మైలవరం బరిలో జడ్పీటీసీ.. సిట్టింగ్ ఎమ్మెల్యేకు షాక్ ఇచ్చిన సీఎం జగన్

2024 ఏపీ శాసనసభ ఎన్నికలకు వైనాట్ 175 అనే నినాదంతో ముందుకెళ్తున్న వైఎస్‌ఆర్‌సీపీ అధినేత, సీఎం జగన్.. కీలక నిర్ణయాలు తీసుకుంటున్నారు. పేరుతో పనిలేకుండా, సర్వేలు, సామాజికవర్గాల సమీకరణాలే ప్రాతిపదికన నియోజకవర్గాలకు ఇంఛార్జులను నియమిస్తున్నారు సీఎం జగన్. శుక్రవారం కూడా వైసీపీ నుంచి ఆరో జాబితా రిలీజైంది. ఈ జాబితాలో నాలుగు ఎంపీ, ఆరు ఎమ్మెల్యే స్థానాలకు ఇంఛార్జులను వైఎస్ జగన్ నియమించారు. అయితే సీఎం జగన్ తీసుకున్న ఓ నిర్ణయం మాత్రం రాజకీయ వర్గాలను సైతం ఆశ్చర్యానికి గురిచేసిందని చెప్పొచ్చు.

ఎమ్మెల్యేను కాదని జెడ్పీటీసీకి ఇంఛార్జి పదవి.. అదే కారణమా?

ఆరో జాబితాలో మైలవరం ఎమ్మెల్యే వసంత కృష్ణప్రసాద్‌కు వైఎస్ జగన్ షాకిచ్చారు. ఆ నియోజకవర్గానికి ఇంఛార్జిగా స్వర్నాల తిరుపతి యాదవ్‌ను జగన్ నియమించారు. తిరుపతి యాదవ్ ప్రస్తుతం మైలవరం జెడ్పీటీసీగా ఉన్నారు. అయితే ఎమ్మెల్యేను కాదని, జెడ్పీటీసీగా ఉన్న తిరుపతి యాదవ్‌ను మైలవరం వైసీపీ ఇంఛార్జిగా నియమించడం వెనుక కూడా అనేక కారణాలు ఉన్నాయని విశ్లేషకులు భావిస్తున్నారు. అయితే సర్వేలతో పాటుగా సామాజిక వర్గ సమీకరణాలే ప్రధాన కారణంగా చెబుతున్నారు. సిట్టింగ్ ఎమ్మెల్యేగా ఉన్న వసంత కృష్ణప్రసాద్‌ గురించి సర్వేలలో సానుకూల స్పందన రాలేదని సమాచారం. అలాగే వసంతకృష్ణప్రసాద్ కమ్మ సామాజిక వర్గానికి చెందిన వ్యక్తి కాగా.. ఈసారి మైలవరం టికెట్ బీసీలకు ఇవ్వాలని జగన్ నిర్ణయించుకోవడం కూడా మరో కారణంగా తెలుస్తోంది. ఈ నేపథ్యంలోనే యాదవ సామాజికవర్గానికి చెందిన తిరుపతి యాదవ్‌ను ఇంఛార్జిగా నియమించినట్లు తెలిసింది.

ముందే అందిన సిగ్నల్స్.. అందుకే వసంత దూరమా?

2019 ఎన్నికల్లో మైలవరం నుంచి వసంత కృష్ణప్రసాద్ గెలుపొందారు. టీడీపీ నేత, మాజీ మంత్రి దేవినేని ఉమామహేశ్వరరావుపై వసంత కృష్ణప్రసాద్ విజయం సాధించారు. అయితే గతకొంతకాలంగా మైలవరం నుంచి ఈసారి వసంతకు టికెట్ దక్కకపోవచ్చనే ప్రచారం సాగుతూ వచ్చింది. సర్వేలలో వ్యతిరేకత వ్యక్తమవటంతో పాటుగా, బీసీలకు సీటివ్వాలనే కారణంతో వసంతకృష్ణ ప్రసాద్‌ను పక్కనబెట్టొచ్చనే ప్రచారం జరిగింది. ఇదే సమయంలో వసంతకృష్ణప్రసాద్ సైతం పార్టీపై పరోక్షంగా విమర్శలు గుప్పించేవారు. ఇటీవలి కాలంలో వసంతకృష్ణ ప్రసాద్ తన మాటల తీవ్రత కూడా పెంచారు. అయితే టికెట్ రాదనే క్లారిటీతోనే వైసీపీకి వసంతకృష్ణప్రసాద్ దూరం జరుగుతున్నారనే ప్రచారం సాగింది. దీనికి మరింత బలాన్నిస్తూ సిద్ధం సభ ఏర్పాట్లకు సైతం వసంతకృష్ణ ప్రసాద్ దూరంగా ఉన్నారు.

అయితే శుక్రవారం ఆరోజాబితాను ప్రకటించే ముందు మైలవరం స్థానం గురించి అధినేత జగన్ తీవ్రంగా చర్చలు జరిపారు. ఎన్టీఆర్ జిల్లాకు చెందిన నేతలు కేశినేని నాని, జోగి రమేశ్ సమావేశం అయ్యారు. మైలవరం నియోజకవర్గానికి సంబంధించి చర్చించారు. చివరకు మైలవరం వైసీపీ ఇంఛార్జిగా మైలవరం జెడ్పీటీసీగా ఉన్న తిరుపతి యాదవ్‌ను నియమిస్తున్నట్లు ప్రకటించారు. మరోవైపు అటు వసంతకృష్ణ ప్రసాద్ సైతం ఫిబ్రవరి 4 లేదా 5న భవిష్యత్ కార్యాచరణ ప్రకటిస్తానని సన్నిహితులతో వెల్లడించినట్లు సమాచారం. మొత్తంగా సామాజికవర్గాల సమీకరణాలను లెక్కలో ఉంచుకుని కమ్మ సామాజికవర్గం కోటగా భావించే మైలవరంలో.. జెడ్పీటీసీగా ఉన్న బీసీని ఇంఛార్జిగా నియమిస్తూ జగన్ తీసుకున్న నిర్ణయం విశ్లేషకులను సైతం కాసింత విస్మయానికి గురిచేసిందని చెప్పొచ్చు.