మళ్లీ తెరుచుకున్న శబరిమల ఆలయం.. అయ్యప్ప దర్శనాలు ఎన్ని రోజులంటే?

మాసి మాస పూజల కోసం శబరిమల అయ్యప్ప ఆలయ తలుపులు తెరుచుకున్నాయి. మంగళవారం సాయంత్రం 5 గంటలకు శబరిమల అయ్యప్ప ఆలయాన్ని ట్రావెన్ కోర్ దేవస్థానం బోర్డు అధికారులు తెరిచారు. అయితే భక్తులకు మాత్రం బుధవారం నుంచి దర్శనాలు ఉంటాయని ప్రకటించారు. బుధవారం ఉదయం నుంచి ఐదు రోజుల పాటు శబరిమల ఆలయం భక్తుల దర్శనాల నిమిత్తం తెరిచి ఉంటుందని ట్రావెన్ కోర్ దేవస్థానం బోర్డు వెల్లడించింది. అయితే ఈ 5 రోజుల్లో అయ్యప్పను దర్శించుకోవడానికి ఆన్‌లైన్‌ బుకింగ్ తప్పనిసరి అని దేవస్థానం బోర్డు స్పష్టం చేసింది. బుకింగ్ లేని వారికి దర్శనాలు లేవని తేల్చి చెప్పింది.

బుధవారం ఉదయం నుంచి ఈ నెల 18 వ తేదీ వరకు శబరిమలలో మాసి మాస పూజలు జరగనున్నట్లు శబరిమల ఆలయ పూజారులు వెల్లడించారు. ఈ 5 రోజుల పాటు సాధారణ, ప్రత్యేక పూజలు నిర్వహించనున్నట్లు ప్రకటించారు. ఈ క్రమంలోనే భక్తుల దర్శనాల కోసం ఆన్‌లైన్‌లో బుకింగ్ ఏర్పాటు చేసినట్లు దేవస్థానం బోర్డు వెల్లడించింది. దీంతోపాటు నీలక్కల్, ముంబైలో స్పాట్ బుకింగ్ కౌంటర్లు ఏర్పాటు చేశామని ప్రకటించింది. మంగళవారం సాయంత్రం శబరిమల అయ్యప్ప ఆలయాన్ని తెరిచిన ఆలయ పూజారులు ఎలాంటి పూజలు నిర్వహించరు. ఆలయాన్ని మళ్లీ మూసివేసి బుధవారం ఉదయం తెరిచి పూజలు నిర్వహిస్తారు. ఉదయం 5 గంటల నుంచి భక్తులను అయ్యప్ప దర్శనానికి అనుమతిస్తారు.

ఈ 5 రోజుల్లో అయ్యప్ప స్వామికి ప్రత్యేక పూజలు నిర్వహిస్తారు. బుధవారం ఉదయం 5 గంటలకు నెయ్యి అభిషేకం ప్రారంభించి రాత్రి వరకు వివిధ రకాల పూజలు నిర్వహిస్తారు. బుధవారం నుంచి ఈ నెల 18 వ తేదీ వరకు రోజూ రాత్రి 7 గంటలకు అయ్యప్పకు పడిపూజ నిర్వహిస్తారు. ఇక 18 వ తేదీ రాత్రి నిత్యపూజల అనంతరం హరివరాసనం ఆలపించి ఆలయాన్ని మళ్లీ మూసివేయనున్నారు. ప్రతి మాసి మాసం ప్రారంభంలో శబరిమల అయ్యప్ప ఆలయాన్ని తెరిచి పూజలు నిర్వహిస్తారు. ఈ పూజలకు కేవలం కేరళ నుంచే కాకుండా తమిళనాడు, ఆంధ్రప్రదేశ్, కర్ణాటక, తెలంగాణ సహా దేశంలోని వివిధ రాష్ట్రాల నుంచి భారీ సంఖ్యలో భక్తులు తరలివస్తారు. మరీ ముఖ్యంగా శబరిమల సీజన్‌ అయిన మండల పూజ, మకర దీప దర్శన సమయంలో లక్షలాది మంది భక్తులు శబరిగిరులకు పోటెత్తుతారు. ఈ క్రమంలోనే తాజాగా మాసి మాస పూజల కోసం శబరిమల అయ్యప్ప ఆలయం నేడు తెరుచుకుంది.

ఈసారి గతేడాది నవంబర్ 17 వ తేదీన ప్రారంభమైన మండల పూజలు డిసెంబర్ 27 వ తేదీతో ముగిశాయి. ఆ తర్వాత 2 రోజుల విరామం అనంతరం.. డిసెంబర్ 30 వ తేదీ సాయంత్రం మకరవిళక్కు పూజల కోసం ఆలయాన్ని తిరిగి తెరిచారు. ఆ తర్వాత జనవరి 14 వ తేదీన శబరిమలలో మకర దర్శనం జరగగా.. 20 వతేదీ న ఆలయాన్ని మూసివేశారు. ఇక ఈ సీజన్‌లో మునుపెన్నడూ లేని విధంగా భారీగా అయ్యప్ప భక్తులు శబరిమలకు పోటెత్తారు. ఈసారి దాదాపు 50 లక్షల మంది భక్తులు శబరిమలకు వచ్చి అయ్యప్ప దర్శనం చేసుకున్నట్లు ట్రావెన్ కోర్ దేవస్థానం బోర్డు తెలిపింది.