి ఉపసంహరణ ప్రక్రియ పూర్తి చేయాలని అధ్యక్షుడు చెప్పినట్లు తెలిపారు.

దాంతోపాటు భారత్‌తో ద్వైపాక్షిక ఒప్పందాలను కూడా సమీక్షించనున్నట్టు మాల్దీవుల సమాచార వ్యవహారాల మంత్రి ఇబ్రహీం ఖలీల్‌ స్థానిక మీడియాకు వెల్లడించారు. మానవతా అవసరాల కోసం భారత్‌ అందజేసిన రెండు హెలికాప్టర్లను వినియోగం నిలిపివేయాలని అధ్యక్షుడు మొహమ్మద్‌ ముయిజ్జు ఆదేశించినట్లు ఆయన తెలిపారు. కాగా, ప్రస్తుతం మాల్దీవుల్లో 88 మంది భారత సైనికులు విధులు నిర్వహిస్తున్నారు. గతేడాది నవంబరులో జరిగిన అధ్యక్ష ఎన్నికల్లో విజయం సాధించిన తర్వాత సైన్యాన్ని ఉపసంహరించుకోవాలని ముయిజ్జు భారత్‌ను కోరారు. ఎన్నికల్లోనూ మయిజ్జు ఇదే నినాదంతో ప్రచారం చేశారు.

కాగా, మాల్దీవుల అధ్యక్షుడి హోదాలో తొలిసారి చైనా పర్యటనకు వెళ్లిన మొహమ్మద్ మయిజ్జు పలు ఒప్పందాలు చేసుకున్నారు. ఐదు రోజుల చైనా పర్యటన ముగించుకుని శనివారం స్వదేశానికి వచ్చిన తర్వాత.. ఏ దేశం పేరు ప్రస్తావించకుండా నర్మగర్భ వ్యాఖ్యలు చేశారు. భౌగోళికంగా చిన్న దేశం అయినంత మాత్రాన తమను బెదిరించలేరని, అందుకు తాము ఎవరికీ లైసెన్సు ఇవ్వలేదని ఉద్ఘాటించారు. మరోవైపు, మాల్దీవుల అంతర్గత వ్యవహారాల్లో ఏ దేశం జోక్యం చేసుకున్నా గట్టిగా వ్యతిరేకిస్తామని చైనా ప్రకటించడం గమనార్హం.

కాగా, గత నవంబరులో కేంద్ర మంత్రి కిరణ్ రిజిజు మాల్దీవులను సందర్శించి ప్రస్తుత అధ్యక్షుడిని కలిశారు. భారత ప్రభుత్వ వర్గాలు తెలిపిన వివరాల ప్రకారం.. భారత సైనిక వేదికలను ఉపయోగించడాన్ని కొనసాగించడానికి ఇరుపక్షాలు పని చేయగల పరిష్కారానికి అంగీకరించాయి. ఎందుకంటే అవి తమ ప్రజల ప్రయోజనాలకు ఉపయోగపడతాయి. ఈ సిబ్బంది భారత్ ప్రాయోజిత రాడార్లు, నిఘా విమానాలను నిర్వహిస్తారు.

ఈ ప్రాంతంలోని భారత యుద్ధనౌకలు దేశం ప్రత్యేక ఆర్థిక మండలిలో పెట్రోలింగ్‌కు సహకరిస్తాయి. పరిమాణంలో చిన్నదైనా మాల్దీవులు ప్రాంతీయ రాజకీయాల్లో ముఖ్యమైన పాత్ర పోషిస్తుంది. ప్రత్యేకించి ఉత్తర, దక్షిణ భాగాలలో వ్యూహాత్మకంగా హిందూ మహాసముద్రంలో చాలా కీలకమైంది. కాగా, ఇటీవల ప్రధాని నరేంద్ర మోదీ లక్షద్వీప్ పర్యటనపై మాల్దీవుల మంత్రులు నోరుపారేసుకున్న అంశం తీవ్ర వివాదాస్పదమైన విషయం తెలిసిందే.