భారత మహిళలు ఎక్కువగా ఎక్కడ పెట్టుబడులు పెడుతున్నారో తెలుసా

భారత్‌లో ప్రస్తుతం పురుషులతో సమానంగా మహిళలు పని చేసే పరిస్థితి కనిపిస్తుంది. ఆర్థిక సంబంధిత విషయాల్లోనూ చాలా వరకు సొంతంగా నిర్ణయాలు తీసుకుంటున్నారని చెప్పొచ్చు. ముఖ్యంగా మహిళల వేతనాలు, ఆదాయం పురుషులతో పోలిస్తే సగటున తక్కువగా ఉన్నప్పటికీ.. పొదుపు విషయంలో మహిళలే ముందుంటారని చెప్పొచ్చు. పట్టణాల్లో నివసించే మహిళలు డబ్బుకు ఎలాంటి ప్రాధాన్యం ఇస్తున్నారు? తమ ఆర్థికపర విషయాల్ని ఎలా మేనేజ్ చేయగలుగుతున్నారు.. డబ్బును ఎక్కడ పెట్టుబడులు పెడుతున్నారనే అంశంపై అవగాహన కోసం.. డీబీఎస్ బ్యాంక్ ఇండియా.. CRISIL తో కలిసి ఒక సర్వే చేపట్టింది. 'విమెన్ అండ్ ఫైనాన్స్' పేరుతో రిపోర్ట్ విడుదల చేసింది.

వయసు, ఆదాయం, వైవాహిక స్థితి, కుటుంబ పరిస్థితులు, నివసించే ప్రాంతం.. ఇలా అన్ని అంశాల్ని పరిగణనలోకి తీసుకొని అన్ని వివరాలు రాబట్టింది. ఒకప్పటితో పోలిస్తే ఇప్పుడు ఆర్థిక స్వాతంత్ర్యం కూడా మహిళల్లో పెరిగిందని చెప్పొచ్చు. గతంలో డబ్బుకు సంబంధించి పురుషుడు (ఇంటి పెద్ద) మాత్రమే నిర్ణయం తీసుకునేవారు. ఇప్పుడు మహిళలు కూడా సంపాదిస్తున్నారు కాబట్టి.. ఈ విషయంలో మార్పులు వచ్చాయని చెప్పొచ్చు.

ఇండియన్ మెట్రో నగరాల్లో ఇప్పుడు మహిళా ఉద్యోగుల్లో దాదాపు 47 శాతం మంది ఆర్థిక విషయాల్లో స్వతంత్రంగా నిర్ణయాలు తీసుకుంటున్నారు. లాంగ్ టర్మ్ ఫ్యామిలీ నిర్ణయాల్లో 98 శాతం మంది మహిళలు చురుగ్గా ఉంటున్నారు. డిసిషన్ మేకింగ్‌లో ఎక్కువగా 45 ఏళ్లు పైబడిన మహిళల పాత్ర అధికం. వారు ఎక్కువగా తమ పిల్లల చదువులు సహా రిటైర్మెంట్ ప్లానింగ్‌కు ఎక్కువ ప్రాధాన్యం ఇస్తున్నారు.

ఇక ఇదే బాటలో పనిచేసే భారతీయ మహిళలు ఎక్కువగా రిస్క్ తక్కువుండే పెట్టుబడులవైపు మొగ్గుచూపుతున్నారట. వీటిల్లో ముందుగా ఫిక్స్‌డ్ డిపాజిట్లు, సేవింగ్స్ అకౌంట్లలో ఏకంగా 51 శాతం మంది పెట్టుబడులు పెడుతున్నట్లు తెలిసింది. 10 నగరాల్లో వందలాది మహిళల్ని సర్వే చేసి వారి అభిప్రాయాలు కోరింది. బంగారంపై పెట్టుబడులు పెడుతున్నట్లు 16 శాతం మంది చెప్పారు. ఇక 15 శాతం మంది మ్యూచువల్ ఫండ్లు, 10 శాతం మంది రియల్ ఎస్టేట్ పెట్టుబడులు పెడుతుండగా.. స్టాక్ మార్కెట్లలో ఇన్వెస్ట్ చేసే వారు 7 శాతంగా ఉన్నారు.

ఇక్కడే ఒక ఆసక్తికర విషయం వెలుగులోకి వచ్చింది. 10 శాతం మంది మహిళలు ఫిక్స్‌డ్ డిపాజిట్ల విషయంలో చురుగ్గా ఉంటుండగా.. వారి సహచరుల్లో కేవలం 5 శాతం మంది మాత్రమే వీటిపై మొగ్గు చూపుతున్నట్లు తెలిసింది. ఇక 25-35 మధ్య వయసున్న పనిచేసే మహిళల్లో ఆన్‌లైన్ షాపింగ్ కోసం 33 శాతం మంది యూపీఐని వాడుతున్నారట. వీరిలో 45 ఏళ్లకుపైబడిన వారు 22 శాతంగా ఉన్నారు.