గన్నవరం ఎమ్మెల్యే వల్లభనేని వంశీకి షాక్.. నాలుగు అరెస్టు వారెంట్లు జారీ
Andhra Pradesh Telugu | Suryaa Desk | Published : Fri, Feb 02, 2024, 09:36 PM
గన్నవరం ఎమ్మెల్యే వల్లభనేని వంశీకి విజయవాడ ప్రతినిధుల కోర్టు అరెస్టు వారెంట్ జారీ చేసింది. గతంలో ప్రసాదంపాడులో జరిగిన ఓ ఘటనపై కేసు నమోదైంది. ఈ కేసు విచారణ సమయంలో ఆయన కోర్టుకు హాజరుకాకపోవడంతోనే వారెంట్ జారీ చేసింది న్యాయస్థానం. వంశీపై నాలుగు కేసుల్లో ప్రజాప్రతినిధుల కోర్టు విచారణ చేస్తోంది. ఈ నేపథ్యంలో ఆయనకు అరెస్ట్ వారెంట్ జారీ అయ్యింది.
రాష్ట్రంలో ఎన్నికల వేడి మొదలై అభ్యర్థుల ఎంపిక హడావుడి... బాగా పెరిగిపోయింది. కానీ, వంశీ మాత్రం పోటీపై నోరు విప్పడం లేదు. మరోవైపు, గత కొద్ది రోజులుగా ఎమ్మెల్యే వంశీ సైలెంట్‌గా ఉన్నారు. నెలన్నరగా నియోజకవర్గ ప్రజలకు ఆయన కనిపించడంలేదని, హైదరాబాద్‌లోనే ఉన్నారనే ప్రచారం కూడా జరుగుతోంది. వల్లభనేని వంశీ గన్నవరం నియోజకవర్గం నుంచి రెండుసార్లు టీడీపీ తరఫున పోటీ చేసి విజయం సాధించారు.
ఎన్నికల అనంతరం ఆయన వైఎస్ఆర్సీపీకి మద్దతు తెలపడంతో అక్కడ గత ఎన్నికలలో పోటీ చేసిన యార్లగడ్డ వెంకట్రావు టీడీపీలోకి వెళ్లి అక్కడ ఇన్‌ఛార్జి పదవిని చేపట్టారు. ఒకవేళ, వంశీ వైఎస్ఆర్సీపీ నుంచి పోటీచేస్తే యార్లగడ్డను ఎదుర్కొనాల్సి ఉంటుంది. కానీ ఆ పార్టీలోని దుట్టా రామచంద్రరావు కూడా వల్లభనేని వంశీ నాయకత్వాన్ని వ్యతిరేకిస్తున్నారు. ఈ నేపథ్యంలో వల్లభనేని వంశీని తప్పిస్తారా? లేక ఆయనకు మరొక సీటును కేటాయిస్తారా? అన్న దానిపై కూడా చర్చ జరుగుతుంది.
|
|