సామాజిక చైతన్యవాడలా విజయవాడ.. అంబేద్కర్ విగ్రహావిష్కరణ సభలో జగన్

దేశంలోనే అతిపెద్ద అంబేద్కర్‌ విగ్రహాన్ని ముఖ్యమంత్రి వైఎస్ జగన్మోహన్ రెడ్డి శుక్రవారం ఆవిష్కరించి జాతికి అంకితం చేశారు. విజయవాడ స్వరాజ్ మైదానంలో 18.18 ఎకరాల విశాల ప్రాంగణంలో ఈ విగ్రహాన్ని ఏర్పాటు చేయగా.. మొత్తం రూ.404.35 కోట్ల ప్రభుత్వం ఖర్చు చేసింది. ఈ విగ్రహావిష్కరణ కార్యక్రమంలో సీఎం జగన్ మాట్లాడుతూ.. నవ భారత రాజ్యాంగ నిర్మాత డాక్టర్ బీఆర్ అంబేద్కర్ సేవలను గుర్తుచేసుకున్నారు. అంబేద్కర్ స్ఫూర్తితోనే అందర్నీ ఒక్కతాటిపై నిలబెట్టామని తెలిపారు. పోరాటానికి ఆయన మరో రూపమని, మరణం లేని మహానేత అని జగన్ కొనియాడారు.

సామాజిక న్యాయ మహా శిల్పం కింద విగ్రహాన్ని ఏర్పాటు చేసుకున్నామని, ఇది అందరికీ స్పూర్తినిస్తుందని చెప్పారు. సామాజిక చైతన్యవాడలా విజయవాడ కనిపిస్తోందని సీఎం వ్యాఖ్యానించారు. స్టాట్యూ ఆఫ్‌ సోషల్‌ జస్టిస్‌ అంటే ఇకపై విజయవాడ గుర్తొస్తుందని తెలిపారు. అంటరానితనం రూపం మార్చుకుందని, పేదలు చదివే ప్రభుత్వ స్కూళ్లు పట్టించుకోకపోవడం అంటరాని తనమేనని అన్నారు. పేదలకు ఇళ్లు ఇస్తుంటే అడ్డుకోవడం, వారి పిల్లలకు ట్యాబ్‌లు ఇస్తుంటే కుట్రపూరిత వార్తలు రాయడం అంటరానితనమే అని ఓ వర్గం మీడియాపై సీఎం విమర్శలు గుప్పించారు.

‘పేదవాడి పిల్లలు ఎప్పటికీ పనివాళ్లుగా ఉండిపోవాలా? ఇలాంటి ఆలోచనలు కూడా రూపం మార్చుకున్న అంటరానితనమే.. పథకాల అమలులో వివక్ష చూపించడం కూడా రూపం మార్చుకున్న అంటరానితనమే.. అంబేద్కర్‌ భావజాలం పెత్తందార్లకు నచ్చదు.. వారికి దళితులంటే చులకన.. పేదింటి అక్కచెల్లెమ్మలకు మేలు చేసేందుకు 31 లక్షల ఇళ్లపట్టాలిచ్చాం.. ప్రభుత్వ బడుల రూపురేఖలు మారిస్తే పెత్తందారులకు నచ్చడం లేదు’ అని చంద్రబాబుపై విరుచుకుపడ్డారు. దళితులకు చంద్రబాబు సెంటు భూమి కూడా ఇచ్చింది లేదని దుయ్యబట్టారు.

కాగా, మొత్తం 18 ఎకరాల్లో తలపెట్టిన అంబేద్కర్ స్మృతివనం ప్రాజెక్టు నిర్మాణ బాధ్యతలను హైదరాబాద్‌కు చెందిన కేపీసీ ప్రాజెక్ట్స్ లిమిటెడ్‌కు అప్పగించారు. 2021 డిసెంబర్ 21న మొదలైన ఈ ప్రాజెక్టు నిర్మాణం రూ. 170 కోట్లతో చేపట్టారు. పూర్తయ్యే సరికి రూ. 404.35 కోట్లకు చేరుకుంది. సాధారణ ప్రజలు ఉదయం, సాయంత్రం వేళ్లలో నడకకు వీలుగా వాకింగ్ ట్రాక్‌లు నిర్మించారు. ఈ స్మృతివనంలో అంబేద్కర్ ఎక్స్‌పీరియన్స్ సెంటర్, 2 వేల మంది కూర్చునేలా కన్వెన్షన్ సెంటర్, అలాగే, ఫుడ్‌కోర్టు, పిల్లల కోసం ఆటస్థలం, మ్యూజికల్ ఫౌంటేన్, నీటి కొలన్లు ఏర్పాటు చేశారు. విగ్రహం తయారీలో 400 టన్నుల స్టీల్, 120 టన్నుల కాంస్యాన్ని వినియోగించారు. విగ్రహ పీఠాన్ని బౌద్ధ వాస్తుశిల్పం కాలచక్ర మహామండలంగా తీర్చిదిద్దారు. విగ్రహ బరువును తట్టుకునేందుకు భవనం పునాదులను పైల్ ఫౌండేషన్‌తో 30 మీటర్ల పైల్స్‌తో నిర్మించారు.